ଏହି ଜଙ୍ଗଲକୁ କେଉଁଠୁ ଆସୁଛି ଏତେ ନରକଙ୍କାଳ ?

ବଲାଙ୍ଗୀର ତୁରେକେଲା ଥାନା ମହନିଲହ ଜଙ୍ଗଲରୁ ପୁଣି ନରକଙ୍କାଳ ଉଦ୍ଧାର । କଙ୍କାଳଟି ଜଣେ ପୁରୁଷଙ୍କର ବୋଲି ସନ୍ଦେହ କରାଯାଉଛି । ମୃତ୍ୟ ବ୍ୟକ୍ତିଙ୍କ ବୟସ ପାଖାପାଖି ୪୦-୪୫ ହେବ ବୋଲି ଅନୁମାନ କରାଯାଉଛି । ଗାଁ ଲୋକଙ୍କ ଠାରୁ ଖବର ପାଇ ପୋଲିସ କଙ୍କାଳ ଜବତ କରିବା ସହ ସାଇଣ୍ଟିଫିକ ଟିମ୍ ସହାୟତାରେ ତଦନ୍ତ ଜାରି ରଖିଛି । ମୃତ୍ୟର କାରଣ ସ୍ପଷ୍ଟ ହୋଇନଥିବା ବେଳେ, ବିଭିନ୍ନ ଦିଗକୁ ନେଇ ତଦନ୍ତ କରୁଛି ପୋଲିସ l

ସେପଟେ ଜଙ୍ଗଲ ଭିତରୁ ବାରମ୍ବାର ଏଭଳି ଘଟଣା ଘଟୁଥିବାରୁ ଭୟଭୀତ ହେଉଛନ୍ତି ଅଞ୍ଚଳବାସୀ l ବେଲବାଞ୍ଜର ଲୋଚନ ଗଡ଼ତିଆ ଜଙ୍ଗଲକୁ ଛେଳି ଚରାଇବାକୁ ଯାଇଥିବା ବେଳେ କଙ୍କାଳ ଦେଖି, ପୋଲିସକୁ ଖବର ଦେଇଥିଲେ । ପୂର୍ବରୁ ମଧ୍ୟ ୨୦୨୧ ମସିହାରେ ଜଙ୍ଗଲରୁ ଜଣେ ଶ୍ରମିକଙ୍କ ମୃତଦେହ ମିଳିଥିଲା । ୨୦୨୨ରେ ତନୁ କୁରେ ନାମକ ମହିଳାଙ୍କ ମୃତଦେହ ଉଦ୍ଧାର କରିଥିଲା ପୋଲିସ ।

ଗତ ଏପ୍ରିଲ୍‌ ୧ ତାରିଖରେ ସେହି ତୁରେକେଲା ଥାନା ରେଲୱେ ଷ୍ଟେସନ ପାଖ ବେଲବାଞ୍ଜି ଜଙ୍ଗଲରୁ ନରକଙ୍କାଳ ଠାବ ହୋଇଥିଲା। ହତ୍ୟାକାଣ୍ଡ ସନ୍ଦେହରେ ତୁରେକେଲା ପୋଲିସ ଓ କଣ୍ଟାବାଞ୍ଜି ଏସଡିପିଓ ଘଟଣାସ୍ଥଳକୁ ଯାଇ ତଦନ୍ତ ଆରମ୍ଭ କରିଥିଲେ l ମହନିଲହ ଗାଁକୁ ଲାଗି ରହିଛି ବେଳବାଞ୍ଜି ଜଙ୍ଗଲ । ଏହି ଗାଁର ଜଣେ ଛେଳି ଚରାଳି ସେଠି ଏକ ମଣିଷ ଖପୁରୀ ଓ ମେରୁଦଣ୍ଡ ହାଡ଼ ପଡିଥିବା ଦେଖି ପୋଲିସକୁ ଖବର ଦେଇଥିଲେ । ଖବର ପାଇ ପୋଲିସ୍ ଆସି ଛାନବିନ୍ ଚଳାଇଥିଲା । ସାଇଣ୍ଟିଫିକ ଟିମ୍ ଆସି ତଦନ୍ତ ମଧ୍ୟ କରିଥିଲା ।