ଦହି ସହ ଖାଆନ୍ତୁ ନାହିଁ ଏହି ଖାଦ୍ୟ, ଉପୁଜିପାରେ ସ୍ୱାସ୍ଥ୍ୟ ସମସ୍ୟା

ଗରମ ଗରମ ଘିଅ ମରା ପରଟାକୁ ଥଣ୍ଡା ଥଣ୍ଡା ଦହି । ଓଃ କି ସ୍ୱାଦ । ଅନେକଙ୍କୁ ଏହି ଯୋଡ଼ି ଖାଦ୍ୟ ଖୁବ୍‌ ପସନ୍ଦ । ଭାରତର ଅନେକ ସ୍ଥାନରେ ଏହା ଏକ ପ୍ରକାର ଦୈନନ୍ଦିନ ଖାଦ୍ୟ କହିଲେ ଚଳେ । କିନ୍ତୁ ଏହା ଯେମିତି ପାଟିକୁ ସ୍ୱାଦିଷ୍ଟ ସ୍ୱାସ୍ଥ୍ୟ ପକ୍ଷେ ସେତିକି କ୍ଷତିକାରକ । ଏକଥା ଆପଣଙ୍କୁ ଆଶ୍ଚର୍ଯ୍ୟ ଲାଗୁଥିଲେ ବି ସତ । ଆପଣ ଭାବୁଥିବେ ଦହି ଖାଇବା ସ୍ୱାସ୍ଥ୍ୟ ପକ୍ଷେ ଖୁବ୍‌ ହିତକର । କାରଣ ଏଥିରେ ରହିଛି ଭିଟାମିନ୍‌ ସି, ପ୍ରୋବାୟୋଟିକ୍‌, ଆଣ୍ଟିଅକ୍ସିଡାଣ୍ଡ ଭଳି ଅନେକ ଗୁରୁତ୍ୱପୂର୍ଣ୍ଣ ତତ୍ୱ । ସେହିଭଳି ଘିଅ ମରା ପରଟା ମଧ୍ୟ ସ୍ୱାସ୍ଥ୍ୟ ପକ୍ଷେ ଭଲ ବୋଲି କୁହାଯାଏ । ଏହା କ୍ଷତିକାରକ କିଭଳି ?

ତେବେ ଶୁଣନ୍ତୁ, ଏହି ଦୁଇଟି ଯାକ ଆଇଟମ୍ ଭିନ୍ନ ଭିନ୍ନ ଥିଲେ ଖୁବ୍‌ ହିତକର । କିନ୍ତୁ ଏହାକୁ ଏକାଠି ଖାଇଲେ ଖୁବ୍‌ କ୍ଷତିକାରକ । ଘିଅ ଓ ଦହି ଶରୀରରେ ମିଶିଲେ ଏହା ଏସିଟିଡି କରିଥାଏ । ଆଉ ତାପରେ ଶରୀରରେ ଅନେକ ପ୍ରକାର ନକରାତ୍ମକ ପ୍ରଭାବ ପଡ଼ିଥାଏ । ଖାଲି ଏସିଡିଟି ନୁହେଁ, ବ୍ଲଟିଂ ହେବା ସହ ପାଚନ ପ୍ରକ୍ରିୟାରେ ସମସ୍ୟା ମଧ୍ୟ ଦେଖାଯାଏ । ତେବେ ଦହି ସହ ଖାଲି ଘିଅ ପରଟା ଖାଇଲେ ଏଭଳି ସମସ୍ୟା ଦେଖାଯାଏ ତାହା ନୁହେଁ, ଦହି ସହ ପିଆଜ ଆମ୍ବ ଭଳି ଖାଦ୍ୟ ଖାଇଲେ ମଧ୍ୟ ତାହା ସମସ୍ୟା ସୃଷ୍ଟି କରିଥାଏ ।

ଖାଦ୍ୟର ଏହି ୬ ଯୋଡ଼ିକୁ ତୁରନ୍ତ କରନ୍ତୁ ଆଭଏଡ୍

ଗୁଡ଼ ସହ ଦହି ମନା

ଗୁଡ଼ ସହ ଦହି ଖାଇବାକୁ ବାରଣ କରାଯାଏ । ଆପଣ ଜାଣିଥିବେ ଗୁଡ଼ ଏକ ସ୍ୱାସ୍ଥ୍ୟକର ଖାଦ୍ୟ । ଚିନି ବଦଳରେ ଲୋକ ଏବେ ଗୁଡ଼ ଆଡ଼କୁ ମୁହାଁଉଛନ୍ତି । କାରଣ ଚିନିଠୁ ଖୁବ୍‌ ସ୍ୱାସ୍ଥ୍ୟକର ହେଉଛି ଗୁଡ଼ । ଅନେକ ଲୋକ ଏବେ ଦୈନନ୍ଦିନ ଖାଦ୍ୟରେ ଚିନି ବଦଳରେ ଗୁଡ଼ ବ୍ୟବହାର କରିବା ଆରମ୍ଭ କଲେ । ଏମିତିକି ଏହା ଏବେ ଟ୍ରେଣ୍ଡ ପାଲଟିଗଲାଣି । ତେବେ ଗୁଡ଼ ସହ ଦହି ଖାଇଲେ ଅନେକ ସମସ୍ୟା ଉପୁଜିବାର ସମ୍ଭାବନା ରହିଛି । ଏହା ଶରୀରରେ ମୋଟା ପଣ ଆଣିଥାଏ ବା ଓଜନ ବଢ଼ାଇଥାଏ । କାରଣ ଗୁଡ଼ ହେଉଛି ଗରମ । ଆଉ ଦହି ହେଉଛି ଥଣ୍ଡା । ଏହି ଦୁଇଟିକୁ ଏକାଠି ଖାଇଲେ ଥଣ୍ଡା କାଶ କଫ ଜ୍ୱର ଆଦି ହେବାର ସମ୍ଭାବନା ରହିଛି । 

କ୍ଷୀର ଓ ଦହି ମନା

ଦୀର୍ଘ ଦିନରୁ ତଥା କାହିଁ କେଉଁ ଅମଳରୁ ଆମେ କ୍ଷୀର ଏବଂ ଦହିକୁ ଏକାଠି ମିଶାଇ ଅନେକ ପ୍ରକାର ଖାଦ୍ୟ ପ୍ରସ୍ତୁତ କରିଥାଉ । ସ୍ୱାସ୍ଥ୍ୟ ବିଶେଷଜ୍ଞ ଆଶୁରୋଷ ଗୌତମଙ୍କ କହିବାନୁଯାୟୀ, ଦହି ସହ କ୍ଷୀର ଖାଇବା ସ୍ୱାସ୍ଥ୍ୟ ପାଇଁ ଅତ୍ୟନ୍ତ ହାନିକାରକ । କାରଣ ଶରୀରରେ ଦହି ସହ କ୍ଷୀର କେବେ ବି ମିଶିନଥାଏ । ଯାହାକି ଶରୀରକୁ ଭିତରୁ ଖରାପ କରିଥାଏ । ଆଉ ଅସୁସ୍ଥ କରିଥାଏ । ଶରୀରରେ ବ୍ଲକେଜ୍‌ ସୃଷ୍ଟି ହୋଇଥାଏ । ଯାହାଦ୍ୱାରା ଇନ୍‌ଫେକ୍ସନ ଭଳି ଭୟଙ୍କର ରୋଗ ହେବା ସହ ପେଟ ସମସ୍ୟା ମଧ୍ୟ ଦେଖାଯାଇଥାଏ । 

ଚା’ ସହ ଦହି ମନା

ଚା’ ସହ ଦହି ଅତ୍ୟନ୍ତ ମାରାତ୍ମକ । ଗୋଟିଏ ଗରମ ଆଉ ଅନ୍ୟଟି ସମ୍ପୂର୍ଣ୍ଣ ଥଣ୍ଡା ଜାତୀୟ । ତେଣୁ ଏହାକୁ ଅଭଏଡ କରିବା ନିହାତି ଜରୁରୀ । ଏହା ମଧ୍ୟ ଶରୀରରେ ମିଶି ପାରିନଥାଏ । ଶରୀରରେ ରକ୍ତ ପ୍ରବାହକୁ ପ୍ରଭାବ ପକାଇଥାଏ । ଏମିତିକି ମେଟାବୋଲିକ୍‌ ସିଷ୍ଟମ ଉପରେ ମଧ୍ୟ ପ୍ରଭାବ ପଡ଼ିଥାଏ ।

ଆମ୍ବ ସହ ଦହି ଖାଇବା ଠିକ୍ ନୁହେଁ

ଯଦି ଆପଣ ଆମ୍ବ ରସରେ ଦହି ମିଶାଇ ପିଉଛନ୍ତି, ତେବେ ଏହାକୁ ତୁରନ୍ତ ବନ୍ଦ କରନ୍ତୁ । ଏହା କେବେ ବି ଉତ୍ତମ ଯୋଡ଼ି ନୁହେଁ । ବିଶେଷଜ୍ଞଙ୍କ କହିବାନୁଯାୟୀ, ଦହିରେ ପଶୁଙ୍କ ପ୍ରୋଟିନ୍‌ ରହିଥାଏ, ଯାହାକି ଫଳ ସସ୍ପର୍ଶରେ ଆସିଲେ ତାହା ବିଷାକ୍ତ ହୋଇଯାଏ । ଏହା ଅଜୀର୍ଣ୍ଣ କରିବା ସହ ଏସିଡିଡି ଭଳି ସମସ୍ୟା ମଧ୍ୟ ସୃଷ୍ଟି କରିଥାଏ ।

ପିଆଜ ସହ ଦହି ମନା

ଅନେକ ଲୋକ ପିଆଜକୁ ଚୁନ୍‌ ଚୁନ୍‌ କରି ଦହିରେ ମିଶାଇ ରାଇତା ବନାଇ ଖାଇବାକୁ ଭଲ ପାଆନ୍ତି । ଏହା ମଧ୍ୟ ଏକ ନିୟମିତ ଖାଦ୍ୟ । ଯେତେବେଳେ ଆମେ ପିଆଜକୁ ରାଇତା ଭଳି ଆଇଟମ୍‌ରେ ଅଧିକ କ୍ରଞ୍ଚି ପାଇଁ ମିଶାଇ ଖାଇବାକୁ ଚାହୁଁଛନ୍ତି ବା ଖାଉଛନ୍ତି । ତେବେ ତାହା ଶରୀର ପାଇଁ ଉଚିତ୍‌ ନୁହେଁ । ଏହା ମଧ୍ୟ ଏକ ରୋଗର କାରଣ ପାଲଟିପାରେ । କାରଣ ପିଆଜ ଏକ ଗରମ ଖାଦ୍ୟ ହୋଇଥିବା ବେଳେ ଦହି ସମ୍ପର୍ଣ୍ଣ ଥଣ୍ଡା ଖାଦ୍ୟ । ଏହାକୁ ଏକାଠି ଖାଇବା ଦ୍ୱାରା ଚର୍ମ ରୋଗ ହେବାର ସମ୍ଭାବନା ରହିଛି । 

ମାଛ ସହ ଦହି ମନା

ଉଭୟ ମାଛ ଏବଂ ଦହି ପ୍ରୋଟିନ୍‌ ଯୁକ୍ତ । ଆଉ ସବୁ ବେଳେ ଦୁଇଟି ପ୍ରୋଟିନ୍‌ ଯୁକ୍ତ ଖାଦ୍ୟ ଏକାଠି ଖାଇବାକୁ ବାରଣ କରାଯାଏ । କାରଣ ଏହା ଶରୀରରେ ଜିର୍ଣ୍ଣ ହେବା ପାଇଁ ଅଧିକ ସମୟ ନେଇଥାଏ । ଏମିତିକି ଏହା ପାଚନତନ୍ତ୍ରକୁ ଖରାପ ମଧ୍ୟ କରିପାରେ ।