ସାନ ଭାଇକୁ ଅପହରଣ କଲା ବଡ଼ ଭାଇ : ମାଗିଥିବା ୬ ଲକ୍ଷ ନମିଳିବାରୁ ଜୀବନ ନେଇଗଲା

ବର୍ବର, ଘୃଣ୍ୟ, ଅମାନୁଷିକ । ଭାଇ ସାଜିଲା ଭାଇର ହତ୍ୟାକାରୀ । ଟଙ୍କା ପାଇଁ ହତ୍ୟା । ସାନ ଭାଇକୁ ଅପହରଣ କଲା ପରେ ହତ୍ୟା କଲା ବଡ଼ ଭାଇ । ଝାଡ଼ଖଣ୍ଡ(Jharkhand)ର ହଜରିବାଗ ଜିଲ୍ଲାରୁ ଏପରି ଏକ ହୃଦୟବିଦାରକ ଘଟଣା ସାମ୍ନାକୁ ଆସିଛି । ଜଣେ ୧୫ ବର୍ଷିୟ ନାବାଳକ ପ୍ରଥମେ ନିଜର ୧୨ ବର୍ଷିୟ କକା ପୁଅ ଭାଇକୁ ଛଅ ଲକ୍ଷ ଟଙ୍କା ପାଇଁ ଅପହରଣ କରିଥିଲା । ହେଲେ ଦାବି ମୁତାବକ ଟଙ୍କା ନମିଳିବା ପରେ ଆଉ ଦୁଇ ଜଣ ଲୋକଙ୍କ ସହ ସାନ ଭାଇର ଜୀବନ ନେଇଗଲା । ଏହା ପରେ ସମସ୍ତେ ମିଶି ମୃତଦେହକୁ ଏକ ପଥର ଗୁମ୍ଫାରେ ଫିଙ୍ଗି ଦେଇ ଆସିଥିଲେ ।

ଅଧିକ ପଢ଼ନ୍ତୁ: ‘ପରିବାର ଲୋକ ମୋତେ ମାରିଦେବେ’ : ସତକୁ ସତ ଥାନାରେ ଗୁହାରୀ କରିବାର ଦୁଇ ଦିନ ପରେ. . . .

ଅଭିଯୋଗ ପରେ ବର୍ତ୍ତମାନ ନାବାଳିକା ଅଭିଯୁକ୍ତଙ୍କ ସମେତ ଅନ୍ୟ ଦୁଇ ଜଣଙ୍କୁ ଗିରଫ କରିଛି ପୋଲିସ୍‌ । ପଚରାଉଚରା କରିବା ପରେ ଗୋଟି ଗୋଟି କରି ସବୁ ସତ କହିଛି ଅଭିଯୁକ୍ତ । ମୁଖ୍ୟ ଅଭିଯୁକ୍ତର ସୂଚନା ଆଧାରରେ କୋଲହୁୱା କୁଡରରେ ସ୍ଥିତ ଦୁଲକି ନଦୀର ନିକଟରେ ଥିବା ଏକ ପଥର ଗୁମ୍ଫାରୁ ମୃତଦେହ ଉଦ୍ଧାର କରାଯାଇ ହଜରିବାଗସ୍ଥିତ ସଦର ଡାକ୍ତରଖାନାକୁ ପଠାଇ ଦିଆଯାଇଛି ।

ଏପଟେ ପୁଅର ଶବ ମିଳିବା ପରେ ପରିବାର ଲୋକ କାନ୍ଦି କାନ୍ଦି ଗଡ଼ି ଯାଉଛନ୍ତି । ନିଜ ବଡ଼ ଭାଇ ହିଁ କକା ପୁଅ ଭାଇକୁ ହତ୍ୟା କରିଛି । ଟଙ୍କା ଲୋଭରେ ଜଣେ ଭାଇ ଏପରି କରିଥିବା କଥାକୁ କେହି ବିଶ୍ୱାସ କହୁନାହାନ୍ତି ।

ଅଭିଯୁକ୍ତ କହିବା ଅନୁସାରେ, ସେ ପ୍ରଥମେ ଅନ୍ୟ ଦୁଇ ଅଭିଯୁକ୍ତଙ୍କ ସହ ସାନ ଭାଇକୁ ଅପହରଣ କରିଥିଲା । ଏହା ପରେ ସେ ନିଜ ପରିବାର ଲୋକଙ୍କୁ ଫୋନ୍‌ କରି ୬ ଲକ୍ଷ ଟଙ୍କା ମାଗିଥିଲା । ହେଲେ ଟଙ୍କା ନମିଳିବାରୁ କଥା ପ୍ରଘଟ ହେବା ଭୟରେ ଭାଇକୁ ହତ୍ୟା କରି ମୃତଦେହକୁ ପଥର ଗୁମ୍ଫାରେ ଲୁଚାଇ ରଖିଥିଲା ।