LIVE TV
ତାଲିବାନ୍ କ୍ଷମତାକୁ ଆସିବା ପରେ ଆଫଗାନିସ୍ତାନର ଚିତ୍ର ବଦଳିଯାଇଛି । ତାଲିବାନ୍ର ଏକଛତ୍ରବାଦ ଶାସନ କାରଣରୁ ଆଫଗାନୀ ଲୋକଙ୍କ ଉପରେ ଅତ୍ୟାଚାର ଓ ଅନ୍ୟାୟ ବଢ଼ିଯାଇଛି । ଯେଉଁଥିରୁ ବଞ୍ଚିବା ପାଇଁ ଅନେକ ଲୋକେ ଦେଶ ଛାଡି ମଧ୍ୟ ପଳାଇଛନ୍ତି । ଏହାରି ମଧ୍ୟରେ ତାଲିବାନ୍ ଅନେକ ନୂଆ ନିୟମମାନ ଲାଗୁ କରିସାରିଛି । ଯାହା ପରେ ଏବେ ପୁଣି ଏକ ନୂଆ ନିୟମ ଲାଗୁ ହୋଇଛି । ଯେଉଁଥିରେ ସ୍ୱାମୀ-ସ୍ତ୍ରୀଙ୍କୁ ରେଷ୍ଟୁରାଣ୍ଟରେ ଏକାଠି ବସିବାକୁ ତାଲିବାନ ବାରଣ କରିଛି ।
ଏନେଇ ତାଲିବାନ ଆତଙ୍କବାଦୀ ସଂଗଠନ ପକ୍ଷରୁ ଏକ ନିର୍ଦ୍ଦେଶନାମା ଜାରି କରାଯାଇଛି । ଏଥିରେ କୁହାଯାଇଛି ଯେ, ପାର୍କକୁ ମହିଳା ଏବଂ ପୁରୁଷ ଭିନ୍ନ ଭିନ୍ନ ଦିନରେ ଯାଇପାରିବେ। ଏହାପୂର୍ବରୁ ଆଫଗାନିସ୍ତାନର ହେରାଟ ସହରରେ ମହିଳାମାନଙ୍କୁ ଡ୍ରାଇଭିଂ ଲାଇସେନ୍ସ ପ୍ରଦାନ ଉପରେ ରୋକ ଲଗାଯାଇଥିଲା । କେବଳ ଏତିକି ନୁହେଁ ମହିଳାଙ୍କୁ ନିଜ ଶରୀରକୁ ବୁରଖା ଦ୍ୱାରା ଘୋଡାଇ ରହିବାକୁ ମଧ୍ୟ କୁହାଯାଇଥିଲା।
Also Read
କାବୁଲ ନ୍ୟୁଜର ରିପୋର୍ଟ ଅନୁଯାୟୀ, ହେରାଟରେ ଏକ ତାଲିବାନ ଜେଲ ଅଛି । ଯେଉଁଠାରେ ମହିଳାମାନେ ପୁରୁଷ ସାଥୀଙ୍କ ବିନା ଟ୍ୟାକ୍ସିରେ ବସିଥିବାରୁ ବିନା ବିଚାରରେ ବନ୍ଦୀ ହୋଇ ରହିଛନ୍ତି । ସ୍କୁଲ ଛାତ୍ରମାନେ ମଧ୍ୟ ସେମାନଙ୍କର ପୁରୁଷ ସହପାଠୀମାନଙ୍କ ସହିତ ଫଟୋ କ୍ଲିକ୍ କରିଲେ ତାଙ୍କୁ ଦଣ୍ଡିତ କରାଯାଇଥାଏ । ଏଭଳି କାର୍ଯ୍ୟକୁ ତାଲିବାନ ଅପରାଧ ବୋଲି ବିବେଚନା କରିଥାଏ।
ଆଫଗାନିସ୍ତାନରେ ମାନବିକ ଅଧିକାର ଏବଂ ମହିଳାଙ୍କ ଅଧିକାର ଖୋଲାଖୋଲି ଭାବେ ଉଲ୍ଲଂଘନ କରାଯାଉଛି। ତାଲିବାନ ମଧ୍ୟ ପୂର୍ବ କାର୍ଯ୍ୟକାଳ ତୁଳନାରେ ଉଦାର ଭାବରେ ଶାସନ କରିବାର ପ୍ରତିଶ୍ରୁତି ଦେଇ ଫେରିଛି।
- ସ୍ୱାମୀ-ସ୍ତ୍ରୀଙ୍କ ପାଇଁ ଲାଗୁ ହୋଇଥିବା ନିୟମ
ତାଲିବାନର ଅଧିକାରୀ ନୂଆ ନିୟମକୁ ଜାରି କରି କହିଛନ୍ତି ଯେ, ରେଷ୍ଟୁରାଣ୍ଟରେ ମହିଳା ଏବଂ ପୁରୁଷଙ୍କୁ ଅଲଗା ଅଲଗା ବସିବାକୁ କୁହାଯାଇଛି। ଏମିତିକି ସେମାନେ ସ୍ୱାମୀ-ସ୍ତ୍ରୀ ହୁଅନ୍ତୁ ନା କାହିଁକି କେହି ମଧ୍ୟ ଏହି ନିୟମକୁ ଉଲ୍ଲଙ୍ଘନ କରିପାରିବେନାହିଁ । ଏହା ସମସ୍ତଙ୍କ ପାଇଁ ବୋଲି ରେଷ୍ଟୁରାଣ୍ଟ ମାଲିକମାନଙ୍କୁ ଚେତାବନୀ ଦିଆଯାଇଛି ।
- ମହିଳାମାନଙ୍କୁ ଘରେ ବ୍ୟାୟାମ କରିବା ନିର୍ଦ୍ଦେଶ
ତାଲିବାନ ଅଧିକାରୀ କହିଛନ୍ତି, ତାଙ୍କ କାର୍ଯ୍ୟାଳୟ ଦ୍ୱାରା ଜାରି କରାଯାଇଥିବା ନିର୍ଦ୍ଦେଶ ଅନୁଯାୟୀ, ମହିଳା ଏବଂ ପୁରୁଷମାନେ ଭିନ୍ନ ଭିନ୍ନ ଦିନରେ ହେରାଟଙ୍କ ପାର୍କକୁ ଯାଇପାରିବେ । ସେମାନଙ୍କ ପାଇଁ ନିର୍ଦ୍ଧିଷ୍ଟ ଦିନ ଧାର୍ଯ୍ୟ କରାଯାଇଛି । ଗୁରୁବାର, ଶୁକ୍ରବାର ଏବଂ ଶନିବାର ଦିନ ମହିଳାମାନଙ୍କୁ ପାର୍କକୁ ଯିବାକୁ ଅନୁମତି ଦିଆଯାଇଥିବାବେଳେ ଅନ୍ୟ ଦିନ ମାନଙ୍କରେ ପୁରୁଷମାନେ ପାର୍କକୁ ଯାଇପାରିବେ ।
ଏହାସହ ମହିଳାମାନଙ୍କୁ ପାର୍କରେ ବ୍ୟାୟାମ କରିବାକୁ ମଧ୍ୟ ବାରଣ କରାଯାଇଛି । ଯଦି ତେବେ ସେମାନେ ବାୟାମ କରିବାକୁ ଚାହାଁନ୍ତି ତେବେ ସେମାନେ ଘରେ କରନ୍ତୁ ବୋଲି କହିଛନ୍ତି ତାଲିବାନୀ ଅଧିକାରୀ ।
