Oyo Hotel Death Suspense : ଓୟୋ ହୋଟେଲ୍ ଛାତରୁ ଖସି ଯୁବତୀଙ୍କ ମୃତ୍ୟୁ ସସପେନ୍ସ, ହତ୍ୟା ଅଭିଯୋଗ ଆଣିଲେ ପରିବାର

ଭୁବନେଶ୍ବର ଖଣ୍ଡଗିରି ଥାନାଞ୍ଚଳର ଏକ ଓୟୋ ହୋଟେଲ ଛାତରୁ ଖସି ଯୁବତୀଙ୍କ ମୃତ୍ୟୁକୁ ନେଇ ସସ୍ପେସନ୍ସ। ସନ୍ଦେହରେ ପୁରୁଷ ବନ୍ଧୁ। ପରିବାର ଲୋକ ଝିଅକୁ ଛାତରୁ ଠେଲି ମାରି ଦିଆଯାଇଥିବାର ଅଭିଯୋଗ ଆଣିବା ପରେ ପୋଲିସ ପୁରୁଷ ବନ୍ଧୁଙ୍କୁ ଅଟକ ରଖି ତନାଘନା କରୁଛି। ହେଲେ ଏବେ ଯାଏଁ ମୃତ୍ୟୁର କାରଣ ସ୍ପଷ୍ଟ କରିନି ପୋଲିସ୍।

ଖଣ୍ଡଗିରି ଥାନା ପଞ୍ଚସଖା ନଗର ଦାସ ଇନ୍ ଓୟୋ ହୋଟେଲ। ଇଏ ସେହି ରୁମ୍- ନମ୍ବର 301। ଦିନେ କି ଦୁଇ ଦିନ ନୁହେଁ, ମାସ ମାସ ଧରି ଏ ରୁମଟି ବୁକ୍ ହୋଇରହିଛି ନୟାଗଡ଼ର ବିଭୁତି ଭୂଷଣ ପ୍ରତିହାରୀଙ୍କ ନାଁରେ। ଇଏ ସେଇ ବିଭୁତି। କୁହାଯାଉଛି ଏଇ ରୁମକୁ ବରାବର ଆସନ୍ତି, ବିଭୁତିଙ୍କ ସହ ରାତିରେ ଏକାଠି ବି ରୁହନ୍ତି ସେଇ ନୟାଗଡ଼ ଅଞ୍ଚଳର ସୋନାଲି। ସୋନାଲି ମହାପାତ୍ର। ବୁଧବାର ରାତିରେ ମଧ୍ୟ ବିଭୁତିଙ୍କ ପାଖକୁ ଆସିଥିଲେ ସୋନାଲି। ହେଲେ ଉଭୟଙ୍କ ଭିତରେ କଣ ଘଟିଲା କେଜାଣି, ରାତି 11ଟାରେ ହୋଟେଲ ରୁମରୁ ପ୍ରବଳ ପାଟିତୁଣ୍ଡ ଶୁଭିଲା। ପାଖ ରୁମରେ ଥିବା ଲୋକେ ଆସି ଉଭୟଙ୍କୁ ବୁଝାବୁଝି କରିଥିଲେ। କିନ୍ତୁ ରାତି ପ୍ରାୟ ସାଢେ 12 ଟା ବେଳେ ସୋନାଲି ହୋଟେଲ ଛାତରୁ ଖସିପଡୁଥିବା ଦେଖିବାକୁ ମିଳିଥିଲା। ରକ୍ତ ଜୁଡୁବୁଡ଼ୁ ଅବସ୍ଥାରେ ସୋନାଲିଙ୍କୁ ପୋଲିସ ସହାୟତାରେ ଉଦ୍ଧାର କରାଯାଇ ହସ୍ପିଟାଲ ନିଆଯାଇଥିଲା। କିନ୍ତୁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।

ଅଧିକ ପଢ଼ନ୍ତୁ: ‘ପାକିସ୍ତାନ ବଙ୍କରକୁ ଆପଣ ଯେଭଳି ଧ୍ବଂସ କଲେ ସେ ଭୁଲି ପାରିବନି’

କେମିତି ହେଲା ସୋନାଲିଙ୍କ ମୃତ୍ୟୁ ? ହତ୍ୟା, ଆତ୍ମହତ୍ୟା ନା ଦୁର୍ଘଟଣା ? ଏସବୁ ଦିଗକୁ ନେଇ ପୋଲିସ ଖୋଳତାଡ଼ କରୁଥିବାବେଳେ ପୁରୁଷ ବନ୍ଧୁ ବିଭୁତିକୁ ଥାନାରେ ଅଟକ ରଖି ପଚରା ଉଚରା କରୁଛି। ସେପଟେ ଥାନାରେ ପହଞ୍ଚି ସୋନାଲିଙ୍କ ମା କହିଛନ୍ତି, ରାତି 11ଟାରେ ଝିଅ ଫୋନ କରି ସେଠାରୁ ତାକୁ ନେଇଯିବା ପାଇଁ କହିଥିଲା। ହେଲେ କିଛି ସମୟ ପରେ ଆସିଥିଲା ତାର ମୃତ୍ୟୁ ଖବର। ସୋନାଲି ଆତ୍ମହତ୍ୟା କରିନି ବରଂ ତାକୁ ଛାତରୁ ଠେଲି ହତ୍ୟା କରାଯାଇଛି ବୋଲି ସେ ଅଭିଯୋଗ କରିଛନ୍ତି।
ଖଣ୍ଡଗିରି ଥାନାରେ ଏନେଇ ଏକ ମାମଲା ରୁଜୁ ପରେ ପୋଲିସ ସାଇଣ୍ଟିଫିକ୍ ଟିମ୍ ସହାୟତାରେ ତଦନ୍ତ ଆରମ୍ଭ କରିଛି। ସାଇଣ୍ଟିଫିକ୍ ଟିମ୍ ହୋଟେଲ ରୁମ୍, ହୋଟେଲର ଛାତ,ମୃତଦେହ ପଡିଥିବା ସ୍ଥାନ ଆଦି ଦେଖିବା ସହ ତଥ୍ୟ ପ୍ରମାଣ ସଂଗ୍ରହ କରିଛି। ସୋନାଲି ମୃତ୍ୟୁକୁ ନେଇ ସନ୍ଦେହଘେରରେ ଥିବା ପୁରୁଷ ବନ୍ଧୁ ବିଭୁତିର ମୋବାଇଲରୁ କିଛି ଆପତ୍ତିଜନକ ତଥ୍ୟ ପାଇଛି ପୋଲିସ। ଯାହାକୁ ନେଇ ତା ଉପରେ ସନ୍ଦେହ ଆହୁରି ବଢ଼ିଛି।

ଅଧିକ ପଢ଼ନ୍ତୁ: ଅପରେସନ ସିନ୍ଦୂର ପରେ ପରେ ବଦଳୁଛି ରାଜନୈତିକ ସମୀକରଣ: ଯୁଦ୍ଧ ନୁହେଁ ଶାନ୍ତିମୁହାଁ ବିଶ୍ୱ