ମାଟି ତଳେ ଯୁବତୀଙ୍କ ମୃତଦେହ: ହତ୍ୟା ପରେ କିଏ କରିଛି ୩୨ ଖଣ୍ଡ ?

ଯୁବତୀଙ୍କୁ ନିର୍ମମ ହତ୍ୟା । ଜୀବନରୁ ମାରିଦେବା ପରେ ଖଣ୍ଡ ଖଣ୍ଡ କରି କାଟି ପୋତି ଦେଲା ଦୁର୍ବୃତ୍ତ । ଖଣ୍ଡିଏ କି ଦୁଇ ଖଣ୍ଡ ନୁହେଁ ବରଂ ଯୁବତୀଙ୍କ ମରଶରୀରକୁ କଲା ୩୨ ଖଣ୍ଟ । ଏପରି ଏକ ଅଭାବନୀୟ ଘଟଣା ଘଟିଛି । ନବରଙ୍ଗପୁର ଜିଲ୍ଲା ରାଇଘର ଥାନା ଅଂଚଳରେ । ମାଟି ତଳେ ଯୁବତୀଙ୍କ ମୃତଦେହ ଠାବ ହେବା ପରେ ପୋଲିସ ଜୋରଦାର ତଦନ୍ତ ଚଳାଇଛି ।

ସେପଟେ ଘଟଣାକୁ ନେଇ ଆଉ ଏକ ଚାଞ୍ଚଲ୍ୟକର ତଥ୍ୟ ଆସିଛି । ହତ୍ୟା ପରେ ୩୨ ଖଣ୍ଡ କରି କାଟିବା ପରେ ମାଟିରେ ଦୁର୍ବୃତ୍ତ ପୋତିଥିଲେ ବୋଲି ପୋଲିସ କହିଛି । ପୋଲିସର କହିବା ଅନୁସାରେ ଜଙ୍ଗଲରେ ଅଧା ପୋତା ଅବସ୍ଥାରେ ଯୁବତୀଙ୍କ ମୃତଦେହ ଠାବ କରାଯାଇଥିଲା । ରାଇଘର ଥାନା ମୁରୁମଡ଼ିହି ଗାଁ ନିକଟ ଜଙ୍ଗଲରେ ଏହି ମୃତଦେହ ମିଳିଛି ବୋଲି ପୋଲିସ ସୂଚନା ଦେଇଛି ।

ଯୁବତୀ ଜଣକଙ୍କ ପରିଚୟ ମିଳି ନଥିବାବେଳେ ତାଙ୍କ ଘର ବାଘବେଡ଼ାର ବୋଲି ଅନୁମାନ କରାଯାଉଛି । ପ୍ରେମ ଜନିତ ବ୍ୟାପାରରୁ ଯୁବତୀଙ୍କୁ କେହି ହତ୍ୟା କରି ପୋତି ଦେଇଥିବା ସନ୍ଦେହରେ ପୋଲିସ ସେହି ଗାଁର ଚନ୍ଦ୍ର ରାଉତ ଓ ତାଙ୍କ ସ୍ତ୍ରୀଙ୍କୁ ଥାନାରେ ଅଟକ ରଖି ପଚରାଉଚରା କରୁଛି । ସାଇଣ୍ଟିଫିକ୍ ଟିମ୍ ପହଂଚି ମୃତଦେହ ଉଦ୍ଧାର କରିବା ସହ ତଦନ୍ତ କରୁଛି ।