Digital Arrest Alert: ସାବଧାନ ! ଡିଜିଟାଲ ଆରେଷ୍ଟ ନାଁରେ ଆପଣଙ୍କୁ ଆସିପାରେ କଲ୍... କ'ଣ କରିବେ ଜାଣନ୍ତୁ...

"ଭାରତୀୟ ଆଇନରେ ଡିଜିଟାଲ୍ ଆରେଷ୍ଟ ଭଳି କୌଣସି ଶବ୍ଦ ନାହିଁ" ବୋଲି କହି ସତର୍କ କରାଇଛି ଓଡ଼ିଶା ପୋଲିସ । ଏଭଳି ସ୍ଥିତିରେ ଯେ କେହି ବି ଫୋନ୍ କରି ଡିଜିଟାଲ ଆରେଷ୍ଟ କଥା କହିବେ ତୁରନ୍ତ ନିକଟସ୍ଥ ଥାନା ବା ୧୯୩୦ ନମ୍ବରରେ କଲ୍ କରି ଜଣାଇବାକୁ ପୋଲିସ ପକ୍ଷରୁ ଅପିଲ କରାଯାଇଛି । ସୋସିଆଲ ମିଡିଆ ‘ଏକ୍ସ’ରେ ଏନେଇ ପୋଷ୍ଟ କରି ସଚେତନ ରହିବାକୁ ପରାମର୍ଶ ଦେଇଛି ଓଡ଼ିଶା ପୋଲିସ । ଆଜିକା ଦିନରେ ସାଇବର ଅପରାଧୀମାନେ ବିଭିନ୍ନ ଉପାୟରେ ଠକୁଛନ୍ତି । ନ୍ୟାୟିକ ଅଧିକାରୀ, ପୋଲିସ, CBI, କଷ୍ଟମ୍ସ ଅଧିକାରୀ କହି ଠକୁଛନ୍ତି । ଏଭଳି ଫୋନ କଲ ଆସିବା ମାତ୍ରେ ତୁରନ୍ତ ନିକଟସ୍ଥ ଥାନା କିମ୍ବା ୧୯୩୦କୁ ଯୋଗାଯୋଗ କରି ଅଭିଯୋଗ କରିବାକୁ ପୋଲିସ ପକ୍ଷରୁ ଅପିଲ କରାଯାଇଛି । ଏଭଳି ଫୋନ କଲ ଆସିବା ମାତ୍ରେ, ସଙ୍ଗେ ସଙ୍ଗେ ଅଣଦେଖା କରନ୍ତୁ ବୋଲି ଓଡ଼ିଶା ପୋଲିସ ପକ୍ଷରୁ ପୋଷ୍ଟ କରାଯାଇଛି।

ଡିଜିଟାଲ ଆରେଷ୍ଟ

'ଡିଜିଟାଲ ଆରେଷ୍ଟ' ଭଳି କୌଣସି ଶବ୍ଦ ଆଇନରେ ନାହିଁ । ହେଲେ ଆଜିର ଡିଜିଟାଲ ଯୁଗରେ ଅନଲାଇନରେ କୋର୍ଟରେ ହାଜର ହେବାକୁ କହି ଲୋକଙ୍କୁ ଭୁଆଁ ବୁଲାଉଛନ୍ତି ଅପରାଧୀ । ଏହି ସାଇବର ଫ୍ରଡ୍‌ମାନେ ମୁଖ୍ୟତଃ ନିଜକୁ କୌଣସି ପୋଲିସ ଅଧିକାରୀଙ୍କ ପରିଚୟ ଦେଇ ଡିଜିଟାଲ ଆରେଷ୍ଟ କରାଯାଇଥିବା କହି ପରେ ଆକାଉଣ୍ଟରୁ ଟଙ୍କା ଚଳୁ କରିଥାନ୍ତି । ଅନଲାଇନ ଠକ ଏହି 'ଡିଜିଟାଲ ଆରେଷ୍ଟ' ଶବ୍ଦକୁ ମାଧ୍ୟମ କରି ବିଭିନ୍ନ ଆଳ ଦେଖାଇ ଠକେଇ କରିଥାନ୍ତି । ଯେତେବେଳେ କି ଏପରି କୌଣସି ଶବ୍ଦ ଭାରତୀୟ ଆଇନରେ ନଥିବା ସ୍ପଷ୍ଟ କରାଯାଇଛି । ଏପରିକି ଗତ କିଛି ମାସ ହେବ କାହାକୁ କଲ୍ ଲଗାଇବା ମାତ୍ରେ କଲର୍ ଟ୍ୟୁନ ଜରିଆରେ ମଧ୍ୟ ଏହି ସାଇବର ଫ୍ରଡ୍ ପ୍ରତି ସଚେତନ ରହିବାକୁ କୁହାଯାଉଛି । 

ଅଧିକ ପଢନ୍ତୁ : ଡିଜିଟାଲ ଆରେଷ୍ଟ; ଠକି ନେଲେ ୫୦ ଲକ୍ଷ, ଜୀବନ ହାରିଲେ ସ୍ବାମୀ-ସ୍ତ୍ରୀ...