Shahrukh Khan: ‘ମନ୍ନତ’କୁ ନେଇ ଅଡୁଆରେ ଶାହରୁଖ ଖାନ୍; ହୋଇଛି ନିୟମର ଉଲ୍ଲଂଘନ

ନିକଟରେ ଶାହରୁଖ ଖାନ ତାଙ୍କ ଘର ‘ମନ୍ନତ’ ଖାଲି କରିଥିଲେ। ବର୍ତ୍ତମାନ ଏହାର ନବୀକରଣ କରାଯାଉଛି। ଗ୍ରୀଷ୍ମ ସୁଦ୍ଧା ଏହାକୁ ସମ୍ପୂର୍ଣ୍ଣ ରୂପେ ନବୀକରଣ କରିବାକୁ ପଡିବ। କିନ୍ତୁ ନବୀକରଣ କାମକୁ ନେଇ ଏକ ବିବାଦ ଆରମ୍ଭ ହୋଇଛି। ଜଣେ ସାମାଜିକ କର୍ମୀ ନବୀକରଣ ସମୟରେ ନିୟମ ଉଲ୍ଲଂଘନ କଥା ଉଠାଇଛନ୍ତି।

ଏଥିରେ ଉଦ୍‌ବେଗ ପ୍ରକାଶ କରି କାମ ବନ୍ଦ କରିବାକୁ ସେ ନ୍ୟାସନାଲ ଗ୍ରୀନ୍ ଟ୍ରିବ୍ୟୁନାଲ (NGT)କୁ ଦାବି କରିଛନ୍ତି। ନବୀକରଣ ପାଇଁ ଉପଯୁକ୍ତ ଅନୁମତି ନିଆଯାଇ ନ ଥିବା ସେ ଅଭିଯୋଗ କରିଛନ୍ତି। ଏହି ସାମାଜିକ କର୍ମୀଙ୍କ ନାଁ ସନ୍ତୋଷ ଦୌଣ୍ଡକର ବୋଲି ଜଣାପଡିଛି।

ବାର ଆଣ୍ଡ୍ ବେଞ୍ଚ୍‌ର ରିପୋର୍ଟ ଅନୁଯାୟୀ କାର୍ଯ୍ୟକର୍ତ୍ତା ସନ୍ତୋଷ ଏନଜିଟିରେ ଏକ ପିଟିସନ ଦାଖଲ କରିଛନ୍ତି। ସେ ଅଭିଯୋଗ କରିଛନ୍ତି ଯେ, ଶାହରୁଖ ଖାନ ଏବଂ ମହାରାଷ୍ଟ୍ର କୋଷ୍ଟାଲ୍‌ ଜୋନ୍‌ ମ୍ୟାନେଜମେଣ୍ଟ ଅଥରିଟି (MCZMA)କୁ ‘ମନ୍ନତ’ର ନବୀକରଣ ପାଇଁ ଆବଶ୍ୟକ କୋଷ୍ଟାଲ୍ ରେଗୁଲେସନ୍ ଜୋନ୍ (CRZ) ଦ୍ୱାରା ଅନୁମତି ଦିଆଯାଇ ନାହିଁ। ଯେହେତୁ ଏହି ବଙ୍ଗଳା ଏକ ତୃତୀୟ ଶ୍ରେଣୀର ଐତିହ୍ୟ ଭାବେ ବିବେଚନା କରାଯାଉଛି, ତେଣୁ ଯେକୌଣସି ପରିବର୍ତ୍ତନ ପାଇଁ ଉପଯୁକ୍ତ ଅନୁମତି ନେବା ଜରୁରୀ।

ଅଧିକ ପଢ଼ନ୍ତୁ: ସଲମାନ୍ ଖାନ୍ ଯଦି ବାହା ହୋଇଥାନ୍ତେ ତେବେ ‘ମନ୍ନତ’ ହୋଇଥାନ୍ତା ତାଙ୍କର

ମହଲା ବୃଦ୍ଧିର ଯୋଜନା:

ରିପୋର୍ଟ ଅନୁଯାୟୀ, ଶାହରୁଖ ତାଙ୍କର ଏହି ୬ ମହଲା ବିଶିଷ୍ଟ ବଙ୍ଗଳାରେ ଦୁଇଟି ମହଲା ବୃଦ୍ଧି କରିବାର ଯୋଜନା କରୁଛନ୍ତି। ଏହାସହ ଏଥିରେ ଦାବି କରାଯାଇଛି ଯେ ସେ ସର୍ବସାଧାରଣ ଗୃହ ପାଇଁ ନିର୍ମିତ ବାରଟି 1-BHK ଫ୍ଲାଟ୍‌କୁ ଏକ ପରିବାର ପାଇଁ ଏକ ଘରରେ ପରିଣତ କରାଯାଇଛି। NGT ସନ୍ତୋଷଙ୍କୁ ତାଙ୍କ ଦାବିର ପ୍ରମାଣ ଦାଖଲ କରିବାକୁ କହିଛନ୍ତି।

ଚାରି ସପ୍ତାହ ସମୟ:

ନ୍ୟାୟିକ ସଦସ୍ୟ ଦୀନେଶ କୁମାର ସିଂହ ଏବଂ ବିଶେଷଜ୍ଞ ସଦସ୍ୟ ବିଜୟ କୁଲକର୍ଣ୍ଣି କହିଛନ୍ତି ଯେ ଯଦି ପ୍ରକଳ୍ପ ପ୍ରସ୍ତାବକ କିମ୍ବା MCZMA ଦ୍ୱାରା କୌଣସି ଉଲ୍ଲଂଘନ ହୋଇଛି, ତେବେ ଏ ସମ୍ବନ୍ଧରେ ଚାରି ସପ୍ତାହ ମଧ୍ୟରେ ସନ୍ତୋଷଙ୍କୁ ପ୍ରମାଣ ଦାଖଲ କରିବାକୁ ପଡିବ। ଯଦି ସେ ତାହା ନ କରିବେ, ତେବେ ଆବେଦନ ପ୍ରତ୍ୟାଖ୍ୟାନ ହୋଇପାରେ। NGT ଏପ୍ରିଲ ୨୩ରେ ପୁଣି ଏହି ମାମଲାର ଶୁଣାଣି କରିବ।

ପର୍ଯ୍ୟଟନ ସ୍ଥଳୀରେ ପରିଣତ ‘ମନ୍ନତ’:

ଶାହରୁଖ ଖାନଙ୍କ ଘର ‘ମନ୍ନତ’ ମୁମ୍ବାଇର ବାନ୍ଦ୍ରା ଅଞ୍ଚଳରେ ରହିଛି। ବଲିଉଡ୍‌ ସୁପର୍‌ଷ୍ଟାର୍‌ଙ୍କ ଟିକିଏ ଝଲକ ପାଇବା ପାଇଁ ଏଠାରେ ପ୍ରଶଂସକଙ୍କ ପ୍ରବଳ ଭିଡ ଲାଗେ। ବାନ୍ଦ୍ରାର ହାଇସୋସାଇଟିରେ ଥିବାଏହି ବିଳାସପୂର୍ଣ୍ଣ ବଙ୍ଗଳା ଏକ ପ୍ରକାର ପର୍ଯ୍ୟଟନ ସ୍ଥଳୀରେ ପରିଣତ ହୋଇଛି।

ଅଧିକ ପଢ଼ନ୍ତୁ: ନେମ୍‌ ପ୍ଲେଟ୍‌ ବଦଳାଇଲେ ଶାହରୁଖ ଖାନ୍‌, ଟ୍ରେଣ୍ଡିଂରେ ମନ୍ନତ