ଭାଇଚାରାର ପ୍ରତୀକ ମୁନସୀ ମେଲଣ : ଏକାଠି ଫଗୁ ଖେଳିଲେ ଉଭୟ ହିନ୍ଦୁ ଓ ମୁସଲମାନ ଶ୍ରଦ୍ଧାଳୁ

ମୁନସି ମେଲଣ । କେଉଁଠି ଖାକି- ଜନତା ମଧ୍ୟରେ ସୁସଂପର୍କ ସ୍ଥାପନର ମାଧ୍ୟମ । ଆଉ କେଉଁଠି ହିନ୍ଦୁ ମୁସଲମାନ ସଂପ୍ରଦାୟ ମଧ୍ୟରେ ଭାଇଚାରାର ପ୍ରତୀକ ଏହି ମୁନସୀ ମେଲଣ । ଦୀର୍ଘ ୭୮ ବର୍ଷ ଧରି ଭଦ୍ରକ ଜିଲ୍ଲା ଭଣ୍ଡାରିପୋଖରୀ ଥାନା ପକ୍ଷରୁ ମୁନସୀ ମେଲଣ ପାଳିତ ହୋଇ ଆସୁଥିବା ବେଳେ ଯାଜପୁର କୋରେଇରେ ମଧ୍ୟ ବେଶ୍ ପୁରୁଣା ପରମ୍ପରା ପାଲଟିଛି । ଯାହାକୁ ଉପଭୋଗ କରନ୍ତି ଶହ ଶହ ସଂଖ୍ୟାରେ ଶ୍ରଦ୍ଧାଳୁ ।

ଚଳିତ ବର୍ଷ ଥାନା ପକ୍ଷରୁ ଆଖପାଖ ଅଞ୍ଚଳର ୪୦ରୁ ଅଧିକ ଠାକୁରବାଡିଆଙ୍କୁ ନୀତି ଅନୁଯାୟୀ ମେଲଣ ଉତ୍ସବକୁ ନିମନ୍ତ୍ରଣ କରାଯାଇଥିଲା । ଠାକୁର ବାଡିଆମାନେ ରାଧାକୃଷ୍ଣଙ୍କୁ ସୁସଜ୍ଜିତ ବିମାନରେ ଶୋଭାଯାତ୍ରାରେ ବାହାରି ପହଞ୍ଚିଥିଲେ । ଏହାପରେ ଆରମ୍ଭ ହୋଇଥିଲା ନୀତିକାନ୍ତି । ପୁଲିସ ଓ ଜନତାଙ୍କ ମଧ୍ୟରେ ରଙ୍ଗଖେଳର ପରମ୍ପରା ହେଉଛି ଏହି ମେଲଣର ସ୍ୱତନ୍ତ୍ରତା । କୋଭିଡ ସ୍ଥିତିରେ ସୁଧାର ଆସିଥିବାରୁ ହଜାର ହଜାର ଦର୍ଶକ ଏହି ମେଳଣ ଉତ୍ସବରେ ସାମିଲ ହୋଇଥିଲେ । ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରିଯିବା ସହ ଆୟୋଜକଙ୍କ ପକ୍ଷରୁ ସାଂସ୍କୃତିକ କାର୍ଯ୍ୟକ୍ରମର ମଧ୍ୟ ଆୟୋଜନ କରାଯାଇଥିଲା ।

ସେପଟେ ଯାଜପୁର ଜିଲ୍ଲା କୋରେଇରେ ମଧ୍ୟ ପାଳିତ ହୋଇଛି ମୁନସୀ ମେଲଣ । ହିନ୍ଦୁ ମୁସଲମାନ ସଂପ୍ରଦାୟ ମଧ୍ୟରେ ଭାଇଚାରାରର ପ୍ରତୀକ ଏହି ମୁନସୀ ମେଲଣ । ଗାଁକୁ ଗାଁ ବିମାନରେ ବିଜେ ହୋଇ ରାଧାକୃଷ୍ଣ ବୁଲିବା ସହ ରଙ୍ଗବେରଙ୍ଗ ଅବିରରେ ହୋଲି ଖେଳିଛନ୍ତି ଦୋଳ ଗୋବିନ୍ଦ । ୩୦ରୁ ଅଧିକ ସୁସଜ୍ଜିତ ରାଧାକୃଷ୍ଣ ବିମାନ ଏଠାରେ ଏକାଠି ହେବାସହ ଫଗୁ ଖେଳକୁ ଉପଭୋଗ କରିଥିଲେ ଉଭୟ ହିନ୍ଦୁ ଓ ମୁସଲମାନ ଶ୍ରଦ୍ଧାଳୁ । ଏଠାରେ ମଧ୍ୟ ପୋଲିସ ଓ ସାଧାରଣ ଲୋକଙ୍କ ମଧ୍ୟରେ ସୁସଂପର୍କ ସ୍ଥାପନ ପାଇଁ କୋରେଇ ପୋଲିସ ପକ୍ଷରୁ ପ୍ରତିବର୍ଷ ଏହି ମୁନସୀ ମେଲଣ ଆୟୋଜନ କରାଯାଉଛି । ଏହି ଅବସରରେ ମେଳା ବସିବା ସହ ପାରମ୍ପରିକ ନାଚ ଓ ବାଡି ଖେଳ ଦେଖିବାକୁ ମିଳିଥିଲା ।

ଭଦ୍ରକରୁ ପାର୍ଥସାରଥୀ ନାୟକ ଏବଂ ଯାଜପୁରରୁ ଜନ୍ମେଜୟ ଦାଶଙ୍କ ରିପୋର୍ଟ