ଭିକ ବାହାନାରେ ଘରକୁ କରୁଥିଲେ ଟାର୍ଗେଟ୍; ଲୁଟୁଥିଲେ ସୁନା, ବାନ୍ଧିଲା ପୋଲିସ

ଦିନରେ ଭିକ ମାଗି ଘର ଚିହ୍ନଟ କରୁଥିଲେ । ଆଉ ରାତିରେ ଚୋରି କରୁଥିଲେ । ୫ ଜଣିଆ ଚୋର ଗ୍ୟାଙ୍ଗକୁ ଗିରଫ କରି କୋର୍ଟ ଚାଲାଣ କରିଛି ଭଦ୍ରକ ପୋଲିସ । ଭଦ୍ରକ ସାବରଙ୍ଗ ଥାନା ଅଧିନ ଚଣ୍ଡିଗାଁ ରେ ସିରିଜ ଚୋରି ସହ ଘର ସଦସ୍ୟଙ୍କୁ ଆକ୍ରମଣ ଅଭିଯୋଗ ହୋଇଥିଲା ।

ଘଟଣାର ତଦନ୍ତ ପରେ ମୋଟ ୫ ଜଣ ଚୋରଙ୍କ ସହ ଜଣେ ଦୋକାନୀ ମାଲିକକୁ ଗିରଫ କରିଛି ପୋଲିସ । ଗିରଫ ହେଲେ ପଗଡ଼ ଗାଁର ଅଜୁ ଦାସ , ରାଜୁ ଦାସ ଓ ରାମ ଦାସ, କେନ୍ଦ୍ରାପଡା ଅଞ୍ଚଳର ବଳିଆ ଦାସ ଓ ତିହିଡି ଥାନା ଅଞ୍ଚଳର ଦୁଃଖକୁ ଗିରଫ କରାଯାଇଥିଲା । ଏହା ସହ ଚୋରୀ ସୁନା ଗହଣାକୁ କିଣିଥିବା ଦୋକାନୀ ରମାକାନ୍ତ ସାହୁଙ୍କୁ ମଧ୍ୟ ଗିରଫ କରିଛି ସବରଙ୍ଗ ପୋଲିସ ।

ଚୋରି ହୋଇଥିବା ସୁନା ଗହଣା , ନଗଦ ଟଙ୍କା ସହ ମାରଣାସ୍ତ୍ର ଜବତ କରିଛି ପୋଲିସ । ଦିନରେ ଭିକ ମାଗିବା ବାହାନାରେ ଘର ଗୁଡିକର ସ୍ଥିତି ଦେଖୁଥିଲେ ଆଉ ରାତିରେ ସେହି ଘରକୁ ଟାର୍ଗେଟ କରି ଚୋରି କରୁଥିବା ଅଭିଯୁକ୍ତମାନେ ସ୍ୱୀକାର କରିଛନ୍ତି । ଗିରଫ ଅଭିଯୁକ୍ତଙ୍କ ନାଁରେ ପୂର୍ବରୁ ମଧ୍ୟ ବିଭିନ୍ନ ଥାନାରେ ଅପରାଧିକ ମାମଲା ରହିଛି ।

ଘଟଣାରେ ଅନ୍ୟ ଅଭିଯୁକ୍ତଙ୍କ ହାତ ଥିବା ସନ୍ଦେହ କରୁଛି ପୋଲିସ । ସେମାନଙ୍କୁ ଗିରଫ ପାଇଁ ଉଦ୍ୟମ ଜାରି ରହିଛି ବୋଲି ଭଦ୍ରକ ଏସଡିପିଓ କହିଛନ୍ତି।