ମୋଦିଙ୍କୁ ନେହୁରା ହେଲେ ଗଣବଳାତ୍କାରର ଶିକାର ହୋଇଥିବା ପୀଡିତା, କହିଲେ ଭାରତ ଆସିବାକୁ ଅନୁମତି ଦିଅ

ପାକ୍‌ ଅଧିକୃତ କାଶ୍ମୀରେ ଗଣବଳତ୍କାର ଶିକାର ହୋଇଥିବା ଜଣେ ମହିଳା ମୋଦିଙ୍କୁ ସାହାଯ୍ୟ ଲୋଡିଛନ୍ତି । ଗତ ୭ ବର୍ଷ ଧରି ନ୍ୟାୟ ପାଇଁ ଲଢ଼ି ଆସୁଛନ୍ତି ପୀଡିତା ନୁରା ବେଗମ (ଛଦ୍ମନାମ) । ଏହାରି ମଧ୍ୟରେ ସେ ଏବେ ମୋଦିଙ୍କୁ ଆଶ୍ରୟ ତଥା ସହାୟତା ଭିକ୍ଷା କରିଛନ୍ତି ।

ଏନେଇ ନୁରା ଏକ ଭିଡିଓ ମାଧ୍ୟମରେ କହିଛନ୍ତି ଯେ, ‘ଗଣବଳତ୍କାର ଶିକାର ହୋଇଥିବାରୁ ଗତ ୭ ବର୍ଷ ଧରି ମୁଁ ନ୍ୟାୟ ପାଇଁ ଲଢ଼ୁଛି । ପାକ୍‌ ପୋଲିସ, ସରକାର ଓ ନ୍ୟାୟପାଳିକା ମୋତେ ନ୍ୟାୟ ଦେବାରେ ବିଫଳ ହୋଇଛନ୍ତି । ଏହି ଭିଡିଓ ମାଧ୍ୟମରେ ମୁଁ ଭାରତର ପ୍ରଧାନମନ୍ତ୍ରୀଙ୍କୁ ଆବେଦନ କରୁଛି କି ଆମକୁ ଭାରତ ଆସିବାକୁ ଅନୁମତି ଦିଅନ୍ତୁ’ ।

#Justice4MariaTahirpic.twitter.com/630EQ6uYR1

— Maria Tahir (@MariaTa97679948) April 10, 2022

ଏହାସହ ସେ କହିଛନ୍ତି କି, ‘ଏଠାରେ ମୋ ସନ୍ତାନଙ୍କୁ ଜୀବନରୁ ମାରିଦେବାର ଧମକ ଦିଆଯାଉଛି । ସ୍ଥାନୀୟ ପୋଲିସ ଓ ଜଣେ ବରିଷ୍ଠ ନେତା କେତେବେଳେ ବି ମୋର ଏବଂ ମୋର ସନ୍ତାନଙ୍କ ହତ୍ୟା କରିପାରନ୍ତି । ତେଣୁ ମୁଁ ପିଏମ୍‌ ମୋଦିଙ୍କୁ ଅନୁରୋଧ କରୁଛି କି ଆମକୁ ଆଶ୍ରୟ ଓ ସୁରକ୍ଷା ପ୍ରଦାନ କରନ୍ତୁ ।

ପୂର୍ବରୁ ମଧ୍ୟ ଏକ ଭିଡିଓରେ ସେ କହିଥିଲେ ଯେ, ‘୨୦୧୫ ମସିହାରେ ମୋ ସହ ହୋଇଥିବା ଗଣବଳତ୍କାରରେ ସମ୍ପୃକ୍ତ ଦୋଷୀଙ୍କୁ କଠୋର ଦଣ୍ଡ ତଥା ନିଜକୁ ନ୍ୟାୟ ଦେବା ପାଇଁ ମୁଁ ବାରମ୍ୱାର ଆଇନର ଦ୍ୱାରସ୍ଥ ହେଉଛି । ମୋ ସହ ହୋଇଥିବା ଅନ୍ୟାୟରେ ହାରୁନ ରସିଦ୍, ମମୁନ ରସିଦ୍ ଜମିଲ ସଫି, ବକାଶ ଅସରଫ, ସମନ ହାରୁନ ସମେତ ଆହୁରି ୩ ଜଣ ସାମିଲ ଅଛନ୍ତି ।’

ମହିଳାଙ୍କ କହିବା ଅନୁଯାୟୀ, ସେ ସ୍ଥାନୀୟ ପୋଲିସ ଓ ନେତାଙ୍କୁ ମଧ୍ୟ ଯୋଗାଯୋଗ କରିଥିଲେ । ହେଲେ ବର୍ତ୍ତମାନ ସୁଦ୍ଧା ନ୍ୟାୟ ପାଇପାରୁନାହାଁନ୍ତି । ଯେଉଁଥିପାଇଁ ସେ ପାକ୍‌ ଅଧିକୃତ କାଶ୍ମୀରର ମୁଖ୍ୟ ନ୍ୟାୟପାଳିକାଙ୍କ ସହ ସ୍ଥାନୀୟ ଅଧିକାରୀଙ୍କୁ ଅନେକ ଥର ଚିଠି ଲେଖି ମଧ୍ୟ କିଛି ହୋଇପାରୁ ନାହିଁ ବରଂ ତାଙ୍କୁ କେବଳ ଅପମାନିତ କରାଯାଇଥିବାର କହିଛନ୍ତି ମହିଳା ।