LIVE TV
କେତେବାଟ ଆଗେଇଲା ଭରତପୁର ଥାନା କାଣ୍ଡର ତଦନ୍ତ? ଏଭଳି ସମ୍ବେଦନଶୀଳ ଘଟଣାରେ କେବଳ ପୋଲିସ ଅଧିକାରୀଙ୍କ ନିଲମ୍ବନରେ କାର୍ଯ୍ୟାନୁଷ୍ଠାନ ଅଟକିଯିବ, ନା ଆଗକୁ ବଢ଼ିବ ? ୬ ଦିନ ପରେ ଗିରଫ, ମାତ୍ର ୪ ଘଣ୍ଟାରେ ଜାମିନ୍ । ଯେଉଁ ମୂଳ ଅଭିଯୋଗ, ରାସ୍ତାରେ ରୋଡ୍ ରୋମିଓଙ୍କ ଛେଡ୍ଛାଡ୍ ପାଇଁ ଭରତପୁର ଥାନାର ଦ୍ବାରସ୍ଥ ହୋଇଥିଲେ ମେଜର ଗୁରବଂଶ ଓ ତାଙ୍କ ବାନ୍ଧବୀ, ସେ ଅଭିଯୋଗ ଉପରେ କାର୍ଯ୍ୟାନୁଷ୍ଠାନ ପାଇଁ ୬ ଦିନ ଲାଗିଯିବା ଏବଂ ଗିରଫଦାରୀର ମାତ୍ର ୪ ଘଣ୍ଟା ଭିତରେ ୭ ରୋଡ୍ ରୋମିଓ ଜାମିନ୍ ପାଇବାରେ ସକ୍ଷମ ହେଇଯିବା, ପୋଲିସର ଭୂମିକାକୁ ଆହୁରି ସନ୍ଦେହ ଘେରକୁ ଟାଣିଛି । ତେଣୁ ଖୋଦ୍ ଭରତପୁର ଥାନା ଭିତରେ ମେଜର୍ ଓ ତାଙ୍କ ବାନ୍ଧବୀଙ୍କ ପ୍ରତି ବର୍ବର ଆଚରଣ ମାମଲାରେ ଏବେ ଯେମିତି କ୍ରାଇମବ୍ରାଞ୍ଚ ଉପରେ ଭରସା । ୟା ଭିତରେ ଗତକାଲି ବାନ୍ଧବୀଙ୍କ ପରେ ଆଜି ୧୨୦ ବାଟାଲିୟନ୍ ପରିସରରେ ମେଜର ଗୁରୁବଂଶ ସିଂଙ୍କ ବୟାନ ରେକର୍ଡ କରିଛି କ୍ରାଇମବ୍ରାଞ୍ଚ ।
Also Read
ଆଉ ଏପଟେ ପୋଲିସ ଡିଜି ୱାଇ.ବି ଖୁରାନିଆ ମଧ୍ୟ ତଦନ୍ତର ଅଗ୍ରଗତି ନେଇ କ୍ରାଇମବ୍ରାଞ୍ଚ ଏଡିଜି ଅରୁଣ ବୋଥ୍ରାଙ୍କ ସହ ଆଲୋଚନା କରିଛନ୍ତି। ତେଣୁ ତଦନ୍ତ କେତେଦୂର ଗଲା, ଏହାର ଗତି କୁଆଡ଼େ ଯାଉଛି, ନିଲମ୍ବିତ ଥାନାଧିକାରୀ ଏବଂ ୪ ପୋଲିସ କର୍ମଚାରୀଙ୍କ ବିରୋଧରେ କି ଆଇନଗତ କାର୍ଯ୍ୟାନୁଷ୍ଠାନ ହେଉଛି ଏବେ ତା ଉପରେ ନଜର ।
ଘଟଣାକୁ ନେଇ ଆହୁରି ତେଜିଛି ରାଜନୀତି । କାଲି ବିଜୁ ମହିଳା ଜନତା ଦଳ ରାସ୍ତାକୁ ଓହ୍ଲାଇବା ପରେ ଆଜି ପ୍ରେସମିଟ୍ କରି ଘଟଣା ପାଇଁ ରାଜ୍ୟ ସରକାରଙ୍କୁ ଜୋରଦାର ନିଶାନା କରିଛି ବିଜେଡି । ଥାନା ଭିତରର ଭିଡିଓ ବାହାରକୁ କେମିତି ଆସିଲା ? ବାର୍ର ସିସିଟିଭି ଫୁଟେଜ୍ ଓ ରାସ୍ତାରେ ଗଣ୍ଡଗୋଳର ଏଡିଟେଡ୍ ଭିଡିଓ କିଏ ଛାଡ଼ିଲା ? ମହିଳା ଜଣଙ୍କ ସାହସର ସହିତ ଦୁର୍ବୃତ୍ତଙ୍କୁ ସାମ୍ନା କରୁଥିବା ବେଳେ ତାଙ୍କୁ ଭିନ୍ନ ଢଙ୍ଗରେ କାହିଁକି ଚିତ୍ରଣ କରାଯାଉଛି? ଭଳି ପ୍ରଶ୍ନବାଣରେ ଛନ୍ଦିଛିବା ସହିତ ଘଟଣାର ନ୍ୟାୟିକ ତଦନ୍ତ ଦାବି କରିଛି ।
ଏଥିସହିତ ଆସନ୍ତା ୨୪ତାରିଖରେ ଭୁବନେଶ୍ବରରେ ସକାଳ ୬ଟାରୁ ଦିନ ଗୋଟାଏ ଯାଏଁ ହରତାଳର ଡାକରା ଦେଇଛି ଦଳ । ଯାହାର କଡ଼ା ଜବାବ ରଖି ବିଜେପି କହିଛି- ଭରତପୁର ଘଟଣାକୁ ସରକାର ଗୁରୁତ୍ବର ସହ ନେଇଛନ୍ତି । ନବୀନଙ୍କ ଭଳି ଚୁପ୍ ନ ରହି, ମୁଖ୍ୟମନ୍ତ୍ରୀ ନିଜେ ତଦାରଖ କରି ଏହା ଉପରେ ମୁହଁ ଖୋଲିଛନ୍ତି, ଦୋଷୀ ନିଶ୍ଚିତ ଦଣ୍ଡ ପାଇବେ । ହେଲେ ବିଜେଡି ଏହାକୁ ଅଯଥା ରାଜନୀତିକରଣ କରି ନିଜ ଉପସ୍ଥିତି ଜାହିର କରିବାକୁ ଚାହୁଁଛି। ଅତୀତରେ ବିଜେଡି ରାଜଧର୍ମ ପାଳନ କରିଥିଲେ ଆଜି ଏଭଳି ପରିସ୍ଥିତି ଉପୁଜିନଥାନ୍ତା ବୋଲି କହିଛି ଶାସକ ଦଳ । ଏସବୁ ଭିତରେ କ୍ରାଇମବ୍ରାଞ୍ଚର ତଦନ୍ତରୁ କି ସତ ବାହାରୁଛି, ଘଟଣାକୁ ନେଇ ଚାଲିଥିବା ରାଜନୀତି କେଉଁ ମୋଡ଼ ନେଉଛି ତା ଉପରେ ନଜର।
