କାଲି ରାଜ୍ୟରେ ପାଳନ ହେବ ରଙ୍ଗର ପର୍ବ ହୋଲି, ଫଗୁ ଅବିରରେ ରଙ୍ଗିନ ହେବ ଗାଁଠୁ ସହର

ଦୋଳ ବେଦୀରେ ଚଳନ୍ତି ଜଗନ୍ନାଥ ଦୋଳ ଗୋବିନ୍ଦ । ଘଣ୍ଟ ଘଣ୍ଟା, ଖୋଳ କରତାଳ, ନାମ ସଂକୀର୍ତ୍ତନ ଓ ମୃଦଙ୍ଗ ନାଦ ସହ ବର୍ଷୁଛି ଅବିର, ବର୍ଷୁଛି ରଙ୍ଗ । ଭିଜୁଛି ଭକ୍ତ, ଭିଜୁଛନ୍ତି ଭଗବାନ। ପୁରୀ ଶ୍ରୀକ୍ଷେତ୍ରରେ ଆୟୋଜିତ ହୋଇଛି ମହାପ୍ରଭୁଙ୍କ ଦୋଳ ଉତ୍ସବ ନୀତି । ବିମାନରେ ବିରାଜିତ ହୋଇ ଦୋଳବେଦୀକୁ ଯିବା ବାଟରେ ଅବିର ଖେଳରେ ଭକ୍ତଙ୍କ ସହ ଏକାକାର ହୋଇଛନ୍ତି ଭଗବାନ । ରାଜ୍ୟପାଳ ରଘୁବର ଦାସ ବି ମହାପ୍ରଭୁଙ୍କୁ ଦର୍ଶନ କରିବା ପୂର୍ବରୁ ସିଂହଦ୍ୱାର ସାମ୍ନାର ଏ ଅପୂର୍ବ ଦୃଶ୍ୟ ଦେଖି ବିହ୍ୱଳ ହୋଇଛନ୍ତି। ଏଣେ ସିଂହାସନରେ ଶ୍ରୀଜୀଉଙ୍କୁ ସୁନାବେଶରେ ଦର୍ଶନ କରି କୃତ୍ୟ କୃତ୍ୟ ହୋଇଛନ୍ତି ଭକ୍ତ।

କେବଳ ଶ୍ରୀକ୍ଷେତ୍ର ନୁହେଁ, ଫଗୁର ଫୁଆରାରେ ଫଗୁଣ ହୋଇଛି ରଙ୍ଗୀନ । ବିମାନରେ ବସି ଗାଁକୁ ଗାଁ, ସାହିକୁ ସାହି ବୁଲିଛନ୍ତି ରାଧାକୃଷ୍ଣ । ହେଲେ କଟକ ମାହାଙ୍ଗାର ଓଳକଣାର ଏ ମେଲଣ ପର୍ବ କିନ୍ତୁ ବେଶ୍ ନିଆରା । କାରଣ ଏଠି ଭକ୍ତମାନେ ନିଜ ହାତରେ ରାଧାକୃଷ୍ଣଙ୍କୁ ଭୋଗ ଲଗାନ୍ତି। ସେହିପରି ବଲାଙ୍ଗିରରେ ଯାଦବଙ୍କ ବାଡ଼ିଖେଳ ଓ କଟକ ଆଠଗଡ଼ ଗଡ଼ଜାତରେ ରାଜଦୋଳ ସହ ଅଗ୍ନି ଉତ୍ସବରେ ମଜିଛନ୍ତି ଭକ୍ତ ଓ ଦେଖଣାହାରୀ ।

ଏପଟେ ରଙ୍ଗର ପର୍ବ ହୋଲିକୁ ନେଇ ଝୁମି ଆସିଲାଣି ପରିବେଶ। ରଙ୍ଗ ଓ ଫଗୁର ପସରାରେ ଭରି ଗଲାଣି ଦୋକାନବଜାର। ତେବେ ରାସାୟନିକ ରଙ୍ଗ ଅପେକ୍ଷା, ହର୍ବାଲ୍ କଲର କିଣିବାକୁ ଅଧିକ ପସନ୍ଦ କରୁଛନ୍ତି ଗ୍ରାହକ।

ଅପରପକ୍ଷେ ସମଗ୍ର ଉତ୍ତର ଓ ଦକ୍ଷିଣ ଭାରତରେ ଆଜି ଖୁବ୍ ଧୁମ୍‌ଧାମରେ ପାଳନ ହୋଇଛି ହୋଲି । ୨୪ ନିର୍ବାଚନୀ ପାଗଭିଡ଼ା ଭିତରେ ରାଜନୀତିରେ ବି ଲାଗିଛି ରଙ୍ଗର ଛିଟା । ପର୍ବ ପାଳନରେ ଏକାକାର ହୋଇଛନ୍ତି ନେତା ଜନତା । ଗୁଜରାଟ ଗାନ୍ଧିନଗରରେ ବିଜେପି ପକ୍ଷରୁ ଆୟୋଜିତ ସ୍ୱତନ୍ତ୍ର ହୋଲି ଉତ୍ସବରେ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହ ସାମିଲ ହୋଇଥିଲା ବେଳେ ନୂଆଦିଲ୍ଲୀ ସ୍ଥିତ ନିଜ ବାସଭବନରେ ହୋଲି ମନାଇଛନ୍ତି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡା।