LIVE TV
ସ୍ୱାଧୀନତା ଦିବସ ଅବସରରେ ଅଭିନେତ୍ରୀ ଶ୍ରଦ୍ଧା କପୁର ଏବଂ ରାଜକୁମାର ରାଓଙ୍କ ଫିଲ୍ମ 'ସ୍ତ୍ରୀ ୨' ପ୍ରେକ୍ଷାଳୟକୁ ଆସିଛି। ଏହି ଚଳଚ୍ଚିତ୍ର ଦର୍ଶକ ଏବଂ ସମାଲୋଚକଙ୍କ ଠାରୁ ଜବରଦସ୍ତ ପ୍ରତିକ୍ରିୟା ପାଇବାରେ ଲାଗିଛି। ଅପାରଶକ୍ତି ଖୁରାନା, ଅଭିଷେକ ବାନାର୍ଜୀ ଏବଂ ପଙ୍କଜ ତ୍ରିପାଠୀଙ୍କ ପରି କଳାକାରମାନେ ଅମର କୌଶିକଙ୍କ ନିର୍ଦ୍ଦେଶିତ 'ସ୍ତ୍ରୀ ୨'ରେ ନଜର ଆସିଛନ୍ତି।
ଅଧିକ ପଢନ୍ତୁ : Emergency Trailer: ରିଲିଜ୍ ହେଲା ‘ଏମର୍ଜେନ୍ସୀ’ ଟ୍ରେଲର; ଜରୁରୀକାଳୀନ ପରିସ୍ଥିତିର ଭୟଙ୍କର ଦୃଶ୍ୟ ଦେଖାଇବାକୁ ଆସୁଛନ୍ତି କଙ୍ଗନା
Also Read
ଫିଲ୍ମଟି ବକ୍ସ ଅଫିସରେ ୬୦.୩ କୋଟି ଟଙ୍କା ସହିତ ବହୁତ ଭଲ ଆରମ୍ଭ କରିଛି। 'କଲ୍କୀ ୨୮୯୮ ଏଡି' (ହିନ୍ଦୀ) ଏବଂ 'ଫାଇଟର୍'କୁ ପଛରେ ପକାଇ 'ସ୍ତ୍ରୀ ୨' ୨୦୨୪ର ସବୁଠାରୁ ବଡ ଓପନିଂ ଚଳଚ୍ଚିତ୍ର ହୋଇପାରିଛି।
ବୁଧବାର 'ସ୍ତ୍ରୀ ୨'ର ଏକ ସ୍ୱତନ୍ତ୍ର ଉଦଘାଟନୀ ପ୍ରିମିୟର୍ ହୋଇଥିଲା, ଯେଉଁଥିରେ ଫିଲ୍ମ ୮.୫ କୋଟି ଟଙ୍କା ରୋଜଗାର କରିଥିଲା। ଏହି ଚଳଚ୍ଚିତ୍ରଟି ଗୁରୁବାର ଦିନ ୫୧.୮ କୋଟି ଟଙ୍କା ସହ ଓପେନିଂ କରି ମୋଟ ୬୦.୩ କୋଟି ଟଙ୍କା ରୋଜଗାର କରିଛି। ଏହି ଚଳଚ୍ଚିତ୍ରଟି ହେଉଛି 'ସ୍ତ୍ରୀ'ର ସିକ୍ୱେଲ୍ ଯାହା ୨୦୧୮ରେ ମୁକ୍ତିଲାଭ କରିଥିଲା । 'ସ୍ତ୍ରୀ ୨' ମଧ୍ୟ 'ସ୍ତ୍ରୀ'କୁ ପଛରେ ପକେଇଦେଇଛି।
ଶାହରୁଖଙ୍କ 'ପଠାନ' ମଧ୍ୟ ପଛରେ ପଡିଲା:
ଏହି ଚଳଚ୍ଚିତ୍ରଟି ଶାହରୁଖ ଖାନଙ୍କ 'ପଠାନ'କୁ ବି ପଛରେ ପକେଇ ଦେଇଛି। ‘ପଠାନ୍’ ୫୫ କୋଟି ଟଙ୍କା ସହିତ ଓପେନିଂ କରିଥିଲା। ଗତ ବର୍ଷ ଶାହରୁଖଙ୍କ 'ଜବାନ' ପରେ ବର୍ତ୍ତମାନ ହିନ୍ଦୀ ଚଳଚ୍ଚିତ୍ର ପାଇଁ 'ସ୍ତ୍ରୀ ୨' ସବୁଠୁ ବଡ ଓପନିଂ ଫିଲ୍ମ ହୋଇପାରିଛି।
ବକ୍ସ ଅଫିସରେ ସଂଘର୍ଷ:
ଅମର କୌଶିକଙ୍କ ନିର୍ଦ୍ଦେଶିତ 'ସ୍ତ୍ରୀ ୨'ରେ ରାଜକୁମାର ରାଓ ଏବଂ ଶ୍ରଦ୍ଧା କପୁର ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିଛନ୍ତି। ଏହି ଫିଲ୍ମରେ ଶ୍ରଦ୍ଧା କପୁରଙ୍କ ଅଭିନୟକୁ ବହୁତ ପ୍ରଶଂସା କରାଯାଉଛି। ଏହି ଚଳଚ୍ଚିତ୍ରରେ ବରୁଣ ଧାୱନଙ୍କୁ 'ଭେଡିୟା' ଭାବରେ ଏକ କୈମୋ କରୁଥିବା ଦେଖିବାକୁ ମିଳେ। ବକ୍ସ ଅଫିସରେ ଅକ୍ଷୟ କୁମାରଙ୍କ 'ଖେଲ୍ ଖେଲ୍ ମେଁ' ଏବଂ ଜନ୍ ଅବ୍ରାହାମଙ୍କ 'ବେଦା' ସହିତ 'ସ୍ତ୍ରୀ ୨' ସଂଘର୍ଷ କରୁଛି।
‘ସ୍ତ୍ରୀ ୨’ର ଆଡଭାନ୍ସ ବୁକିଂ ଆଶ୍ଚର୍ଯ୍ୟଜନକ ଥିଲା। ଏହି ଫିଲ୍ମଟି ପ୍ରଥମ ଦିନରେ ଜାତୀୟ ମଲ୍ଟିପ୍ଲେକ୍ସରେ ୩,୯୨,୦୦୦ ଟିକେଟ୍ ବିକ୍ରି କରିଥିଲା, ଯାହା ବଲିଉଡର କିଛି ବଡ ବଡ ବ୍ଲକବଷ୍ଟରକୁ ମଧ୍ୟ ଅତିକ୍ରମ କରିଥିଲା। ପ୍ରଥମ ଦିନରେ ୭୫.୦୯ ପ୍ରତିଶତ ସ୍ଥାନ ଅଧିକାର କରିବା ସହ ଫିଲ୍ମର ସଫଳତା ହରର୍-କମେଡିର ଯାଦୁକୁ ପ୍ରମାଣିତ କରିଛି।
ଅଧିକ ପଢନ୍ତୁ : 'ସ୍ତ୍ରୀ ୨' ରିଲିଜ୍ ନ ହେଉଣୁ କଲାଣି ହଲ୍ଚଲ୍; ରୋଜଗାରରେ ଭାଙ୍ଗିଲାଣି ରେକର୍ଡ
ସମାଲୋଚକଙ୍କ ପ୍ରଶଂସା:
‘ସ୍ତ୍ରୀ ୨’କୁ କେବଳ ଦର୍ଶକମାନେ ପସନ୍ଦ କରୁ ନାହାନ୍ତି ବରଂ ଫିଲ୍ମଟି ସମାଲୋଚକଙ୍କ ପ୍ରଶଂସା ମଧ୍ୟ ପାଉଛି। ଶ୍ରଦ୍ଧା କପୁର ଏବଂ ରାଜକୁମାର ରାଓଙ୍କ ଉତ୍କୃଷ୍ଟ ଅଭିନୟକୁ ପ୍ରଶଂସା କରାଯାଉଛି। ଶ୍ରଦ୍ଧାଙ୍କ ଆକ୍ସନ୍-ପ୍ୟାକ୍ ପ୍ରଦର୍ଶନ ଏକ ମୁଖ୍ୟ ଆକର୍ଷଣ ହୋଇଛି। ଏହାର ରେକର୍ଡ ଭଙ୍ଗା ଆରମ୍ଭ ଏବଂ ସକରାତ୍ମକ ସ୍ୱାଗତ ସହିତ, ‘ସ୍ତ୍ରୀ ୨’ ବକ୍ସ ଅଫିସରେ ବିଜୟର ଧାରା ଜାରି ରଖିବାକୁ ପ୍ରସ୍ତୁତ।
‘ସ୍ତ୍ରୀ ୨’ର ବଜେଟ୍:
ରିପୋର୍ଟ ଅନୁସାରେ ‘ସ୍ତ୍ରୀ ୨’ ପାଖାପାଖି ୬୦ କୋଟି ଟଙ୍କାରେ ତିଆରି ହୋଇଛି। ଏଥିରୁ ଲାଗୁଛି ଏହା ତା’ର ମୂଳ ଧନ ଉଠେଇସାରିଲାଣି। ତେବେ ସପ୍ତାହ ଶେଷ ପାଇଁ ଏକ ଅପେକ୍ଷା ଅଛି, ଯେଉଁଥିରେ ଫିଲ୍ମର ରୋଜଗାରରେ ଏକ ଦମଦାର ତରଙ୍ଗ ଦେଖିବାକୁ ମିଳିପାରେ।
