ପାକିସ୍ତାନରେ ଅପରେଟ୍ ହେଉଛି ଓଡ଼ିଶା ସିମ୍; ଘଟଣା ପଛରେ ଓଡ଼ିଆ ଯୁବକଙ୍କ ସଂପୃକ୍ତି

ଆଳୁ ଖୋଳୁ ଖୋଳୁ ମହାଦେବ ବାହାରିଲା ଭଳି ଓଡ଼ିଶାରେ ସକ୍ରିୟ ଥିବା ସିମ୍ କାର୍ଡ ରାକେଟ ମାମଲାରେ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି । ଓଡ଼ିଶାର ହଜାରେରୁ ଅଧିକ ପ୍ରି-ଆକଟିଭେଟେଡ୍ ସିମ୍ ଅପରେଟ୍ ହେଉଛି ସୁଦୂର ପାକିସ୍ତାନରୁ । ସିମ୍ ଗୁଡ଼ିକୁ ଭାରତ ବିରୋଧୀ ଅପରେସନ ପାଇଁ ପାକିସ୍ତାନର ଗୁଇନ୍ଦା ସଂସ୍ଥା ISI ଶିବିରରୁ ଅପରେଟ୍ କରାଯାଉଛି । ଯାଜପୁର ଜିଲ୍ଲାର ଜଣେ ଅଭିଯୁକ୍ତ ଧରାପଡ଼ିବା ପରେ ଏହି ତଥ୍ୟ ହାତେଇଛି କ୍ରାଇମବ୍ରାଞ୍ଚ STF । ତେବେ କେମିତି ଚାଲୁଛି ଏହି ସିମ୍ ରାକେଟ୍ ? କାହିଁକି ସାଧାରଣ ଓଡ଼ିଆ ଯୁବକ ପାକିସ୍ତାନ ଗୁଇନ୍ଦା ସଂସ୍ଥାର ଲିଙ୍କରେ ଆସୁଛନ୍ତି ?

ଆପଣଙ୍କ ମୋବାଇଲ ପାଇଁ ନେଉଛନ୍ତି କି ନୂଆ ସିମ୍ ? ସହଜରେ ଉପଲବ୍ଧ ହେଉଥିବା ନିର୍ଦ୍ଧିଷ୍ଟ କମ୍ପାନୀ ଗୁଡ଼ିକର ସିମ୍ କିଣିଛନ୍ତି କି ? ଯଦି ହଁ, ତେବେ ସାବଧାନ । ହୁଏତ ପାକିସ୍ତାନୀ ଗୁଇନ୍ଦା ସଂସ୍ଥା ISI ଆପଣଙ୍କ ନାଁରେ ସିମ୍ କାର୍ଡକୁ ଅପରେଟ୍ କରୁଥାଇପାରେ, ଆପଣ ବି ଆସିଯାଇପାରନ୍ତି କ୍ରାଇମବ୍ରାଞ୍ଚର STF ସ୍କାନରରେ । କ୍ରାଇମବ୍ରାଞ୍ଚ STFର ଚାଞ୍ଚଲ୍ୟକର ଖୁଲାସା ପରେ ଏବେ ଏହି ଆଶଙ୍କା ମୁଣ୍ଡ ଟେକିଛି ।

ଯାଜପୁର ଜିଲ୍ଲା ବରି ବ୍ଲକ ରାମଚନ୍ଦ୍ରପୁର ଭୁରୁଙ୍ଗା ଗାଁର ଯୁବକ ପ୍ରୀତମ କର । ଯାହାଙ୍କୁ ଗିରଫ କରିଛି STF । STF ଏସ୍.ପିଙ୍କ କହିବା କଥା, ମୋବାଇଲ୍ ଏବଂ ସିମ୍ କାର୍ଡ ଦୋକାନ କରିଥିବା ପ୍ରୀତମ ଅତି ଚତୁରତାର ସହ ସଂଗ୍ରହ କରିଥିଲା ପ୍ରି-ଆକଟିଭେଟେଡ୍ ସିମ୍ । ଆଉ OTP ଜେନେରେଟ୍ କରି ଏହି ସିମକୁ ଭାରତରେ ସକ୍ରିୟ ISI ଏଜେଣ୍ଟଙ୍କୁ ଦେଇଦେଇଛି ଟଙ୍କା ବିନିମୟରେ । ବଡ଼ କଥା ହେଉଛି, ଗତବର୍ଷ ସଂଘଟିତ ମାଙ୍ଗାଲୋର ବୋମା ବିସ୍ଫୋରଣ ମାମଲାରେ ଓଡ଼ିଶାରୁ ଯାଇଥିବା ପ୍ରି-ଆକଟିଭେଟେଡ୍ ସିମ୍‌କାର୍ଡକୁ ବ୍ୟବହାର କରି ନିଜ ଅପରାଧର ବ୍ଲୁ ପ୍ରିଣ୍ଟ ତିଆରି କରିଥିଲେ ଆତଙ୍କବାଦୀ । ଆଉ ପ୍ରିତମ ହିଁ ଯୋଗାଇଥିଲା ସେହି ସିମ୍ କାର୍ଡ । ଏମିତି କି ନିଜ ଲିଙ୍କରେ ଥିବା ISI ଏଜେଣ୍ଟଙ୍କ ସହିତ ଦୁଇ ଦୁଇ ଥର ବି ସେ ଭେଟିଥିଲା ।

କଟକର ଗତକାଲି ପର୍ଦ୍ଦାଫାସ ହୋଇଥିଲା ଆନ୍ତଃରାଜ୍ୟ ସିମ୍ ରାକେଟ । ଗିରଫ ହୋଇଥିବା ୮ ଅଭିଯୁକ୍ତଙ୍କ ମଧ୍ୟରୁ ୭ ହେଉଛନ୍ତି ଏକ ପ୍ରତିଷ୍ଠିତ ଘରୋଇ ଟେଲିକମ ସଂସ୍ଥାର କର୍ମଚାରୀ । ସେମାନଙ୍କ ଠାରୁ ଜବତ ହୋଇଥିଲା ୧୬ଟି ମୋବାଇଲ୍ ଏବଂ ବିଭିନ୍ନ କମ୍ପାନୀର ୮ଶହଟି ସିମ୍ କାର୍ଡ । ତା’ମଧ୍ୟରେ ଥିଲା ୩୧୧ଟି ପ୍ରି-ଆକ୍ଟିଭେଟେଡ୍ ସିମ୍ । ଏଭଳି ଭାବେ ଘରୋଇ ଟେଲିକମ୍ କମ୍ପାନୀର ଅସାଧୁ କର୍ମଚାରୀଙ୍କୁ ହାତ କରି ପ୍ରି- ଆକ୍ଟିଭେଟେଡ୍ ସିମ୍ ରାକେଟ ଚଳାଉଛନ୍ତି ରାଜ୍ୟର କିଛି ଅଭିଯୁକ୍ତ ।

ପ୍ରଥମେ ନିଜ କିଛି ଯୁବକଙ୍କୁ ରୋଜଗାରର ଲୋଭ ଦେଖାଇ ହ୍ୱାଟସ୍ଆପ୍ ଗ୍ରୁପ ତିଆରି କରନ୍ତି ଅଭିଯୁକ୍ତ । ଏହାପରେ ବିଭିନ୍ନ ଦୋକାନରେ ଗ୍ରାହକ ଦାଖଲ କରିଥିବା ଆବଶ୍ୟକ କାଗଜପତ୍ରକୁ ହାତେଇ ଏବଂ କୌଶଳକ୍ରମେ OTP ଜେନେରେଟ କରି ଆରମ୍ଭ କରନ୍ତି ପ୍ରି-ଆକଟିଭେଟେଡ ସିମ୍ କାର୍ଡର କ୍ରାଇମ୍ ସିଣ୍ଡିକେଟ । ଦେଶ, ବିଦେଶ ସହ ISI ଏଜେଣ୍ଟଙ୍କ ପାଖକୁ ପଠାଇ ସିମ୍ ପିଛା ହଜାରେରୁ ୩୦ ହଜାର ଟଙ୍କା ଯାଏଁ ପାଇଥାଆନ୍ତି । ଏହି ଲିଙ୍କରେ ପ୍ରୀତମକୁ ମିଶାଇ ଇତିମଧ୍ୟରେ ନୟାଗଡ଼ ଓ ଯାଜପୁର ଜିଲ୍ଲାରୁ ୫ଜଣ ଯୁବକଙ୍କୁ ଗିରଫ କରିସାରିଛି STF । ଆଗକୁ ଗିରଫଦାରୀ ସଂଖ୍ୟା ବଢ଼ିବ ବୋଲି କହିଛନ୍ତି STF ଏସପି ।

ସବୁଠୁ ବଡ଼ କଥା ହେଉଛି, ଏହି ସିମ କାର୍ଡ ରାକେଟରେ ସାମିଲ ହେଉଛନ୍ତି ସାଧାରଣ ଓଡ଼ିଆ ଯୁବକମାନେ । ଯେଉଁମାନେ ଜାଣତରେ ହେଉ କି ଅଜାଣତରେ କେଇଟା ଟଙ୍କା ପାଇଁ ଆସିଯାଉଛନ୍ତି ISI ଲିଙ୍କରେ । ଦେଶ ବିରୋଧୀ ଭଳି ସଂଗୀନ କାର୍ଯ୍ୟ କଳାପରେ ରହୁଛନ୍ତି ସଂପୃକ୍ତ । ଯାହାକୁ ନେଇ ଏବେ ଉଦବେଗ ପ୍ରକାଶ ପାଇଥିବାବେଳେ ଏହାର କାରଣ କ’ଣ ? କେମିତି ଏହାକୁ ରୋକାଯାଇପାରିବ ? ସାଧାରଣ ଓଡ଼ିଆ ଯୁବକଙ୍କୁ ଏଭଳି କାର୍ଯ୍ୟରେ ନିୟୋଜନ ପଛରେ ଆଉ କିଏ ଅଛନ୍ତି କି ମାଷ୍ଟରମାଇଣ୍ଡ ? ତାକୁ ନେଇ ଛିଡ଼ା ହୋଇଛି ବଡ଼ ପ୍ରଶ୍ନ ।