ୟୁକ୍ରେନ୍‌ ଉପରେ ଆକ୍ରମଣ ଜାରି : ଚେରନିହିବ୍‌ର ଏକ ଘର ଉପରେ ପଡ଼ିଲା ୫୦୦ କିଲୋର ବୋମା

ୟୁକ୍ରେନର ରାଜଧାନୀ କିଭରେ ଯୁଦ୍ଧର ସଙ୍କଟ ଗଭୀର ହେବାରେ ଲାଗିଛି । ଘନଘନ ବୋମା ବିସ୍ଫୋରଣରେ ୟୁକ୍ରେନ୍‌ବାସୀ ଆକ୍ତାମାକ୍ତା ହୋଇପଡ଼ୁଛନ୍ତି । ବର୍ତ୍ତମାନ ୟୁକ୍ରେନ୍‌ରେ ଚାରିଆଡ଼େ ହାହାକାର ପରିସ୍ଥିତି ସୃଷ୍ଟି ହୋଇଛି । ଋଷୀୟ ସେନା ରାଜଧାନୀ କିଭକୁ ଚାରିଆଡ଼ୁ ଘେରି ରହିଛନ୍ତି ଏବଂ କିଭରୁ ଶତ୍ରୁ ସୈନ୍ୟବାହିନୀଙ୍କ ଦୂରତା ଧୀରେ ଧୀରେ ହ୍ରାସ ପାଉଛି । ୟୁକ୍ରେନ ଏବେ ଧ୍ୱଂସ ସ୍ତୁପରେ ପରିଣତ ହେବା ପରି ଲାଗୁଛି । ଏଭଳି ସ୍ଥିତିରେ ୟୁକ୍ରେନର ବୈଦେଶିକ ମନ୍ତ୍ରୀ ଟ୍ୱିଟରରେ ନିଜର ତଥା ଦେଶବାସୀଙ୍କ ଯନ୍ତ୍ରଣା ବଖାଣିଛନ୍ତି ।

ୟୁକ୍ରେନର ବୈଦେଶିକ ମନ୍ତ୍ରୀ ଦିମିତ୍ରୀ କାଲେବା ଟ୍ୱିଟରରେ ଏକ ବିଶାଳକାୟ ବୋମାର ଫଟୋ ପୋଷ୍ଟ କରିଛନ୍ତି । ଏଭଳି ବୋମା ତାଙ୍କ ଦେଶର ଲୋକଙ୍କ ଜୀବନକୁ ହତ୍ୟା କରୁଥିବା ସେ ଲେଖିଛନ୍ତି । ଏପରି ଘଡ଼ିସନ୍ଧି ମୁହୂର୍ତ୍ତରେ ୟୁକ୍ରେନକୁ ଯୁଦ୍ଧ ବିମାନ ଦେବା ପାଇଁ ମଧ୍ୟ ନିବେଦନ କରିଛନ୍ତି ।

This horrific 500-kg Russian bomb fell on a residential building in Chernihiv and didn’t explode. Many other did, killing innocent men, women and children. Help us protect our people from Russian barbarians! Help us close the sky. Provide us with combat aircraft. Do something! pic.twitter.com/3Re0jlaKEL

— Dmytro Kuleba (@DmytroKuleba) March 6, 2022

ଟ୍ୱିଟରରେ ଫଟୋ ପୋଷ୍ଟ କରି ଦିମିତ୍ରୀ କାଲେବା ଲେଖିଛନ୍ତି, 'ଏହି ଭୟଙ୍କର ୫୦୦ କିଲୋଗ୍ରାମର ଋଷୀୟ ବୋମା ଚେରନିହିବର ଏକ ଘର ଉପରେ ପଡିଛି । ହେଲେ ସୌଭାଗ୍ୟବଶତଃ ଏହା ଫାଟି ନାହିଁ । ଏପଯରି ଅନେକ ବୋମା ବିସ୍ଫୋରଣ ନିରୀହ ପୁରୁଷ, ମହିଳା ଏବଂ ଶିଶୁଙ୍କୁ ହତ୍ୟା କରୁଛି । ୟୁକ୍ରେନ୍‌ ବାସୀଙ୍କୁ ପୁଟିନ୍‌ ସରକାରଙ୍କ ବର୍ବରତାରୁ ରକ୍ଷା କରିବାକୁ ସେ ସାହାଯ୍ୟ ଭିକ୍ଷା କରିଛନ୍ତି । ୟୁକ୍ରେନ୍‌ର ଏୟାରସ୍ପେସ୍‌କୁ ବନ୍ଦ କରି ଯୁଦ୍ଧ ବିମାନ ଦେବାକୁ ଅନୁରୋଧ କରିଛନ୍ତି ।

ସେହିପରି ଗତକାଲି ମଧ୍ୟ ଭାରତ ସରକାରଙ୍କ ସାହାଯ୍ୟ ଭିକ୍ଷା କରିଥିଲେ ଦିମିତ୍ରୀ କାଲେବା । ଋଷିଆ ସହ ଭଲ ଭାରତର ଭଲ ବନ୍ଧୁତା ରହିଛି । ଭାରତ ଋଷିଆକୁ ଆକ୍ରମଣ ରୋକିବାକୁ କହିପାରିବ । ବନ୍ଧୁ ରାଷ୍ଟ୍ର ହୋଇଥିବାରୁ ମୋଦିଙ୍କ କଥାକୁ ରାଷ୍ଟ୍ରପତି ଭ୍ଲାଦିମିର୍ ପୁଟିନ ଟାଳିବେ ନାହିଁ ବୋଲି ଦିମିତ୍ରୀ କାଲେବା କହିଛନ୍ତି ।