ପଞ୍ଚୁକ ପ୍ରଥମ ଦିନ: ଜଗାର ଲକ୍ଷ୍ମୀନାରାୟଣ ବେଶ, ବାବା ଧବଳେଶ୍ୱରଙ୍କ ଚନ୍ଦ୍ରମଉଳି ବେଶ

ଧର୍ମମାସ କାର୍ତ୍ତିକର ଆଜି ବଡ ଏକାଦଶି ତିଥି । ପବିତ୍ର ପଞ୍ଚକର ପ୍ରଥମ ଦିନ । ଏହି ଅବସରରେ ଶ୍ରୀଜୀଉଙ୍କ ଲକ୍ଷ୍ମୀନାରାୟଣ ବେଶ ଦର୍ଶନ କରିବାକୁ ଶ୍ରୀମନ୍ଦିରରେ ନାହିଁ ନଥିବା ଗହଳି ଦେଖିବାକୁ ମିଳିଛି । ବାରମ୍ବାର ଖବର ପ୍ରସାରଣ ପରେ ବରିଷ୍ଠ ନାଗରିକଙ୍କ ବ୍ୟାରିକେଡ୍ ଯନ୍ତ୍ରଣାକୁ ପ୍ରଶମିତ କରିବାକୁ ପ୍ରଶାସନ ପକ୍ଷରୁ ପଦକ୍ଷେପ ନିଆଯାଇଥିଲେ ବି ତାହା ମଧ୍ୟ ପର୍ଯ୍ୟାପ୍ତ ହୋଇ ନଥିବା ଅଭିଯୋଗ ହୋଇଛି ।

ପବିତ୍ର ପଞ୍ଚକର ପ୍ରଥମ ଦିନରେ ଗୋଟେ ପଟେ ଜଗା ଦୁଆରରେ ଦର୍ଶନାଭିଳାଷୀ ଭକ୍ତଙ୍କ ଲମ୍ବା ଲାଇନ୍ ଆର ପଟେ ପ୍ରଭୁଙ୍କ ନାମ ସଂକୀର୍ତ୍ତନ, ନୃତ୍ୟଗୀତ ସହ ଭାବ ଭକ୍ତିରେ ବୁଡ଼ିଯାଇଛି ପୁରୀ ବଡ଼ଦାଣ୍ଡ । କାହିଁକିନା ଆଜି ପଞ୍ଚୁକର ପ୍ରଥମ ଦିନରେ ଭକ୍ତଙ୍କୁ ଲକ୍ଷ୍ମୀନାରାୟଣ ବେଶରେ ଦର୍ଶନ ଦେଉଥିଲେ କଳାଠାକୁର । ସେଇଥିପାଇଁ କିଏ ମୁଣ୍ଡରେ ତୁଳସୀ ଚଉରା ଧରି ନାଚୁଥିଲେ ତ କିଏ ରାଧା ତ କିଏ କୃଷ୍ଣ ବେଶରେ ସଜେଇ ବିଭୁ ପ୍ରେମରେ ମଜ୍ଜିଥିଲେ ।

ବିଶ୍ୱାସ ରହିଛି ଶ୍ରୀଜୀଉଙ୍କ ଦ୍ୱାଦଶ ଯାତ୍ରା ମଧ୍ୟରୁ ଅନ୍ୟତମ ପଞ୍ଚୁକ ଯାତ୍ରାର ସମୟରେ ମହାପ୍ରଭୁଙ୍କୁ ଦର୍ଶନ କଲେ କୋଟି ପୂଣ୍ୟ ମିଳିଥାଏ । ତେଣୁ ଦର୍ଶନ ପାଇଁ ପୂର୍ବଦିନ ଅପେକ୍ଷା ଭିଡ଼ ଅଧିକ ଥିଲା । ଭକ୍ତଙ୍କ ବ୍ୟାରିକେଡ୍ ଯନ୍ତ୍ରଣାର ଦୃଶ୍ୟ ବାରମ୍ବାର ସାମ୍ନାକୁ ଆସିବା ପରେ ଦର୍ଶନ ବ୍ୟବସ୍ଥାରେ ସୁଧାର ଆଣିବାକୁ ପ୍ରଶାସନ ପକ୍ଷରୁ ତତ୍ପରତା ଦେଖିବାକୁ ମିଳିଥିଲା ।

ବ୍ୟାରିକେଡକୁ ଟାଉନ୍ ଥାନା ପର୍ଯ୍ୟନ୍ତ ବଢ଼ାଯାଇ ବରିଷ୍ଠ ନାଗରିକଙ୍କ ଦର୍ଶନ ପାଇଁ ସ୍ୱେଚ୍ଛାସେବୀଙ୍କୁ ନିୟୋଜିତ କରାଯାଇଥିଲା । ଅନେକ ଦିବ୍ୟାଙ୍ଗ ଏବଂ ବୃଦ୍ଧ, ବୃଦ୍ଧାଙ୍କୁ ଧାଡ଼ିରୁ ବାହାର କରି ଶ୍ରୀମନ୍ଦିରକୁ ନିଆଯାଉଥିଲା । ଖୋଦ ଏସପି ବି ବୁଲି ବୁଲି ବ୍ୟାରିକେଡ୍ ବ୍ୟବସ୍ଥାର ତଦାରଖ କରୁଥିଲେ । ହେଲେ ଦର୍ଶନ ପାଇଁ ଏସବୁ ପଦକ୍ଷେପ ଯେ ସମୁଦ୍ରକୁ ଶଙ୍ଖେ, ତାହା ଏ ଦୃଶ୍ୟ ଓ ଭକ୍ତଙ୍କ ପ୍ରତିକ୍ରିୟାରୁ ଜଳ ଜଳ ଦିଶୁଥିଲା । ବରିଷ୍ଠ ନାଗରିକଙ୍କ ପାଇଁ ସ୍ୱତନ୍ତ୍ର ଧାଡ଼ିର ବ୍ୟବସ୍ଥା ଥିବା

କୁହଯାଉଥିଲା ବେଳେ ବାସ୍ତବରେ କିନ୍ତୁ ତାର ଚିହ୍ନବର୍ଣ୍ଣ ଦେଖି ପାରୁ ନଥିବା ଅଭିଯୋଗ କରିଥିଲେ ଦର୍ଶନାର୍ଥୀ । କେବଳ ସେତିକି ନୁହେଁ ପଞ୍ଚୁକ ପାଞ୍ଚଦିନ ଯାକ ଭିତର କାଠ ପରିବର୍ତ୍ତେ ବାହାର କାଠ ନିକଟରୁ କରାଯାଇଥିବା ଦର୍ଶନ ବ୍ୟବସ୍ଥା ବି ଅନେକଙ୍କୁ ଅସନ୍ତୁଷ୍ଟ କରିଛି ।

ଏପଟେ କଟକର ପ୍ରସିଦ୍ଧ ବାବା ଧବଳେଶ୍ୱରଙ୍କ ପୀଠରେ ପଞ୍ଚୁକର ପ୍ରଥମ ଦିନରେ ଧବଳେଶ୍ୱରଙ୍କ ଚନ୍ଦ୍ରମଉଳି ବେଶ ଦର୍ଶନ ପାଇଁ ନାହିଁ ନଥିବା ଭିଡ଼ ଦେଖିବାକୁ ମିଳିଥିଲା ପୀଠରେ । ଶ୍ରୀମନ୍ଦିରରେ ମହାପ୍ରଭୁ ଆଜି ଲକ୍ଷ୍ମୀ ନାରାୟଣ ବେଶରେ ଭକ୍ତଙ୍କୁ ଦର୍ଶନ ଦେଇଥିବା ବେଳେ ଆସନ୍ତାକାଲି ଦ୍ୱାଦଶୀରେ ବାଙ୍କଚୁଡ ବେଶରେ ଦର୍ଶନ ଦେବେ ।