ଋଣ ଚାପ-ପାରିବାରିକ ବିବାଦ ନା ଅନ୍ୟ କିଛି ? ଧର୍ମେନ୍ଦ୍ର ସାହୁ ମୃତ୍ୟୁ ପଛରେ ରହିଛି ଅନେକ ରହସ୍ୟ..

ଋଣ ଟଙ୍କାର ଚାପ, ପାରିବାରିକ ବିବାଦ ନା ଆଉ କିଛି ? ଜିଲ୍ଲା ପରିଷଦ ସଭ୍ୟ ଧର୍ମେନ୍ଦ୍ର ସାହୁଙ୍କ ମୃତ୍ୟୁ ପଛର ରହସ୍ୟ କଣ ? ଗତକାଲି ଜବତ ହୋଇଥିବା ଧର୍ମେନ୍ଦ୍ରଙ୍କ ୨ଟି ମୋବାଇଲକୁ ଯାଞ୍ଚ୍ ପାଇଁ ଫୋରେନ୍‌ସିକ୍ ଲାବକୁ ପଠାଇବା ସହ ସିସିଟିଭି ଫୁଟେଜକୁ ସିଜ୍ କରିଛି କମିଶରେଟ୍ ପୋଲିସ୍ । ସେହିଭଳି ଧର୍ମେନ୍ଦ୍ରଙ୍କ ଘର ଉପର ମହଲାରେ ରହୁଥିବା ରୋଷେୟାଙ୍କ ପରିବାରକୁ ବି ସ୍କାନନରେ ରଖିଛି । ତେଣେ ଘଟଣାରେ ପୁଣିଥରେ ଗଣଶିକ୍ଷା ମନ୍ତ୍ରୀ ତଥା ନିମାପଡ଼ା ବିଧାୟକ ସମୀର ଦାଶଙ୍କ ସଂପୃକ୍ତି ଅଭିଯୋଗ ଆଣି ତାଙ୍କ ଇସ୍ତଫା ଦାବି କରିବା ସହ ତାଙ୍କୁ ତଦନ୍ତ ପରିସରଭୁକ୍ତ କରାଯାଉ ବୋଲି ଦାବି କରିଛନ୍ତି ବିରୋଧୀ ବିଜେପି ଓ କଂଗ୍ରେସ । ତେବେ ମନ୍ତ୍ରୀ ସମୀର ଦାଶ ଏ ଅଭିଯୋଗ ନେଇ ମୁହଁ ଖୋଲିନାହାନ୍ତି ।

Also Read

କଳିଯୁଗରେ ବି ଏମିତି ମଣିଷ ଥାନ୍ତି ! ଗାଁ ସାରା ଲୋକଙ୍କ ମଉଡ଼ମଣୀ, ପହଞ୍ଚିଲେ ଓଠରେ ଆପେ ଖେଳିଯାଏ ହସ

ରାତି ପାହିଲେ ପରୀକ୍ଷା, ହେଲେ ପିଲାଙ୍କ ପାଇଁ ନାହିଁ ପରୀକ୍ଷା ଖାତା

ଦ୍ରୌପଦୀ ଏକ ପ୍ରେରଣାର ନାଁ, ୟାଙ୍କ କାହାଣୀ ଜାଣିଲେ ଆପଣଙ୍କ ଆଖିରୁ ବି ଆସିବ ଲୁହ

ପୁରୀ ଜିଲ୍ଲା ୧୧ ନମ୍ବର ଜୋନ୍ ଜିଲ୍ଲା ପରିଷଦ ସଦସ୍ୟ ଧର୍ମେନ୍ଦ୍ର ସାହୁଙ୍କ ମୃତ୍ୟୁ ପଛର ରହସ୍ୟ ଖୋଲିବ କି ଜବତ ମୋବାଇଲ ? ମୃତ ଧର୍ମେନ୍ଦ୍ର ଓ ତାଙ୍କ ପଡ଼ୋଶୀଙ୍କ ସିିସିଟିଭି ଫୁଟେଜରୁ ମିଳିବ କି ଘଟଣା ପଛର ସତ୍ୟାସତ୍ୟ ? ଧର୍ମେନ୍ଦ୍ରଙ୍କ ରହସ୍ୟଜନକ ମୃତ୍ୟୁକୁ ୩୬ ଘଣ୍ଟା ବିତିଯାଇଥିବା ବେଳେ ମିଳିଥିବା ଦୁଇ ବଡ଼ କ୍ଲୁ ନେଇ ଛାନଭିନ୍ କରୁଛି କମିଶନରେଟ୍ ପୋଲିସ । ଭୁବନେଶ୍ୱର ଡିସିପି କହିଛନ୍ତି, ଗତକାଲି ସନ୍ଧାନୀ କୁକୁର ଦ୍ୱାରା ସ୍ୱିଚ୍ ଅଫ୍ ଅବସ୍ଥାରେ ମିଳିଥିବା ଧର୍ମେନ୍ଦ୍ରଙ୍କ ଦୁଇ ମୋବାଇଲ ଫୋନକୁ ଯାଞ୍ଚ୍ ପାଇଁ ରାଜ୍ୟ ଫୋରେନ୍ସିକ୍ ଲାବକୁ ପଠାଯାଇଛି । ସେହିଭଳି ଘଟଣା ସ୍ଥଳର ସିସିଟିଭି ଡିଭାଇସକୁ ବି ସିଜ୍ ହୋଇଛି । ଘଟଣା ଦିନ ରାତିରେ ଧର୍ମେନ୍ଦ୍ରଙ୍କ ରୋଷେୟା ଏବଂ ତାଙ୍କ ପରିବାର ଉପର ଘରେ ରହୁଥିବାରୁ ସେମାନଙ୍କୁ ବି ସ୍କାନରରେ ରଖିଛି ପୋଲିସ ।

ସେପଟେ ଧର୍ମେନ୍ଦ୍ରଙ୍କ ସନ୍ଦେହଜନକ ମୃତ୍ୟୁ ପରେ ଏହାକୁ ସିଧାସଳଖ ହତ୍ୟା ବୋଲି କହି ଗତକାଲିଠୁ ଗଣଶିକ୍ଷାମନ୍ତ୍ରୀ ସମୀର ରଂଜନ ଦାଶଙ୍କ ବିରୋଧରେ ଯୁଦ୍ଧଂ ଦେହି ଡାକରା ଦେଇ ଆସୁଥିବା ବିଜେପି ଆଜି ଗୋପ୍ ଥାନା ଘେରାଉ କରିଥିଲା । ଥାନା ଆଗରେ ମନ୍ତ୍ରୀଙ୍କ କୁଶପୁତ୍ତଳିକା ଦାହ କରିବା ସହ ମନ୍ତ୍ରୀଙ୍କ ବିରୋଧରେ ଏତଲା ଦେଇ ତାଙ୍କୁ ତଦନ୍ତ ପରିସରଭୁକ୍ତ କରିବାକୁ ଦଳ ଦାବି କରିଛି ।

ସେପଟେ ଘଟଣା ପଛରେ ମନ୍ତ୍ରୀଙ୍କ ଭୂମିକାକୁ ଦାୟୀ କରି ଆଜି ଭୁବନେଶ୍ୱର ଡିସିପିଙ୍କୁ ଏକ ଦାବିପତ୍ର ଦେଇଛି ରାଜ୍ୟ କଂଗ୍ରେସ । ଦଳ ଦାବି କରିଛି ଯେ, ଧର୍ମେନ୍ଦ୍ର ମୃତ୍ୟୁ ପଛରେ ବଡ଼ ଧରଣର ଅର୍ଥ କାରବାର, ପରକୀୟା ପ୍ରୀତି ଏବଂ ରାଜନୈତିକ ବିରୋଧାଭାସ ଭଳି ପ୍ରସଙ୍ଗ ନେଇ ଚର୍ଚ୍ଚା ହେଉଛି । ତେଣୁ ମନ୍ତ୍ରୀଙ୍କୁ ତଦନ୍ତ ପରିସରଭୁକ୍ତ କରି ଉଚ୍ଚସ୍ତରୀୟ ଅଧିକାରୀଙ୍କୁ ଘଟଣାର ତଦନ୍ତ ଭାର ଦିଆଯାଉ ବୋଲି କଂଗ୍ରେସ କହିଛି ।

ଧର୍ମେନ୍ଦ୍ର ସାହୁଙ୍କ ମୃତ୍ୟୁକୁ ନେଇ ଗୋଟିଏ ପରେ ଗୋଟିଏ ଚର୍ଚ୍ଚା ସାମ୍ନାକୁ ଆସୁଥିବାରୁ ଘଟଣାକୁ ନେଇ ରହସ୍ୟ ବଢ଼ିବାରେ ଲାଗିଛି । ପ୍ରଶ୍ନ ଉଠୁଛି ଧର୍ମେନ୍ଦ୍ର ଘରେ ଆତ୍ମହତ୍ୟା କରିଥିବା ବେଳେ ତାଙ୍କ ମୋବାଇଲ ଘରଠୁ କିଛି ଦୂର ଆଉ ଏକ ସ୍ଥାନରୁ ମିଳିଲା କେମିତି ? ରାତି ଅଧରେ ସିସିଟିଭି ଫୁଟେଜରେ ଆସୁଥିବା ଲୋକ କିଏ ଓ କାହିଁକି ଆସିିଥିଲେ ? ଧର୍ମେନ୍ଦ୍ର ୮୦ ଲକ୍ଷ ଟଙ୍କା ଋଣ ଭାରରେ ଥିବା ଚର୍ଚ୍ଚା ହେଉଥିବା ବେଳେ ଏହି ଋଣ ସେ କାହାଠୁ ଓ କଣ ପାଇଁ ଆଣିଥିଲେ ? ଧର୍ମେନ୍ଦ୍ରଙ୍କ ମୋବାଇଲରେ ଦୁଇଟି ଭିଡିଓକୁ ସେ ସାର୍ବଜନୀନ କରିବାକୁ ନିବେଦନ କରିଥିବାରୁ ଏବେ ସେ ନିର୍ଦ୍ଦିଷ୍ଟ ଭିଡିଓର ସ୍ଥିତି କଣ ? ଏସବୁ ଘଟଣାରୁ ପର୍ଦ୍ଦା ହଟାଇବା ଏବେ ପୋଲିସ ପାଇଁ ବଡ଼ ଚ୍ୟାଲେଞ୍ଜ୍ । ଏସବୁ ଭିତରେ ଧର୍ମେନ୍ଦ୍ର ମୃତ୍ୟୁ ପୂର୍ବରୁ ତାଙ୍କ ପୁତୁରା କେଉଁ ପରିସ୍ଥିତିରେ ଘର ଛାଡ଼ିଦେଲେ ସେ ସମ୍ପର୍କରେ ପୋଲିସ ତଦନ୍ତ କରୁ ବୋଲି ଦାବି କରିଛନ୍ତି ତାଙ୍କ ଶ୍ୱଶୁର ।