The Bengal Files:‘ଦି କାଶ୍ମୀର ଫାଇଲ୍ସ’ ପରେ ‘ଦି ବେଙ୍ଗଲ ଫାଇଲ୍ସ’, ଟ୍ରେଲର ଲଞ୍ଚରୁ ଆରମ୍ଭ ହେଲା ହଙ୍ଗାମା

ଫିଲ୍ମ ନିର୍ମାତା ବିବେକ ରଞ୍ଜନ ଅଗ୍ନିହୋତ୍ରୀ ତାଙ୍କ ଫିଲ୍ମଗୁଡିକ ପାଇଁ ସର୍ବଦା ଚର୍ଚ୍ଚାରେ ରହିଥାନ୍ତି। ‘ଦି କାଶ୍ମୀର ଫାଇଲ୍ସ’ ପରେ ଏବେ ତାଙ୍କର ନୂଆ ଫିଲ୍ମ ‘ଦି ବେଙ୍ଗଲ ଫାଇଲ୍ସ’ର ଟ୍ରେଲର ରିଲିଜ୍ ହୋଇଛି, ଯାହା ଆସିବା ମାତ୍ରେ ହିଁ ଖବରରେ ଛାଇ ଯାଇଛି। ଏଥର କାହାଣୀ ବଙ୍ଗଳା ବିଭାଜନ ସହ ଜଡ଼ିତ ଦୁଃଖଦ ଘଟଣା ଉପରେ ଆଧାରିତ, ଯେଉଁଥିରେ ହିନ୍ଦୁମାନଙ୍କ ନରସଂହାରକୁ ବଡ଼ ପରଦାରେ ଉପସ୍ଥାପନ କରାଯାଇଛି।

ଫିଲ୍ମର ଟ୍ରେଲରରେ ସବୁଠାରୁ ଅଧିକ ଧ୍ୟାନ ଆକର୍ଷଣ କରୁଛନ୍ତି ଅନୁପମ ଖେର, ଯିଏ ମହାତ୍ମା ଗାନ୍ଧୀଙ୍କ ଭୂମିକାରେ ଅଭିନୟ କରୁଛନ୍ତି। ସେହିପରି ମିଥୁନ ଚକ୍ରବର୍ତୀ, ପଲ୍ଲବୀ ଯୋଶୀ ଏବଂ ଦର୍ଶନ କୁମାର ପରି କଳାକାରମାନେ ନିଜ ନିଜ ଚରିତ୍ରରେ ଅତ୍ୟନ୍ତ ଦମଦାର ଦେଖା ଯାଉଛନ୍ତି। ଏହା ବ୍ୟତୀତ ଟିଭି ଶୋ ‘ଅନୁପମା’ ମାଧ୍ୟମରେ ପରିଚିତି ହାସଲ କରିଥିବା ମଦାଲସା ଶର୍ମା ଏବଂ ‘ଗଦର ୨’ ଫେମ ସିମରତ କୌର ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିବେ।

୧୬ ଅଗଷ୍ଟରେ କୋଲକାତାରେ ଟ୍ରେଲର ଲଞ୍ଚ ଆୟୋଜନ ହୋଇଥିଲା। ତେବେ ଏହି ସମୟରେ ମାହୋଲ ଉତ୍ତେଜନାପୂର୍ଣ୍ଣ ହୋଇ ପଡ଼ିଥିଲା। ରିପୋର୍ଟ ଅନୁଯାୟୀ, ଇଭେଣ୍ଟ ଆରମ୍ଭ ହେବାକୁ ଥିବା ବେଳେ କିଛି ବିକ୍ଷୋଭକାରୀ ହଙ୍ଗାମା କରିଥିଲେ । ଏପରିକି ହୋଟେଲ ଭିତରେ ବିଦ୍ୟୁତ ସଂଯୋଗ କାଟି ଦିଆଯାଇଥିଲା ଯାହା ଦ୍ୱାରା ଲଞ୍ଚକୁ ରୋକାଯାଇ ପାରିବ।

ବିବେକ ଅଗ୍ନିହୋତ୍ରୀ ଏହାକୁ ସିଧାସଳଖ “ତାନାଶାହୀ” ବୋଲି ଅଭିହିତ କରି କହିଥିଲେ ଯେ ତାଙ୍କ କଣ୍ଠସ୍ୱରକୁ ଦବାଇବାକୁ ଚେଷ୍ଟା କରାଯାଉଛି। ସେ ସ୍ପଷ୍ଟ ଭାବେ କହିଥିଲେ ଯେ “ଟ୍ରେଲର କୋଲକାତାରେ ହିଁ ଲଞ୍ଚ ହେବ ଏବଂ କେହି ଆମକୁ ଅଟକାଇ ପାରିବେ ନାହିଁ।”

ଫିଲ୍ମଟି ମହାତ୍ମା ଗାନ୍ଧୀ ଏବଂ ମହମ୍ମଦ ଅଲ୍ଲୀ ଜିନ୍ନାଙ୍କ ମଧ୍ୟରେ ହୋଇଥିବା ବିତର୍କକୁ ମଧ୍ୟ ଉଜାଗର କରୁଛି। ରକ୍ତପାତ, ଧର୍ମ ନାମରେ ହୋଇଥିବା ଯୁଦ୍ଧ ଏବଂ ହଜାର ହଜାର ନିରୀହ ଲୋକଙ୍କ ମୃତ୍ୟୁକୁ ପରଦାରେ ଆଣିବାର ଚେଷ୍ଟା କରାଯାଇଛି। ଏହି ଫିଲ୍ମଟି ଅଭିଷେକ ଅଗ୍ରୱାଲ, ପଲ୍ଲବୀ ଯୋଶୀ ଏବଂ ବିବେକ ରଞ୍ଜନ ଅଗ୍ନିହୋତ୍ରୀଙ୍କ ଦ୍ୱାରା ପ୍ରଯୋଜନା କରାଯାଇଛି।

‘ଦି ବେଙ୍ଗଲ ଫାଇଲ୍ସ’ ୬ ସେପ୍ଟେମ୍ବର ୨୦୨୫ରେ ସିନେମା ହଲ୍‌ରେ ରିଲିଜ୍ ହେବ। ଟ୍ରେଲରରୁ ହିଁ ଅନୁମାନ କରାଯାଇ ପାରେ ଯେ ଏହି ଫିଲ୍ମ ପୁଣି ଥରେ ଦେଶବ୍ୟାପୀ ବିତର୍କ ଏବଂ ଚର୍ଚ୍ଚାକୁ ଜନ୍ମ ଦେବ।

ଅଧିକ ପଢ଼ନ୍ତୁ: ଆମ ମୁଣ୍ଡ ଖରାପ ହେଲେ ବ୍ରହ୍ମୋସ ଛାଡିଦେବୁ: ପାକିସ୍ତାନକୁ ଖୋଲା ଚେତାବନୀ ଦେଲେ ମିଥୁନ