LIVE TV
ବୀଭତ୍ସ, ଭୟଙ୍କର ଆଉ ଚିନ୍ତାଜନକ। ଦ୍ବିତୀୟ ବିବାହ କରିବାକୁ ପ୍ରଥମ ସ୍ତ୍ରୀଙ୍କ ଦୁଇ ପୁଅଙ୍କୁ ହତ୍ୟା କରି ଝୁଲାଇଦେଲା ବାପା ! ଏଭଳି ସଂଗୀନ ଅଭିଯୋଗ ଆସିଛି ନୟାଗଡ଼ ଜିଲ୍ଲା ଫତେଗଡ଼ରୁ । ସନ୍ଦେହଜନକ ଅବସ୍ଥାରେ ଉଦ୍ଧାର ହୋଇଛି ଦୁଇ ନାବାଳକ ପୁଅଙ୍କ ଝୁଲନ୍ତା ମୃତଦେହ । ଦୁଇ ପୁଅ ଥିବାରୁ କେହି ଝିଅ ଦେଉନଥିବାରୁ ବାପା ହିଁ ଉଭୟଙ୍କୁ ହତ୍ୟା କରିଥିବା ମୃତକଙ୍କ ମାମୁ ଅଭିଯୋଗ କରିଥିବାବେଳେ ଅଭିଯୁକ୍ତ ବାପାକୁ ଅଟକ ରଖି ତନାଘନା ଚଳାଇଛି ନୟାଗଡ଼ ପୋଲିସ ।
୧୪ ବର୍ଷୀୟ ଆକାଶ ମହାନ୍ତି, ୧୧ ବର୍ଷୀୟ ବିକାଶ ମହାନ୍ତି । ମାଆ ଛେଉଣ୍ଡ ଦୁଇ ଭାଇ । ଜୀବନକୁ ଚିହ୍ନିବା ଆଗରୁ କଣ ଯେ ହେଲା ଏମାନଙ୍କ ଜୀବନ ସହ ସେକଥା କେବଳ ଭଗବାନଙ୍କୁ ହିଁ ଜଣା । କାରଣ ସକାଳୁ ସକାଳୁ ଦୁହିଁଙ୍କୁ ନେଇ ନୟାଗଡ଼ରେ ଖେଳିଯାଇଛି ଚାଞ୍ଚଲ୍ୟ । ସନ୍ଦେହଜନକ ଅବସ୍ଥାରେ ଉଦ୍ଧାର ହୋଇଛି ଦୁଇ ଭାଇଙ୍କ ଝୁଲନ୍ତା ମୃତଦେହ । ନୟାଗଡ଼ ଜିଲ୍ଲା ଫତେଗଡ଼ ଧାନଚାଙ୍ଗଡ଼ା ଗାଁରେ ଘଟିଯାଇଛି ଏଭଳି ଅଭାବନୀୟ ଘଟଣା । ଦୁଇ ନାବାଳକ ପୁଅଙ୍କର ମୃତ୍ୟୁକୁ ନେଇ ନାନା ଚର୍ଚ୍ଚା ଆଲୋଚନା ଭିତରେ ସିଧାସିଧା ହତ୍ୟା ଅଭିଯୋଗ ଆଣିଛନ୍ତି ମୃତକଙ୍କ ମାମୁଘର ଲୋକ । ମୃତକଙ୍କ ମାମୁଙ୍କ କହିବା ଅନୁସାରେ, ସ୍ତ୍ରୀଙ୍କ ମୃତ୍ୟୁ ପରେ ଦୁଇ ଛୁଆଙ୍କ ବାପା ଅଚ୍ୟୁତ ମହାନ୍ତି ଦ୍ବିତୀୟ ବିବାହ କରିବାକୁ ଚାହୁଁଥିଲେ । ଏଥିରେ ଦୁଇ ପିଲା କଣ୍ଟା ହେବାରୁ ସେମାନଙ୍କୁ ରାସ୍ତାରୁ ହଟାଇଦେବାକୁ ଯୋଜନା କରିଥିଲେ । ଗତକାଲି ଉଭୟଙ୍କୁ ହତ୍ୟା କରିବା ପରେ ଆତ୍ମହତ୍ୟାର ରୂପ ଦେବାକୁ ଚେଷ୍ଟା କରିଛନ୍ତି । ମୃତକଙ୍କ ଆଈ ଓ ଗ୍ରାମବାସୀ ବି ସମାନ ସନ୍ଦେହ କରୁଛନ୍ତି ।
Also Read
ଅଧିକ ପଢ଼ନ୍ତୁ: ବାଲି ମାଫିଆଙ୍କ ସାଂଘାତିକ କାରନାମା, ବଦଳାଇଦେଲେ ନଈର ଗତିପଥ
ସୂଚନା ଅନୁସାରେ, ୩ ବର୍ଷ ତଳେ ପ୍ରକାଶଙ୍କ ସ୍ତ୍ରୀଙ୍କ ମୃତ୍ୟୁ ହୋଇଥିଲା । ଗତକାଲି ପ୍ରକାଶଙ୍କ ଦ୍ବିତୀୟ ବିବାହ ପାଇଁ ପ୍ରସ୍ତାବ ଆସିଥିଲା । ଏହାପରେ ପ୍ରକାଶଙ୍କ ଦୁଇ ପୁଅ ବେକରେ ଲୁଗା ବାନ୍ଧି ଝୁଲି ପଡ଼ିଥିବା ମୃତକଙ୍କ ଜେଜେ କହିଛନ୍ତି। ଫତେଗଡ଼ ଥାନା ପୋଲିସ ମୃତଦେହ ଉଦ୍ଧାର କରିବା ସହ ବାପା ପ୍ରକାଶ ମହାନ୍ତିଙ୍କୁ ଅଟକ ରଖି ତଦନ୍ତ କରୁଛି । ଘଟଣାସ୍ଥଳରେ ସାଇଣ୍ଟିଫିକ୍ ଟିମ୍ ଓ ନୟାଗଡ଼ ଏସପି ପହଞ୍ଚି ଅଧିକ ତଦନ୍ତ କରିଛନ୍ତି। ପୋଷ୍ଟମର୍ଟମ ରିପୋର୍ଟ ଓ ପ୍ରାଥମିକ ତତନ୍ତ ପରେ ପ୍ରକୃତ ତଥ୍ୟ ସାମ୍ନାକୁ ଆସିବ ବୋଲି କହିଛନ୍ତି ଏସପି ।
ତେବେ ଦୁଇ ପୁଅଙ୍କ ମୃତ୍ୟୁର ସତ କଣ ? କଅଁଳ ବୟସରେ ଏମାନଙ୍କ ମୁଣ୍ଡରେ ଆତ୍ମହତ୍ୟାର ଚିନ୍ତା ଆସିବ କେମିତି ? ଝୁଲନ୍ତା ମୃତଦେହ ହାତକୁ ପଛ ବାନ୍ଧିଥିଲା କିଏ ? ଦ୍ବିତୀୟ ବିବାହ ରାସ୍ତାରୁ କଣ୍ଟା ହଟାଇବାକୁ ଜନ୍ମିତ ପିଲାଙ୍କୁ ମାରିଦେଇନାହାନ୍ତି ତ ବାପା ? ଏମିତି ପୁଳାପୁଳା ପ୍ରଶ୍ନ ଭିତରେ ସତ ଅପେକ୍ଷାରେ ସମସ୍ତେ...
