Loot For Honeymoon: ଛାଡିଗଲା ହନିମୁନ୍ ନିଶା, ଅଫିସରଙ୍କ ଘରୁ ଲୁଟ୍ କରି ଜେଲରେ ନବବିବାହିତ

ବିଦେଶକୁ ହନିମୁନରେ ଯିବାକୁ ପ୍ଲାନିଂ କରୁଥିବା ନବବିବାହିତ ଦମ୍ପତି ସାଧାରଣତଃ ପର୍ସନାଲ ଲୋନ୍ କରିଥାଆନ୍ତି । କିନ୍ତୁ ହନିମୁନ୍ ପାଇଁ ଟଙ୍କା ଯୋଗାଡ କରିବାକୁ ଜଣେ ଯୁବକ ଅପରାଧ କରିବାକୁ ପଛାଇଲା ନାହିଁ । କପିଳ କାଶ୍ୟପ ନାମକ ଏହି ଯୁବକ ଏସି ମେକାନିକର ପରିଚୟ ଦେଇ ଜଣେ ସରକାରୀ ଅଫିସରଙ୍କ ଘରେ ପଶିଲା । ଘରେ ସେତେବେଳେ ଏହି ସରକାରୀ ଅଧିକାରୀଙ୍କ ପତ୍ନୀ ଏକୁଟିଆ ଥିଲେ । ସଚିବାଳୟରେ ଚାକିରି କରୁଥିବା ଏହି ଅଧିକାରୀ ଜଣକ ସେହି ସମୟରେ ଡ୍ୟୁଟିରେ ଥିଲେ ।

ଘର ଭିତରକୁ ଅଭିଯୁକ୍ତ କପିଳ ଓ ତାର ଜଣେ ସାଙ୍ଗ ପଶିଥିଲେ । ଆଗ ସେମାନେ ଅଧିକାରୀଙ୍କ ପତ୍ନୀଙ୍କ ବେକରେ ଛୁରି ଲଗାଇ ଦେଇଥିଲେ । ତାଙ୍କ ତଣ୍ଟିରୁ ରକ୍ତ ବାହାରିବା ପରେ ତାଙ୍କ ମୁଣ୍ଡକୁ କାନ୍ଥରେ ପିଟି ଦେଇଥିଲେ । ମହିଳାଜଣକ ତଳେ ପଡିଯିବା ପରେ ଦୁଇ ଅଭିଯୁକ୍ତ କପିଳ ଓ ଧୀରଜ ତାଙ୍କ ଘରୁ ଟଙ୍କା ଓ ସୁନା ଅଳଙ୍କାର ଲୁଟି ନେଇ ଫେରାର୍ ହୋଇଯାଇଥିଲେ । ଏପରିକି ମହିଳାଙ୍କ ବେକରୁ ସୁନା ଚେନ୍ ଓ କାନ ରିଙ୍ଗ୍ ନେଇଯାଇଥିଲେ ।

ପୋଲିସ ଏହି ଘଟଣାର ତଦନ୍ତ କରି କପିଳକୁ ଗିରଫ କରିଛି । ପୋଲିସ ନିକଟରେ କପିଳ ସ୍ୱୀକାର କରିଛି ଯେ  ୨୦ ଦିନ ତଳେ ସେ ଜଣେ ନାବାଳିକାକୁ ବିବାହ କରିଛି । ବାହାଘର ପରେ ସେମାନେ ସ୍ୱିଜରଲାଣ୍ଡ ହନିମୁନ୍ ପାଇଁ ଯିବାକୁ ଚାହୁଁଥିଲେ । ଏହି ଲୁଟ୍ ଅର୍ଥରେ ସେମାନେ ବିଦେଶ ଗସ୍ତରେ ଯାଇଥାଆନ୍ତେ । ହେଲେ ଗିରଫ ହେବା ପରେ କପିଳକୁ ଜେଲକୁ ପଠାଇ ଦିଆଯାଇଛି । ତାର ହନିମୁନ୍ ସ୍ୱପ୍ନ ସ୍ୱପ୍ନରେ ରହିଯାଇଛି ।

ଏହି ଅପରାଧ କରିବାକୁ ତାଙ୍କର ସାହସ ନଥିଲା । ତେଣୁ ସେମାନେ ନିଶା ସେବନ କରିଥିଲେ । ଲୁଟ୍ କରିବା ପୂର୍ବରୁ ସେମାନେ ଏହି ଅଞ୍ଚଳରେ ରେକି କରିଥିଲେ । ଏହି ଘରଟିକୁ ସେମାନେ ସଫ୍ଟ ଟାର୍ଗେଟ୍ କରିଥିଲେ । ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି, ଦୁଇ ଅଭିଯୁକ୍ତ ହେଉଛନ୍ତି ଡ୍ରଗ ଆଡିକ୍ଟ । କପିଳ ନାମରେ ଆଗରୁ ୬ଟି ଚୋରି କେଶ୍ ରହିଛି । ଦୁଇ ଜଣଙ୍କୁ ଗିରଫ କରାଯାଇଛି । ସେମାନଙ୍କ ବିରୋଧରେ ଗୁଣ୍ଡା ଆକ୍ଟ ମଧ୍ୟ ଲଗାଯିବ । ସିସିଟିଭି ଫୁଟେଜ ଯାଞ୍ଚ କରି ପୋଲିସ କପିଳ ପାଖରେ ପହଞ୍ଚି ପାରିଥିଲା ବୋଲି ସେ କହିଛନ୍ତି । ଲକ୍ଷ୍ନୌ ଇନ୍ଦିରାନଗରରେ ଘଟିଛି ଏହି ଘଟଣା ।

ଅଧିକ ପଢ଼ନ୍ତୁ: ଦୁର୍ଘଟଣା ଷଡ଼ଯନ୍ତ୍ର ପାଇଁ ୯ ସୁପାରି କିଲରଙ୍କୁ ଦାୟିତ୍ୱ