ସାବାସ୍ ! ବାପାଙ୍କ ସ୍ୱପ୍ନ ସାକାର କଲା ଝିଅ, ଝାଳବୁହା ପରିଶ୍ରମର ରଖିଲା ମୂଲ୍ୟ

ଇଚ୍ଛା ଥିଲେ ସବୁ କିଛି ସମ୍ଭବ । ଆସାଧ୍ୟ କାର୍ଯ୍ୟ ବି ହୋଇପାରିବ ସହଜ । ଆଜିର କାହାଣୀରେ ଇଚ୍ଛା ଆଗରେ ହାର ମାନିଛି ଅଭାବ ଅନଟନ ଏବଂ ଆର୍ଥିକ ପ୍ରତିବନ୍ଧକ । ପରିଶ୍ରମର ଫଳ ପାଇଛନ୍ତି ପରିବା ବ୍ୟବସାୟୀଙ୍କ ଝିଅ । ନିଟ୍‌ ପରୀକ୍ଷାରେ ୭୨୦ ନମ୍ବରରୁ ୬୨୨ ନମ୍ବର ରଖି କୃତିତ୍ୱ ହାସଲ କରିବା ସହ ପୂରା ଜିଲ୍ଲା ପାଇଁ ଆଣିଛନ୍ତି ଗୌରବ ।

ଇଶ୍ରିତା ପଣ୍ଡା । ଘର ଗଜପତିର ଅଡ଼ବା ଗାଁରେ । ପିଲାଟି ଦିନରୁ ପାଠ ପ୍ରତି ତାଙ୍କର ଥିଲା ଅହେତୁକ ଦୁର୍ବଳତା । ସେଇଥିପାଇଁ ତ ରାତିଦିନ ଏକ କରି ସବୁବେଳେ ପଢୁଥିଲେ ପାଠ । ଇଚ୍ଛାଥିଲା ବାପାଙ୍କ ଦୁଃଖ ଦୂର କରିବେ । ଆଉ ଆଜି ସେଇୟା ହିଁ ହେଲା । କାରଣ ଗାଁ ଛକ ଉପରେ ଖରା ତରାରେ ବସି ବାପା ପରିବା ବିକି ବିକି ପରିବାର ଚଳାଇବାର କଷ୍ଟ ବେଶ୍‌ ଭଲରେ ବୁଝିପାରିଥିଲା ଝିଅ ।

ଦୁଇ ଦୁଇଟି ଝିଅଙ୍କୁ ଆଜିକା ଦିନରେ ମଣିଷ କରିବା ଯେ କେତେ କଷ୍ଟ ତାହା ଆମେ ସମସ୍ତେ ଜାଣନ୍ତି । ତେଣୁ କୃଷ୍ଣଚନ୍ଦ୍ର, ଦୁଇ ଝିଅଙ୍କୁ ମଣିଷ କରିବା ପାଇଁ ଦିନରାତି ଏକ କରି ପରିଶ୍ରମ କରୁଥିଲେ । ମୁଣ୍ଡ ଝାଳ ତୁଣ୍ଡରେ ମାରି କରୁଥିଲେ ରୋଜଗାର । ଆଉ ଆଜି ଝିଅ ଯେତେବେଳେ ନିଟ୍‌ ପରୀକ୍ଷାରେ ପାସ୍‌ କରିଛି ବାପାଙ୍କ ଖୁସି କହିଲେ ନସରେ ।

ଏମିତିକି ଝିଅ କ୍ୱାଲିଫାଏ ଖବର ଶୁଣିବା ପରେ ବାପାଙ୍କ ଆଖିରେ ଝରି ଆସିଥିଲା ଖୁସିର ଲୁହ । ଜଣେ ପରିବା ବ୍ୟବସାୟୀଙ୍କ ଝିଅର ସଫଳତା ଏବେ କେବଳ ଅଡ଼ବା ଅଂଚଳ ନୁହେଁ ବରଂ ମୋହନା ବ୍ଲକ ସମେତ ଗଜପତି ଜିଲ୍ଲା ପାଇଁ ନିଶ୍ଚୟ ଗର୍ବ ଓ ଗୌରବର ବିଷୟ । ଝିଅ ଆଗକୁ ଯାଇ ଅନେକ ସଫଳତା ପାଉ ବୋଲି ପରିବାର ଲୋକ ଆଶା ରଖିଛନ୍ତି । 

(ରିପୋର୍ଟ- ମିହିର ଜତି, ମୋହନା)