ସାବଧାନ ! ଏଥର ଫୋନ୍‌ ପେ’ରୁ ପେମେଣ୍ଟ ବେଳେ ଚୋରି ହେଉଛି ଟଙ୍କା, ଜାଣନ୍ତୁ...

ଓଟିପି ଆସିଲା, ମୋବାଇଲରୁ ଟଙ୍କା କଟିଲା । ଚାହୁଁ ଚାହୁଁ ଆକାଉଣ୍ଟରୁ କଟିଗଲା ୬ ଲକ୍ଷ ୫୦ ହଜାର ଟଙ୍କା । କାଳ ହେଲା ଫୋନ୍‌ ପେ’ । ଏମିତି ଭୟାନକ ସାଇବର ଠକେଇ ହୋଇଛି ନୂଆପଡାରେ । ଅଭିଯୋଗ ଅନୁସାରେ, ମୋବାଇଲକୁ ଆସିଥିଲା ଏକ ଓଟିପି । ଆଉ ଏହି ଓଟିପିକୁ କ୍ଲିକ୍ କଲା ପରେ ଆକାଉଣ୍ଟରୁ ଗାଏବ ହୋଇଗଲା ୬ ଲକ୍ଷ ୫୦ ହଜାର ଟଙ୍କା । ଠକେଇ ବୋଲି ଜାଣିଲା ବେଳକୁ ସବୁକିଛି ସରିଯାଇଥିଲା ।

ଆମେ କହୁଛୁ ନୂଆପଡା ସଦର ମହକୁମାର ଅବସରପ୍ରାପ୍ତ କର୍ମଚାରୀ ସୁରଜିତ୍ ସିଂ ମହାରଥାଙ୍କ କଥା । ମହାରଥାଙ୍କ ଅଭିଯୋଗ ଅନୁସାରେ, ସେ ଜଣକୁ ୨୬ ହଜାର ଟଙ୍କା ପଠାଇବାର ଥିଲା । ଗୁଗୁଲ ପେ’ରେ ଟଙ୍କା ନଯିବାରୁ ଫୋନ ପେ’ରେ ପଠାଇଲେ । ହଠାତ୍ ମୋବାଇଲକୁ ୟୋନୋ ଅପଡେଟ କରିବା ପାଇଁ ଏକ ମେସେଜ ଆସିଲା । ଆଉ ଓଟିପିକୁ କ୍ଲିକ କରିବା ପରେ ଆକାଉଣ୍ଟରୁ ୬ ଲକ୍ଷ ୫୦ ହଜାର ଟଙ୍କା ଚାଲିଗଲା । କିନ୍ତୁ କାହିଁକି ଆକାଉଣ୍ଟରୁ ଟଙ୍କା କଟିଲା ସେନେଇ କିଛି ଜାଣିପାରିନଥିଲେ ସୁରଜିତ୍‌ ।

ତେବେ ଆକାଉଣ୍ଟରୁ ଟଙ୍କା କଟିବା ପରେ ସାଙ୍ଗେ ସାଙ୍ଗେ ଥାନାରେ ଏନେଇ ଲିଖିତ ଅଭିଯୋଗ କରିଥିଲେ ସୁରଜିତ୍‌ । ହେଲେ ଘଟଣା ସମ୍ପର୍କରେ ପୋଲିସର କୌଣସି ପ୍ରତିକ୍ରୟା ମିଳିପାରିନାହିଁ । କିନ୍ତୁ ଆକାଉଣ୍ଟରୁ ଏତେ ଗୁଡାଏ ଟଙ୍କା କଟିଯାଇଥିବାରୁ ପୂରା ଅଂଚଳରେ ଜୋର ଧରିଛି ଚର୍ଚ୍ଚା ।

(ରିପୋର୍ଟ- ମାୟାଧର ସରାଫ, ନୂଆପଡା)