LIVE TV
ପୌର ନିର୍ବାଚନ ପାଇଁ ୨୨ରୁ ୨୪ ପରୀକ୍ଷା ବନ୍ଦ । ଯୁକ୍ତ ୩ ଓ ବିଶ୍ୱବିଦ୍ୟାଳୟ ପରୀକ୍ଷା ବନ୍ଦ ପାଇଁ ନିଷ୍ପତ୍ତି ନେଲା ଉଚ୍ଚଶିକ୍ଷା ବିଭାଗ । ଏନେଇ ସବୁ କୁଳପତି ଓ କଲେଜ ଅଧ୍ୟକ୍ଷଙ୍କୁ ଚିଠି ଲେଖି ପରୀକ୍ଷା ବନ୍ଦ ନେଇ ଜଣାଇଲା ଉଚ୍ଚଶିକ୍ଷା ବିଭାଗ । କଲେଜମାନଙ୍କରେ ପୋଲିଂ ବୁଥ୍ ହେବାକୁ ଥିବାରୁ ପରୀକ୍ଷା ବନ୍ଦ । ପରୀକ୍ଷା ବନ୍ଦ କରିବାକୁ ବିଭାଗକୁ ନିର୍ଦ୍ଦେଶ ଦେଇଛି SEC ।
Also Read
ମାର୍ଚ୍ଚ ୨୪ ତାରିଖରେ ରାଜ୍ୟରେ ପୌର ନିର୍ବାଚନ ଅନୁଷ୍ଠିତ ହେବାକୁ ଯାଉଥିବା ବେଳେ ଏହି ସମୟରେ ରାଜ୍ୟର କେତେକ ବିଶ୍ୱବିଦ୍ୟାଳୟ ସେମାନଙ୍କ ଅଧୀନରେ ଥିବା ଯୁକ୍ତ ୩ କଲେଜ ଗୁଡ଼ିକ ପାଇଁ ୫ମ ସେମିଷ୍ଟରର ପରୀକ୍ଷା କରିବାକୁ ପୂର୍ବରୁ ନୋଟିସ୍ ଦେଇଥିଲେ। ଏ ସଂପର୍କରେ ଉଚ୍ଚଶିକ୍ଷା ବିଭାଗ ପକ୍ଷରୁ ରାଜ୍ୟ ନିର୍ବାଚନ କମିଶନଙ୍କୁ ଅବଗତ କରାଯାଇଥିଲା।
ଏହା ପରେ କମିଶନ ୨୨ରୁ ୨୪ ତାରିଖ ଯାଏଁ ପରୀକ୍ଷା ନ କରିବାକୁ କହିଥିଲେ। ପୌର ନିର୍ବାଚନକୁ ସୁରୁଖୁରୁରେ ସାରିବା ପାଇଁ ଏହା ଆବଶ୍ୟକ ବୋଲି କମିଶନ କହିଥିଲେ। କାରଣ ଅନେକ ସରକାରୀ ଓ ଅନୁଦାନ ପ୍ରାପ୍ତ ଯୁକ୍ତ ୩ କଲେଜରେ ପୌର ନିର୍ବାଚନ ପାଇଁ ବୁଥ୍ କରାଯାଇଛି। ତେଣୁ ସେଗୁଡ଼ିକୁ ମାର୍ଚ୍ଚ ୨୨ରୁ ୨୪ ତାରିଖ ପର୍ଯ୍ୟନ୍ତ ନିର୍ବାଚନ କାର୍ଯ୍ୟରେ ଲଗାଯିବ। ଏହାବାଦ୍ ସହରାଞ୍ଚଳରେ ଛାତ୍ରଛାତ୍ରୀମାନେ ୨୪ ତାରିଖରେ ଭୋଟ୍ ମଧ୍ୟ ଦେବେ ବୋଲି କମିଶନଙ୍କ ପକ୍ଷରୁ ଉଚ୍ଚଶିକ୍ଷା ବିଭାଗକୁ କୁହାଯାଇଥିଲା।
ରାଜ୍ୟ ନିର୍ବାଚନ କମିଶନଙ୍କ ନିର୍ଦ୍ଦେଶ ପ୍ରକାରେ ୨୨ରୁ ୨୪ ତାରିଖ ପର୍ଯ୍ୟନ୍ତ କୌଣସି ପରୀକ୍ଷା ନ କରିବାକୁ ଉଚ୍ଚଶିକ୍ଷା ବିଭାଗ ପକ୍ଷରୁ ଏହା ଅଧୀନରେ ଥିବା ସମସ୍ତ ବିଶ୍ୱବିଦ୍ୟାଳୟର କୁଳପତି ଓ ଯୁକ୍ତ ୩ କଲେଜର ଅଧ୍ୟକ୍ଷମାନଙ୍କୁ କୁହାଯାଇଛି।
ସୂଚନାଯୋଗ୍ୟ, ୨୪ ତାରିଖରେ ୧୦୬ଟି ମ୍ୟୁନିସିପାଲିଟି ଓ ଏନ୍ଏସି ସହିତ ୩ ମହାନଗର ନିଗମ- ଭୁବନେଶ୍ୱର, କଟକ ଓ ବ୍ରହ୍ମପୁରରେ ଭୋଟ୍ ଗ୍ରହଣ କରାଯିବ।
