କାର୍ତ୍ତିକ ପୂର୍ଣ୍ଣିମାରେ କାହିଁକି ପାଳନ କରାଯାଏ ଦେବ ଦୀପାବଳି

ଦୀପାବଳିର ଠିକ୍ ୧୫ ଦିନ ପରେ ଏବଂ କାର୍ତ୍ତିକ ପୂର୍ଣ୍ଣିମା ଦିନ ଦେବ ଦୀପାବଳି ପାଳନ କରାଯାଏ। ଦେବ ଦୀପାବଳି ଦିନ କାଶୀ ଏବଂ ଗଙ୍ଗା ଘାଟରେ ସ୍ୱତନ୍ତ୍ର ପର୍ବର ଆୟୋଜନ କରାଯାଏ ଏବଂ ଗଙ୍ଗା କୂଳରେ ଅନେକ ଦୀପ ଜଳାଯାଏ। ଦେବ ଦୀପାବଳି ପାଳନ କରିବାକୁ ନେଇ ସାଧାରଣରେ ବିଶ୍ୱାସ ଅଛି ଯେ ଏହି ଦିନ ଦେବଦେବୀମାନେ ମଧ୍ୟ ସ୍ୱର୍ଗଲୋକରୁ ପୃଥିବୀକୁ ଆସି ଦୀପାବଳି ପର୍ବ ପାଳନ କରନ୍ତି।

ଚଳିତ ବର୍ଷ କାର୍ତ୍ତିକ ପୂର୍ଣ୍ଣିମା ଦିନ ଚନ୍ଦ୍ରଗ୍ରହଣ ହେତୁ ଦେବ ଦୀପାବଳି ଦିନକ ପୂର୍ବରୁ ପାଳନ କରାଯାଇଛି। ତେବେ ଆସନ୍ତୁ କାର୍ତ୍ତିକ ପୂର୍ଣ୍ଣିମା ଦିନ ଦେବ ଦୀପାବଳି ପାଳନ ସହ ଜଡିତ କିଛି କିମ୍ବଦନ୍ତୀ ବିଷୟରେ ଜାଣିନେବା।

ଦେବ ଦୀପାବଳି କଥା:

କିମ୍ବଦନ୍ତୀ ଅନୁଯାୟୀ, ତ୍ରିପୁରାସୁରା ନାମକ ଏକ ଅସୁର ପୃଥିବୀର ମଣିଷମାନଙ୍କୁ ଏବଂ ସ୍ୱର୍ଗର ସମସ୍ତ ଦେବତାଙ୍କୁ ଆତଙ୍କିତ କରିଥିଲା। ସମସ୍ତ ଦେବତା ତ୍ରିପୁରାସୁରା ଦ୍ୱାରା ଅସୁବିଧାରେ ପଡ଼ିଥିଲେ। ସେମାନେ ସାହାଯ୍ୟ ପାଇଁ ଭଗବାନ ଶିବଙ୍କ ନିକଟରେ ପହଞ୍ଚି ତ୍ରିପୁରାସୁରାର ଅନ୍ତ ପାଇଁ ପ୍ରାର୍ଥନା କଲେ।

କିମ୍ବଦନ୍ତୀ ଅନୁଯାୟୀ ଭଗବାନ ଶିବ କାର୍ତ୍ତିକ ପୂର୍ଣ୍ଣିମା ଦିନ ଅସୁର ତ୍ରିପୁରାସୁରାକୁ ହତ୍ୟା କରିଥିଲେ। ତ୍ରିପୁରାସୁରର ଅନ୍ତ ହେବା ପରେ ସମସ୍ତ ଦେବତା ଖୁସି ହୋଇ ସ୍ୱର୍ଗରେ ଏକ ଦୀପ ଜାଳିଲେ। ଏହା ପରେ ସମସ୍ତେ କାଶୀକୁ ଆସି ସେଠାରେ ଦୀପ ଜାଳି ଖୁସି ମନେଇଥିଲେ।

ଏହି ଘଟଣା ପରେ କାର୍ତ୍ତିକ ମାସର ପୂର୍ଣ୍ଣିମା ଦିନକୁ ଦେବ ଦୀପାବଳି ଭାବେ କୁହାଗଲା ଏବଂ ଏହି ଦିନ ଦେବ ଦୀପାବଳି ବିଶେଷ ଭାବରେ କାଶୀ ଏବଂ ଗଙ୍ଗା ଘାଟରେ ପାଳନ କରାଯାଏ। ଏହି ଦିନ ଅସୁର ତ୍ରିପୁରାସୁରକୁ ହତ୍ୟା କରାଯାଇଥିବାରୁ କାର୍ତ୍ତିକ ପୂର୍ଣ୍ଣିମାକୁ ତ୍ରିପୁରୀ ପୂର୍ଣ୍ଣିମା ବା ତ୍ରିପୁରାରୀ ପୂର୍ଣ୍ଣିମା ମଧ୍ୟ କୁହାଯାଏ।

କାର୍ତ୍ତିକ ପୂର୍ଣ୍ଣିମାର ମହତ୍ତ୍ୱ:
ହିନ୍ଦୁ ଧର୍ମରେ କାର୍ତ୍ତିକ ପୂର୍ଣ୍ଣିମାକୁ ସବୁଠାରୁ ପବିତ୍ର ଦିନ ବୋଲି ବିବେଚନା କରାଯାଏ। ଏହି ଦିନ ସ୍ନାନ, ଦାନ, ଉପବାସ ଏବଂ ଦୀପ ଦାନର ବିଶେଷ ମହତ୍ତ୍ୱ ରହିଛି। ଏହା ସହିତ କାର୍ତ୍ତିକ ପୂର୍ଣ୍ଣିମା ଅବସରରେ ସୁଖ ସମୃଦ୍ଧି ପାଇଁ ଲକ୍ଷ୍ମୀଙ୍କୁ ଆରାଧନା ମଧ୍ୟ କରାଯାଏ। ଧାର୍ମିକ ବିଶ୍ୱାସ ଅନୁଯାୟୀ ଭଗବାନ ବିଷ୍ଣୁ ଏହିଦିନ ମତ୍ସ୍ୟ ଅବତାର ମଧ୍ୟ ନେଇଥିଲେ।