H9N2 ଇନଫ୍ଲୁଏଞ୍ଜାକୁ ଡରିବାର ନାହିଁ, ରାଜ୍ୟରେ ଏଯାଏଁ ଚିହ୍ନଟ ହୋଇନି ଚୀନର ଏହି ଭୂତାଣୁ

ଏପର୍ଯ୍ୟନ୍ତ ଆମ ରାଜ୍ୟରେ ଚିହ୍ନଟ ହୋଇନି ଚୀନରେ ଶିଶୁଙ୍କଠାରେ ନିମୋନିଆ ସଂକ୍ରମଣ କରୁଥିବା H9N2 ଇନଫ୍ଲୁଏଞ୍ଜା ଭୂତାଣୁ । କୋଭିଡ ଭାଇରସ ଭଳି ଏହା ନୂଆ ନୁହେଁ, ଆମ ରାଜ୍ୟରେ ବି ଏହା ରହିଛି । ଏହା କହିଛନ୍ତି ଜନସ୍ୱାସ୍ଥ୍ୟ ନିର୍ଦ୍ଦେଶକ ଡାକ୍ତର ନିରଞ୍ଜନ ମିଶ୍ର । ତେବେ କେନ୍ଦ୍ର ଆଡଭାଇଜାରୀ ପରେ ଏହାକୁ ନେଇ ସତର୍କ ଓ ପ୍ରସ୍ତୁତ ରହିବାକୁ ସବୁ ଜିଲ୍ଲାକୁ ନିର୍ଦ୍ଦେଶ ଦିଆଯାଇଛି । ମେଡିକାଲ ବେଡ୍ ସଂରକ୍ଷିତ ରଖିବା ସହ ମ୍ୟାନ୍ ପାୱାର୍, ମେଡିସିନ ମହଜୁଦ ପାଇଁ ସମସ୍ତ ଜିଲ୍ଲା ଚିକିତ୍ସାଳୟକୁ ନିର୍ଦ୍ଦେଶ ଦିଆଯାଇଛି ।

ନିମୋନିଆରେ ଆଡ଼ମିଶନ ହେଉଥିବା ପିଲାଙ୍କ ଟେଷ୍ଟ କରାଇବାକୁ ନିର୍ଦ୍ଦେଶ ରହିଛି। ଇନଫେକ୍ସନ୍ କ୍ଲଷ୍ଟର ଆଉଟବ୍ରେକ୍ ଦେଖାଦେଲେ, ସର୍ଭେଲାନ୍ସ ସହ ସ୍ବାସ୍ଥ୍ୟ ବିଭାଗକୁ ରିପୋର୍ଟ କରିବାକୁ କୁହାଯାଇଛି। ଜନସାଧାରଣଙ୍କୁ ଅନୁରୋଧ, ଯେଉଁମାନଙ୍କୁ ଥଣ୍ଡା କାଶ ହେଉଛି, ନିଜକୁ ଆଇସୋଲେସନରେ ରଖନ୍ତୁ, ମାସ୍କ ପିନ୍ଧନ୍ତୁ । ଲୋକ ସଚେତନ ରହିଲେ, ସଂକ୍ରମଣକୁ କମାଯାଇପାରିବ । ତେବେ ଏହାକୁ ନେଇ ଆତଙ୍କିତ ହେବାର ନାହିଁ ବୋଲି କହିସାରିଛି ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ।