ଅକ୍ଷୟ ତୃତୀୟାରେ ଘରେ ବନାନ୍ତୁ ‘ଗୋଲାପଜାମୁନ୍’

ଓଡ଼ିଆ ଜାତି ସହ ମିଠା ପରମ୍ପରା ମିଶି କରି ରହିଛି। ମହାପ୍ରଭୁ ଶ୍ରୀଜଗନ୍ନାଥଙ୍କ ପାଖରେ ରସଗୋଲା ଭୋଗ ହୁଏ। ମିଠା ପ୍ରସ୍ତୁତି ଓଡ଼ିଆ ଜାତିର ଏକ ବଡ଼ ଖାଦ୍ୟ ପରମ୍ପରା। ମିଠା ଭିତରେ ରସଗୋଲା ତ ସବୁଠୁ ଲୋକପ୍ରିୟ। ତା ପରେ ବୋଧେ ଦ୍ବିତୀୟ ଲୋକପ୍ରିୟ ମିଠା ହେଲା ଗୋଲାପଜାମୁନ। ଅକ୍ଷୟ ତୃତୀୟା ପାଇଁ ଘରେ ବନାନ୍ତୁ ସୁଆଦିଆ ଗୋଲାପଜାମୁନ । ତେବେ ଚାଲନ୍ତୁ ଜାଣିବା ଏହାକୁ କିଭଳି ପ୍ରସ୍ତୁତ କରାଯାଏ

ପ୍ରସ୍ତୁତି ପ୍ରଣାଳୀ:

• ପ୍ରଥମେ ଗୋଲାପଜାମୁନ ପାଉଡର ଆଣନ୍ତୁ। ସେଥିରେ କିଛି କଞ୍ଚା କ୍ଷୀର ପକାଇ ଗୋଳାନ୍ତୁ।
• ସେଥିରେ ଅଳ୍ପ ଗୁଆଘିଅ ବି ପକାନ୍ତୁ। ପରେ ସେଥିରେ ଗୁଜରାତି ଗୁଣ୍ଡ ପକାନ୍ତୁ।
• ଏହାପରେ ତା ସହ ସ୍ୱାଦ ଅନୁଯାୟୀ ଅଳ୍ପ ଲୁଣ ପକାନ୍ତୁ। ପରେ ତାକୁ ଭଲ ଭାବରେ ଗୋଳେଇ ଦିଅନ୍ତୁ ଓସେଥିରେ ଖାଇବା ସୋଢ଼ା ପକାନ୍ତୁ।
• ଏହାପରେ ତାକୁ ଭଲ ଭାବରେ ଚକଟି ଦିଅନ୍ତୁ ଓ ଆଣ ଟିକିଏ ପାଗ ହୋଇ କାଠୁଆ ହୋଇ ଆସିଲେ ସେଥିରେ ଗୋଲ ଗୋଲ ଗୁଳା ତିଆରି କରନ୍ତୁ, ଯେମିତି ଅଟା ଚକଟିଲା ପରେ ରୁଟି ତିଆରି ପାଇଁ ଗୁଳା କରନ୍ତି। 
• ଏବେ କଡ଼େଇରେ ରିଫାଇନ୍ ତେଲ ଗରମ କରନ୍ତୁ। ସେଥିରେ ଗୁଳାକୁ ଛାଣନ୍ତୁ।

ଅଧିକ ପଢ଼ନ୍ତୁ: ପର୍ବପର୍ବାଣୀରେ ଘରେ ବନାନ୍ତୁ 'ଆମ୍ବ ଖିରି

• ଗୋଳା ଛାଣିଲା ବେଳେ, ଅଳ୍ପ ନିଆଁରେ ହିଁ ଏହାକୁ ଛାଣନ୍ତୁ। ନ ହେଲେ ତାହା ପୋଡ଼ି ଯାଇ କଳା ଦେଖାଯାଇ ପାରେ ।
• ଏହା ଲାଲ୍ ହେବା ପରେ ତାକୁ ପ୍ଲେଟ୍‌କୁ କାଢ଼ି ଆଣନ୍ତୁ।
• ଏହାପରେ ଶିରା ପ୍ରସ୍ତୁତ କରିବାକୁ ବ୍ୟବସ୍ଥା କରନ୍ତୁ। ଏକ କଡ଼େଇରେ ପାଣି ଗରମ କରି ସେଥିରେ ଚିନି ପକାନ୍ତୁ।
• କିଛି ସମୟ ତାକୁ ଗୋଳେଇ ଗୋଳେଇ ଶିରା ପ୍ରସ୍ତୁତ କରନ୍ତୁ। ଶିରା ପ୍ରସ୍ତୁତ ହେଲା ପରେ ସେଥିରେ ଗୁଜରାତି ଗୁଣ୍ଡ ପକାନ୍ତୁ।
• ଶିରା ଯେପରି ଟିକେ ବହଳିଆ ହେବ ସେଥିପ୍ରତି ଦୃଷ୍ଟି ଦିଅନ୍ତୁ। ପରେ ଶିରା ଥଣ୍ଡା ହେଲା ପରେ ସେଥିରେ ଛଣା ଯାଇଥିବା ଗୋଲାପଜାମୁନ ପକାନ୍ତୁ।
• କିଛି ସମୟ ପର୍ଯ୍ୟନ୍ତ ଏହାକୁ ଶିରାରେ ବୁଡ଼ି ରହିବାକୁ ଦିଅନ୍ତୁ। ତା’ପରେ ତାକୁ ପ୍ଲେଟ୍‌କୁ କାଢ଼ି ଆଣି ଥଣ୍ଡା କରି ଦିଅନ୍ତୁ।

ଏବେ ପ୍ରସ୍ତୁତ ହୋଇଗଲା ସୁଆଦିଆ ଗୋଲାପଜାମୁନ । ଏହି ରେସିପିକୁ ଘରେ ବନେଇ ପୂଜା ପର୍ବପର୍ବାଣିରେ ଠାକୁରଙ୍କୁ ଭୋଗ ଲଗେଇ ପାରିବେ ।