ମହାପ୍ରଭୁଙ୍କ ଚନ୍ଦନଯାତ୍ରା ପାଇଁ ପ୍ରସ୍ତୁତି ଆରମ୍ଭ

ଆସନ୍ତାକାଲି ପବିତ୍ର ଅକ୍ଷୟ ତୃତୀୟା । ପୁରୀରେ ମହାପ୍ରଭୁଙ୍କ ଚନ୍ଦନଯାତ୍ରା ପାଇଁ ପ୍ରସ୍ତୁତି ଆରମ୍ଭ ହେବ । ମହାପ୍ରଭୁଙ୍କ ଚଳନ୍ତିପ୍ରତିମା ମଦନମୋହନ, ଭୂଦେବୀ, ଶ୍ରୀଦେବୀ ସାଥିରେ ରାମକୃଷ୍ଣ ଏବଂ ପଞ୍ଚୁପାଣ୍ଡବ ଚନ୍ଦନ ପୁଷ୍କରିଣୀରେ ଜଳକ୍ରୀଡା କରିବେ ସେଥିପାଇଁ ବିଶ୍ୱକର୍ମା ସେବକମାନେ ଚନ୍ଦନ ପୁଷ୍କରିଣୀରେ ୨ଟି ଚାପ ନିର୍ମାଣ କରୁଛନ୍ତି ।

ପବିତ୍ର ଅକ୍ଷୟ ତୃତୀୟରୁ ଆରମ୍ଭ ହେବ ଘୋଷଯାତ୍ରାର ରଥକାମ । ସେଥିପାଇଁ ରଥଖଳା ଚଳଚଞ୍ଚଳ ହୋଇ ଉଠିଛି । ସେବାୟତ ଓ ପ୍ରଶାସନ ପ୍ରସ୍ତୁତିରେ ଲାଗିପଡିଛନ୍ତି ।

ମହାପ୍ରଭୁଙ୍କ ଚଳନ୍ତି ପ୍ରତିମା ନନ୍ଦା ଓ ଭଦ୍ରା ଦୁଇଟି ଚାପରେ ବିରାଜମାନ କରିବେ । ୨୧ ଦିନ ଧରି ମହାପ୍ରଭୁଙ୍କ ଚଳନ୍ତି ପ୍ରତିମାଙ୍କ ଜଳକ୍ରିଡା ଚାଲିବ ।

ଅନ୍ୟପକ୍ଷେ, ବୈଶାଖ ମାସର ଶୁକ୍ଳପକ୍ଷର ତୃତୀୟା ତିଥିକୁ ଅକ୍ଷୟା ତୃତୀୟା ଭାବେ ପାଳନ କରାଯାଏ। ଏହିଦିନ କ୍ଷେତରେ ଲକ୍ଷ୍ମୀ ଠାକୁରାଣୀଙ୍କୁ ପୂଜା କରାଯାଇ ବିହନ ବୁଣାଯାଏ। ଏଥି ତିଥିକୁ ବ୍ରତଭାବେ ମଧ୍ୟ ପାଳନ କରାଯାଇଥାଏ ।