କେନ୍ଦୁଝରର ବିଜେଡି ନେତା ରାଜା ଚକ୍ରଙ୍କୁ କ୍ରାଇମବ୍ରାଞ୍ଚ EOWର ଜେରା। ଭୁବନେଶ୍ବରସ୍ଥିତ EOW ଅଫିସରେ ତାଙ୍କୁ ଦିନ ୧୧ଟାରୁ ଜେରା ଚାଲିଥିବା ସୂଚନା ମିଳିଛି। ପ୍ରାୟ ୫ ଶହ କୋଟିର ଟ୍ରାନ୍ସପୋର୍ଟ ଘୋଟାଲା ମାମଲାରେ ରାଜା ଚକ୍ରଙ୍କୁ ଜେରା ହେଉଥିବା ଜଣାପଡ଼ିଛି। ଏହି ମାମଲାରେ ପୂର୍ବରୁ ଗତ ୭ ତାରିଖରେ ୨ ଜଣଙ୍କୁ ଗିରଫ କରିଥିଲା EOW । ମାନସ ରଂଜନ ବାରିକ ଓ ଉତ୍କଳ ଦାସ ଗିରଫ ହୋଇଥିଲେ । ସେହି ଲିଙ୍କରେ ରାଜାଙ୍କୁ ଜେରା ଚାଲିଥିବା ସୂଚନା ମିଳିଛି ।
ଆଳୁ ଖୋଳୁ ଖୋଳୁ ମହାଦେବ ବାହାରିବା ଭଳି ପ୍ରାୟ ୫୦ କୋଟି ଟଙ୍କାର ଘୋଟାଲା ଅଭିଯୋଗର ତଦନ୍ତ କରୁ କରୁ EOW ଜାଣିବାକୁ ପାଇଛି ଏହି ରାଶି ୫୦୦ କୋଟି ଟଙ୍କାରୁ ଅଧିକ ହେବ । ଦୁଇ ଜଣଙ୍କୁ ଗିରଫ କରାଯିବା ପରେ କେନ୍ଦୁଝରର ବିଜେଡି ନେତା ରାଜା ଚକ୍ରଙ୍କୁ ଜେରା କରୁଛି EOW । ଜାଣିବାକୁ ପାଇଛି କେନ୍ଦୁଝର ଜିଲ୍ଲାରେ କେମିତି ଦିନ ଦ୍ୱିପ୍ରହରରେ ଲୁଟ୍ କରୁଥିଲେ ବିଜେଡି ନେତା । ଅଭିଯୋଗ ହୋଇଛି, ଗନ୍ଧମାର୍ଦ୍ଦନ ଲୋଡିଂ ଆଣ୍ଡ ଟ୍ରାନ୍ସପୋର୍ଟ କୋ-ଅପରେଟିଭ୍ ସୋସାଇଟି ନାଁରେ କରୁଥିଲେ ଲୁଟ୍ । ଆଇରନ୍ ଓର୍ ବୋଝେଇ ଟ୍ରକ ପିଚ୍ଛା ୬୦ ଟଙ୍କା ଆଦାୟ କରୁଥିଲେ । ଏହି କୋ-ଅପରେଟିଭ୍ ସୋସାଇଟିର କାର୍ଯ୍ୟାଳୟ କେନ୍ଦୁଝରର ଶୁଆକାଟିରେ ରହିଛି । ଗୋଟିଏ ଟ୍ରକ ଠାରୁ ୬ଟଙ୍କା ଆଦାୟର ବ୍ୟବସ୍ଥା ଥିଲା ବେଳେ ଏମାନେ ୬୦ ଟଙ୍କା ଆଦାୟ କରୁଥିଲେ । ଏ ସଂପର୍କରେ କାଗଜପତ୍ରରେ କିଛି ଦେଖାଯାଉନଥିଲା । ଅଡିଟରେ ଦେଖାଯାଉନଥିଲା କି ଭାଉଚର ବି ହେଉନଥିଲା । ଓଡ଼ିଶା ଖଣି ନିଗମର ଖଣିକୁ ଏମାନେ ଟଙ୍କା ଖଣି ବୋଲି ଭାବୁଥିବାର ଅଭିଯୋଗ ହୋଇଛି । ୨୦୧୭ରୁ ୨୦୨୪ ପର୍ଯ୍ୟନ୍ତ କୋଟି କୋଟି ଟଙ୍କା ଆଦାୟ କରିଛନ୍ତି ବିଜେଡି ନେତା । EOW ତଦନ୍ତ ପରେ ଏବେ ସବୁ କଥା ସାମନାକୁ ଆସୁଛି । କେନ୍ଦୁଝର ଜିଲ୍ଲାରେ ବେଧଡକ ଚାଲିଥିଲା ଲୁଟ୍ । ଏହା ଏବେ ସାରା ରାଜ୍ୟରେ ଚର୍ଚ୍ଚାର ବିଷୟ ହୋଇଛି । ରାଜା ଚକ୍ର ଏହି ମାମଲାରେ ହାଇକୋର୍ଟରୁ ଆଗୁଆ ଜାମିନ ପାଇଥିବାର ଜଣାପଡିଛି ।
Also Read
ଅଧିକ ପଢ଼ନ୍ତୁ: କେନ୍ଦୁଝରରେ ହେବ ଷ୍ଟିଲ୍ ପ୍ଲାଣ୍ଟ; ଯୁବକ-ଯୁବତୀଙ୍କୁ ମିଳିବ ନିଯୁକ୍ତି...