LIVE TV
ଚଳିତ ବର୍ଷ ଏପ୍ରିଲ ମାସରେ ପ୍ରଥମ ବିଶ୍ୱସ୍ତରୀୟ ବୌଦ୍ଧ ସମ୍ମିଳନୀ ଅୟୋଜନ କରିବ ଭାରତ । ଏପ୍ରିଲ ୨୦ରୁ ୨୧ ତାରିଖ ମଧ୍ୟରେ ଏହି ସମ୍ମିଳନୀ ଅୟୋଜନ ହେବା ନେଇ ସୂଚନା ଦିଆଯାଇଛି । ନୂଆଦିଲ୍ଲୀର ଅଶୋକ ହୋଟେଲରେ ସମସାମୟିକ ଗ୍ଲୋବାଲ ଚ୍ୟାଲେଞ୍ଜର ମୁକାବିଲା ପାଇଁ ପ୍ରଥମ ଥର ପାଇଁ ବିଶ୍ୱସ୍ତରୀୟ ବୌଦ୍ଧ ସମ୍ମିଳନୀ ଅୟୋଜିତ ହେବାକୁ ଯାଉଛି ।
ଏହି ସମ୍ମିଳନୀର ଆୟୋଜକ ହେଉଛି International Buddhist Confederation (IBC)। ଏହି ସଂସ୍ଥା କେନ୍ଦ୍ର ସଂସ୍କୃତି ମନ୍ତ୍ରଣାଳୟ ଅଧୀନରେ କାର୍ଯ୍ୟ କରୁଛି। ଏହି କାର୍ଯ୍ୟକ୍ରମରେ ସାରା ବିଶ୍ୱ ସାମ୍ନା କରି ଆସୁଥିବା ସବୁଠାରୁ ଗୁରୁତ୍ୱପୂର୍ଣ୍ଣ ଆହ୍ୱାନ ଗୁଡ଼ିକ ସମ୍ପର୍କରେ ଆଲୋଚନା କରାଯିବ ।
ଏଥିସହ ସେଗୁଡ଼ିକର ମୁକାବିଲା ପାଇଁ ଏଥିରେ ଆଲୋଚନା ହେବ । ଆୟୋଜନ ହେବାକୁ ଥିବା ଏହି ସମ୍ମିଳନୀରେ ବିଶ୍ୱର ବହୁ ବିଶିଷ୍ଟ ବ୍ୟକ୍ତି ଅଂଶଗ୍ରହଣ କରିବେ । ଏହି ସମ୍ମିଳନୀରେ ବିଶେଷ କରି ୪ଟି ପ୍ରସଙ୍ଗ ଉପରେ ଆଲୋଚନା କରାଯିବ । ସେଗୁଡ଼ିକ ମଧ୍ୟରେ ରହିଛି- ବୌଦ୍ଧ ଧର୍ମ ଓ ଶାନ୍ତି, ବୌଦ୍ଧ ପରମ୍ପରା, ପରିବେଶ ସଙ୍କଟ ଓ ସ୍ୱାସ୍ଥ୍ୟ ଏବଂ ବୌଦ୍ଧଧର୍ମର ପ୍ରସାର ।
