Honour Killing: ପ୍ରେମ ପାଇଁ ବଳୀଦାନ: ମତେ ଗୁଳି କର, କିନ୍ତୁ ଛୁଇଁବାକୁ ଚେଷ୍ଟା କରନି; ଲୋମଟାଙ୍କୁରା ଅନର କିଲିଂ

ନିକଟରେ ପାକିସ୍ତାନର ଏକ ଲୋମଟାଙ୍କୁରା ଭିଡିଓ ଭାଇରାଲ ହୋଇଛି। ଯେଉଁଥିରେ ଦେଖା ଦେଇଛି, ଏକ ଦମ୍ପତି ବାନୋ ବିବି ଓ ଇହସାନୁଲ୍ଲାଙ୍କୁ, ପଠାନୀ ପୋଷାକ ଓ ପଗଡ଼ି ପିନ୍ଧିଥିବା ୧୨ରୁ ଅଧିକ ଲୋକଙ୍କ ଦ୍ୱାରା ପିକଅପ୍ ଟ୍ରକ୍‌ରେ ବାଲୋଚ ମରୁଭୂମିର ଏକ ନିର୍ଜନ ସ୍ଥାନକୁ ନିଆଯାଉଛି। କିଛି ମୁହୂର୍ତ୍ତ ପରେ, ଜିର୍ଗା ପୁରୁଷମାନେ ଟ୍ରକ୍‌ରୁ ଓହ୍ଲାଇ ସେମାନଙ୍କର ଅଟୋମେଟିକ୍ ରାଇଫଲ୍ ଓ ପିସ୍ତଲ ବାହାର କରିଥିଲେ, ଏବଂ ଦମ୍ପତିଙ୍କୁ ବାଲୋଚ ମରୁଭୂମିରେ ଆଗକୁ ଚାଲିଯାଉଥିବା ଦେଖାଯାଇଥିଲା। ତା’ ପରେ, ଗୁଳିମାଡ଼ର ତୀକ୍ଷ୍ଣ ଶବ୍ଦ ଶୁଣାଯାଇଥିଲା। ଜିର୍ଗା ଦ୍ୱାରା "ପ୍ରେମ ବିବାହ"ରେ ଅଭିଯୁକ୍ତ ଏହି ଦମ୍ପତିଙ୍କୁ ସ୍ପଷ୍ଟ ଦିବାଲୋକରେ ଅତି ନିକଟରୁ ଗୁଳି କରି ହତ୍ୟା କରାଯାଇଥିଲା। ଏହି ହତ୍ୟାକାରୀ ଗୋଷ୍ଠୀରେ ଉକ୍ତ ମହିଳାଙ୍କ ଭାଇ ମଧ୍ୟ ଥିଲେ।

ଏହି ଭୟଙ୍କର ଘଟଣା ଜୁନ୍‌ରେ ଘଟିଥିବା କୁହାଯାଉଛି। ନାଗରିକ ଅଧିକାର କର୍ମୀ ଓ ବାଲୋଚ ଗୋଷ୍ଠୀଙ୍କ ଦ୍ୱାରା ବିକ୍ଷୋଭ ପ୍ରଦର୍ଶନ ପରେ ବାଲୋଚିସ୍ତାନ ପ୍ରାଦେଶିକ ପୁଲିସ ୧୩ ଜଣଙ୍କୁ ଗିରଫ କରିଛି। ଏମାନଙ୍କ ମଧ୍ୟରେ ଜନଜାତି ନେତା ସରଦାର ଶେରବାଜ୍ ସଟକଜାଇ ମଧ୍ୟ ଅଛନ୍ତି। ପ୍ରେମ ବିବାହ ଯୋଗୁଁ ସଟକଜାଇଙ୍କ ନିର୍ଦ୍ଦେଶରେ ଏହି ହତ୍ୟା ହୋଇଥିଲା। ଏହି ପ୍ରେମ ବିବାହ ଜିର୍ଗା ବା ଜନଜାତି ପରିଷଦ ଦ୍ବାରା ଅଗ୍ରାହ୍ୟ। ତେବେ ସଟକଜାଇ ନାମଟି ଏକ ପାଶ୍ତୋ ଜନଜାତି ଗୋଷ୍ଠୀକୁ ସୂଚାଏ।

ଘଟଣାଟି ହେଉଛି, ବାନୋ ବିବି ତାଙ୍କ ପରିବାରର ପସନ୍ଦ ବିରୁଦ୍ଧରେ ଯାଇ ନିଜ ଇଚ୍ଛାରେ ବିବାହ କରିଥିଲେ। ତାଙ୍କର ଏହି ପ୍ରେମ ବିବାହକୁ ନେଇ ତାଙ୍କ ପରିବାର ବେଶ ରାଗି ଯାଇଥିଲେ। ବିବାହର ପ୍ରାୟ ବର୍ଷେ ପରେ ତାଙ୍କ ପରିବାର ତାଙ୍କୁ ଡାକିଥିଲେ ଯାହା ଦ୍ୱାରା ମାମଲାର ସମାଧାନ କରାଯାଇ ପାରିବ ଏବଂ ତାଙ୍କ ବିବାହକୁ ପରିବାରର ସହମତି ମିଳିପାରିବ। କିନ୍ତୁ ଯେତେବେଳେ ମହିଳା ତାଙ୍କ ଘରେ ପହଞ୍ଚିଲେ, ତାଙ୍କୁ ତାଙ୍କ ସ୍ୱାମୀଙ୍କ ସହ ଧରାଯାଇଥିଲା। ତା’ପରେ ଉଭୟଙ୍କୁ ମରୁଭୂମିକୁ ନିଆଯାଇ ମୃତ୍ୟୁଦଣ୍ଡ ଦିଆଯାଇଥିଲା।

ବାନୋ ବିବି ବ୍ରାହାଭି ଭାଷାରେ କୋରାନ ଧରି କହୁଛନ୍ତି, "ମୋ ସହ ସାତ ପାଦ ଚାଲ, ତା’ପରେ ତୁମେ ମୋତେ ଗୁଳି କରିପାରିବ। ତୁମେ କେବଳ ମୋତେ ଗୁଳି କରିବାକୁ ଅନୁମତି ପାଇଛ। ଏହାଠାରୁ ଅଧିକ କିଛି ନୁହେଁ। ମୋତେ ଗୁଳି କର, ମୋତେ ଛୁଇଁବା କଥା ଚିନ୍ତା ମଧ୍ୟ କରନାହିଁ।" ଏହା ପରେ ତାଙ୍କୁ ଗୁଳି ଚଳାଇ ହତ୍ୟା କରାଯାଇଛି।

ବାନୋ ବିବି ହେଉଛନ୍ତି ଜଣେ ସ୍ଥାନୀୟ ଜନଜାତିର ଥିଲେ। ନିଜ ଇଚ୍ଛାରେ ବିବାହ କରିବା ଯୋଗୁଁ କେବଳ ତାଙ୍କ ପରିବାର ନୁହେଁ, ବରଂ ତାଙ୍କ ଜନଜାତିର ଲୋକମାନେ ମଧ୍ୟ ତାଙ୍କ ଉପରେ ନାରାଜ ଥିଲେ। ଉଭୟଙ୍କୁ ମିଛରେ ଡାକି ଧରାଯାଇଥିଲା ଏବଂ ସ୍ଥାନୀୟ ଜିର୍ଗା (ପଞ୍ଚାୟତ)ରେ ନିଷ୍ପତ୍ତି ନିଆଯାଇଥିଲା ଯେ ପରିବାର ଓ ଜନଜାତିର ସମ୍ମାନ ରକ୍ଷା ପାଇଁ ଉଭୟଙ୍କୁ ହତ୍ୟା କରାଯିବା ଉଚିତ। ଏହାକୁ 'ଅନର କିଲିଂ' କୁହାଯାଏ। ସାଞ୍ଜିଦି ଅଞ୍ଚଳରେ, ଈଦ୍ ଉଲ୍ ଆଜହାର ତିନି ଦିନ ପୂର୍ବରୁ ଏହି ଘଟଣା ଘଟିଥିଲା। ଯେଉଁ ପୁରୁଷମାନେ ମହିଳାଙ୍କୁ ଗୁଳି କରିଥିଲେ, ସେମାନଙ୍କ ମଧ୍ୟରେ ତାଙ୍କ ନିଜ ଭାଇ ମଧ୍ୟ ଥିଲେ, ଯିଏ ତାଙ୍କ ପରିବାର ଓ ଜନଜାତି ତରଫରୁ କାର୍ଯ୍ୟ କରୁଥିଲେ।

ଏହି ଭିଡିଓ ଭାଇରାଲ୍ ହେବା ପରେ ପାକିସ୍ତାନରେ ଦେଶବ୍ୟାପୀ ତୀବ୍ର ବିରୋଧ କରାଯାଇଥିଲା। ରାଜନେତା, କର୍ମୀମାନେ ପାକିସ୍ତାନ ହତ୍ୟାକାଣ୍ଡକୁ ନିନ୍ଦା କରିଛନ୍ତି। ବାଲୋଚିସ୍ତାନର କର୍ମୀ ସାମି ଦୀନ ବାଲୋଚ ତାଙ୍କର ଦୁଃଖ ପ୍ରକାଶ କରି କହିଛନ୍ତି, "ଜଣେ ମହିଳା ହିସାବରେ, ଏହି ଭୟଙ୍କର ଘଟଣା ମୋ ପାଇଁ ଗଭୀର ଭାବେ ଯନ୍ତ୍ରଣାଦାୟକ ଓ ହୃଦୟବିଦାରକ। ଅସମ୍ମାନ ନାମରେ କୌଣସି ମହିଳାଙ୍କୁ ହତ୍ୟା କରିବା କେବଳ ଏକ ଜଘନ୍ୟ ଅପରାଧ ନୁହେ, ବରଂ ମାନବତାର ସବୁଠାରୁ ଖରାପ ଅପମାନ ମଧ୍ୟ।"

ବାଲୋଚିସ୍ତାନର ପ୍ରଥମ ମହିଳା ଡେପୁଟି କମିଶନର ଇଞ୍ଜିନିୟର ଆୟେଶା ଜେହ୍ରୀ ଜନଜାତିମାନଙ୍କର ଏହାକୁ ନିନ୍ଦା କରି କହିଛନ୍ତି, "ଯେଉଁ ଜନଜାତିମାନେ ଝିଅମାନଙ୍କ ପାଇଁ ବିଦ୍ୟାଳୟ ନିର୍ମାଣ କରିପାରନ୍ତି ନାହିଁ, ସେମାନେ ସମ୍ମାନ ନାମରେ ସେମାନଙ୍କୁ ହତ୍ୟା କରିବାକୁ ଆଗେଇ ଆସନ୍ତି।"

ଯୁକ୍ତରାଷ୍ଟ୍ରରେ ଥିବା ପିଟିଆଇ କର୍ମୀ ଇମାନ ଜାମିଲ ଏହି ଘଟଣାକୁ "ଶୀତଳ ରକ୍ତରେ ହତ୍ୟା" ବୋଲି ଅଭିହିତ କରି କହିଛନ୍ତି। ବାଲୋଚିସ୍ତାନ ମୁଖ୍ୟମନ୍ତ୍ରୀ ସରଫ୍ରାଜ ବୁଗଟି କହିଛନ୍ତି, "ଆମେ ନିଶ୍ଚିତ କରିବୁ ଯେ ସେମାନଙ୍କୁ ଉଚିତ୍ ଦଣ୍ଡ ମିଳିବ।"

ପାକିସ୍ତାନରେ ଅନର୍ କିଲିଙ୍ଗ ଏକ ବଡ଼ ସମସ୍ୟା

ପାକିସ୍ତାନରେ, ଅନର୍ କିଲିଙ୍ଗ ଏକ ସାଧାରଣ କଥା। ବିଶେଷକରି ଜନଜାତୀୟ ସମ୍ପ୍ରଦାୟମାନଙ୍କ ମଧ୍ୟରେ, ପ୍ରତିବର୍ଷ ୧,୦୦୦ରୁ ଅଧିକ ଲୋକଙ୍କୁ ହତ୍ୟା କରା ଯାଉଥିବାର ରିପୋର୍ଟ ଅଛି। ପାକିସ୍ତାନ ମାନବାଧିକାର କମିଶନ ୨୦୨୪ ମସିହାରେ ଅତି କମରେ ୪୦୫ ମାମଲା ରିପୋର୍ଟ କରିଛି, ଯେଉଁଥିରେ ୩୩୫ ଜଣ ମହିଳା ଓ ୧୧୯ ଜଣ ପୁରୁଷ ଅଛନ୍ତି। ବାଲୋଚିସ୍ତାନରେ ୨୦୨୪ ମସିହାରେ ୩୨ଟି ଏହିପରି ହତ୍ୟା ରେକର୍ଡ କରାଯାଇଛି, ମାତ୍ର ଗୋଟିଏ ଦୋଷୀ ସାବ୍ୟସ୍ତ ହୋଇଛି, ଯାହା ଦୁର୍ବଳ ଆଇନକୁ ଦର୍ଶାଉଛି। ଏହିପରି ଅନର୍ କିଲିଙ୍ଗ ପ୍ରାୟତଃ ବାଲୋଚିସ୍ତାନ ଓ ପଞ୍ଜାବ ପ୍ରଦେଶରେ ହୁଏ, ଯାହାର ଶିକାର ସାଧାରଣତଃ ମହିଳାମାନେ ହୋଇଥାନ୍ତି। ଏବଂ ଅପରାଧୀମାନେ ପରିବାରର ସମ୍ମାନ ରକ୍ଷା କରୁଥିବା ଦାବି କରି ଏହା ଘଟାଇଥାନ୍ତି।

ଅଧିକ ପଢ଼ନ୍ତୁ: ଛୁଟି କାଟିବାକୁ ଯାଇ ଝିଅକୁ ହତ୍ୟା କଲା ବାପା, ରଚିଲା କିଡନାପ୍ ଡ୍ରାମା, ହ୍ରଦରୁ ମିଳିଲା ଝିଅର ମୃତଦେହ