ପୁରୀରେ ଉଦଘାଟିତ ହେଲା 'ବ୍ରିଙ୍ଗ୍ ୟୋର୍ ଓନ୍ ଫିଲ୍ମ ଫେଷ୍ଟିଭାଲ୍'; ସ୍କ୍ରିନିଂ ହେବ ୬୦ଟି ଫିଲ୍ମ

ପୁରୀ ଚକ୍ରତୀର୍ଥ ରୋଡ୍ ସ୍ଥିତ ସ୍ୱର୍ଣ୍ଣାଭ ବେଳାଭୂମିରେ ଆରମ୍ଭ ହୋଇଛି ୨୧ ତମ ବ୍ରିଙ୍ଗ୍ ୟୋର୍ ଓନ୍ ଫିଲ୍ମ ଫେଷ୍ଟିଭାଲ୍ ବାୟୋଫ୍ । ଓଟିଟି ପ୍ଲାଟଫର୍ମ ତରଙ୍ଗ ପ୍ଲସର ମିଳିତ ଆନୁକୂଲ୍ୟରେ ଏହି ୫ ଦିନିଆ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବ ଆରମ୍ଭ ହୋଇଛି ।

ସନ୍, ସ୍ୟାଣ୍ଡ୍ ଆଣ୍ଡ୍ ସ୍କ୍ରିନ ଥିମରେ ଆୟୋଜିତ ଏହି ମହୋତ୍ସବକୁ ଉଦଘାଟନ କରିଛନ୍ତି ଇରାନୀ ପର୍ଯ୍ୟଟକ ନାଜାନିନ୍ । ଚଳଚ୍ଚିତ୍ର ନିର୍ମାତା, ପ୍ରଯୋଜକ ଏବଂ ଫିଲ୍ମ ଷ୍ଟୁଡେଣ୍ଟ ମାନଙ୍କୁ ଏକାଠି ହେବାର ଓ ଗୁଣାତ୍ମକ ଫିଲ୍ମ ଦେଖିବା ସହ ଭାବ ବିନିମୟର ସୁଯୋଗ ଦେଉଛି ଏହି ଖୋଲା ମଞ୍ଚ । ଚଳିତ ବର୍ଷ ଦେଶ ବିଦେଶର ୬୦ଟି ଫିଲ୍ମ ଏଠାରେ ସ୍କ୍ରିନିଂ ହେବ ଏବଂ ଏଥିରେ ଯୋଗଦେବେ ଚଳଚ୍ଚିତ୍ର ସହ ଜଡ଼ିତ ୩୦୦ରୁ ଅଧିକ ବିଶିଷ୍ଟ ଅତିଥି ।

କଳା, ସଂସ୍କୃତି, ପରମ୍ପରା, ଭାଷା ଓ ଚାଲି ଚଳଣି ସହ ବିଭିନ୍ନ ପ୍ରସଙ୍ଗ ଓ ଘଟଣାବଳିକୁ ନେଇ ପ୍ରସ୍ତୁତ କ୍ଷୁଦ୍ର, ପ୍ରାମାଣିକ ତଥା ବୃତ୍ତଚିତ୍ର ପ୍ରଦର୍ଶିତ ହେବ । ଏହି ଫିଲ୍ମ ଫେଷ୍ଟିଭାଲରେ କୌଣସି ମନୋନୟନ, ଜୁରୀ କିମ୍ବା ପୁରସ୍କାରର ବ୍ୟବସ୍ଥା ନାହିଁ । ଉଦଘାଟନୀ ସନ୍ଧ୍ୟାରେ ପୁରୀର ଯୁବ ଫିଲ୍ମ ନିର୍ମାତା ଆଶୁତୋଷ ପଟ୍ଟନାୟକଙ୍କ ପୁରୀର ଯାଗା ଆଖେଡ଼ା ସଂସ୍କୃତିକୁ ନେଇ ୨୭ ମିନିଟର ଡକ୍ୟୁମେଣ୍ଟାରୀ ଫିଲ୍ମ ପ୍ରଥମେ ସ୍କ୍ରିନିଂ ହୋଇଥିଲା ।

ଉଦଘାଟନୀ ଉତ୍ସବରେ ମଞ୍ଚରେ ଉପସ୍ଥିତ ଥିଲେ ବ୍ରିଙ୍ଗ ୟୋର୍ ଓନ ଫିଲ୍ମ ଫେଷ୍ଟିଭାଲ ମୁଖ୍ୟ ସୁଶାନ୍ତ ମିଶ୍ର, ଇରାନରୁ ଆସିଥିବା ନାଜାନିନ, ଆୟୋଜକ କପିଳାସ ଭୂୟାଁ ଏବଂ ଓଟିଭି ନେଟୱର୍କର ଡିଜିଟାଲ୍ ବିଜନେସ୍ ହେଡ୍ ଲିତିଶା ମଙ୍ଗତ ପଣ୍ଡା ପ୍ରମୁଖ ।