ଯୁବକଙ୍କ 420 ଦିମାଗ୍‌; ହାପ୍‌ ପ୍ୟାଣ୍ଟ ପିନ୍ଧି ଆସିଲେ, ଲୁଟିଲେ ନୂଆ ଜିନ୍ସ ଏବଂ ଟି-ସାର୍ଟ

ଧରାପଡ଼ିଲା କାରସଦୀ... ଆସିଥିଲେ ହାପ୍‌ ପ୍ୟାଣ୍ଟ ପିନ୍ଧି... ନେଉଥିଲେ ନୂଆ ଜିନ୍ସ ଏବଂ ଟି-ସାର୍ଟ । ଭାବିଥିଲେ ଦଶହରା ବଜାର ଭିଡ଼ରେ କେହି ଜାଣି ପାରିବେନି । ସେଥିଲାଗି ପୁରୁଣା ଉପରେ ନୂଆ ପ୍ୟାଣ୍ଟ୍ ପିନ୍ଧି ଖସିଯିବାକୁ ଯୋଜନା କରିଥିଲେ ।

ଯୁବକ ଜଣକ ଧରାପଡ଼ିଯିବା ପରେ ନିଜର ଭୁଲ ହୋଇଯାଇଛି ବୋଲି କହୁଛନ୍ତି । ନିଜର ଦୋଷ ମଧ୍ୟ ସ୍ୱୀକାର କରୁଛନ୍ତି । ହେଲେ ସେଠାରେ ଉପସ୍ଥିତ ଥିବା ଲୋକମାନେ ତାଙ୍କୁ ସବକ୍‌ ଶିଖାଇଛନ୍ତି । ଗୋଟିଏ ପରେ ଗୋଟିଏ ପ୍ୟାଣ୍ଟ ତା’ର ଦେହରୁ ଉତାରୁଛନ୍ତି । ଭିଡିଓରେ ଦେଖିବାକୁ ମିଳୁଛି, ନିଜର ଚୋରିକୁ ଯେପରି କେହି ନଜାଣିପାରିବେ ସେଥି ଲାଗି ହାପ୍‌ ପ୍ୟାଣ୍ଟ ଉପରେ ଗୋଟିଏ ଉପରେ ଆଉ ଗୋଟିଏ ଜିନ୍ସ ପିନ୍ଧିଛନ୍ତି । ସେହିପରି ପୁରୁଣା ଟି-ସାର୍ଟ କାଢି ଦୁଇଟି ଟି-ସାର୍ଟ ପିନ୍ଧିଛନ୍ତି ।

ଆଉ ଖସିବାକୁ ଉଦ୍ୟମ କରୁଥିବାବେଳେ ଯୁବକଙ୍କ ପଡ଼ିଗଲା ବେଳା ଖରାପ । ଧରାପକାଇଦେଲା ବାର୍‌କୋଡ୍‌ ଡିଟେକ୍ଟର । ବାର୍‌କୋଡ୍‌ ଡିଟେକ୍ଟରର ସାଉଣ୍ଡ ବାଜି ଉଠିବା କ୍ଷଣି ସୋ’ ରୁମ୍‌ କର୍ମଚାରୀ ସତର୍କ ହୋଇଯାଇଥିଲେ । ଆଉ ସଂପୃକ୍ତ ଯୁବକକୁ ଧରିବା ସହ ଚେଞ୍ଜିଙ୍ଗ୍‌ ରୁମ୍‌କୁ ନେଇଯାଇଥିଲେ । ଆଉ ସେଠାରେ ଯାହା ହୋଇଥିଲା ସବୁ କିଛି ଆପଣଙ୍କ ସାମ୍ନାରେ ।

ଯୁବକଙ୍କ ନିକଟରୁ ଦୁଇଟି ଜିନ୍ସ ପ୍ୟାଣ୍ଟ, ଟି-ସାର୍ଟ ଓ ହାପ୍‌ ପ୍ୟାଣ୍ଟ ଜବତ କରାଯାଇଛି । ପରେ ପରେ ଯୁବକ ଜଣକୁ କ୍ୟାପିଟାଲ ଥାନାକୁ ହସ୍ତାନ୍ତର କରାଯାଇଛି । ନିକଟରେ ନୟାପଲ୍ଲୀ ଥାନା ଅଧୀନରେ ଏହିପରି ଚୋରି କରାଯାଉଥିବା ଏକ ଘଟଣା ନଜକୁ ଆସିଥିଲା । ମହିଳା ରାକେଟ ଧରାପଡ଼ିଥିଲା । ସେମାନେ ଶାଢ଼ି ଭିତରେ ସାମଗ୍ରୀ ଲୁଚାଇ ନେଉଥିବା ବେଳେ ଧରିଥିଲା ସିସିଟିଭି ।