Looteri Dulhan: ୮ ପୁରୁଷଙ୍କୁ ବିବାହ କରି ଲକ୍ଷାଧିକ ଟଙ୍କା ଲୁଟି ନେଲେ ‘ଲୁଟେରୀ ଦୁଲହନ’

ନାଗପୁରରୁ ଏକ ଆଶ୍ଚର୍ଯ୍ୟଜନକ ମାମଲା ସାମ୍ନାକୁ ଆସିଛି। ଜଣେ ମହିଳା ଅନେକ ପୁରୁଷଙ୍କୁ ବିବାହ କରି ସେମାନଙ୍କ ଠାରୁ ବିପୁଳ ଅର୍ଥ ଲୁଟ କରିବାର ଘଟଣା ସାମନାକୁ ଆସିଛି। ସମୀରା ନାମ୍ନୀ ଏହି ମହିଳା ସୋସିଆଲ ମିଡିଆ ଏବଂ ଶାଦି ଡଟ କମ ଭଳି ଓ୍ଵେବସାଇଟରେ ସକ୍ରିୟ ଥିଲେ। ସେ ନିଜକୁ ଛାଡପତ୍ର ପ୍ରାପ୍ତ ବୋଲି କହି ଧନୀ ଓ ଶିକ୍ଷିତ ପୁରୁଷମାନଙ୍କ ସହ ସମ୍ପର୍କ ବଢ଼ାଉଥିଲେ। ତା’ପରେ କଥାବାର୍ତ୍ତା ମଧ୍ୟରେ ବିବାହର କଥା ଉଠାଉଥିଲେ ଏବଂ ଉକ୍ତ ବ୍ୟକ୍ତିଙ୍କୁ ବିଶ୍ୱାସ ଯୋଗାଉଥିଲେ ଯେ ସେ ଏକ ଭଲ ଜୀବନ ଚାହୁଁଛନ୍ତି। କିନ୍ତୁ ତାଙ୍କର ପ୍ରକୃତ ଉଦ୍ଦେଶ୍ୟ କିଛି ଅଲଗା ଥିଲା।

ପୁଲିସ ଅନୁଯାୟୀ, ସମୀରାର ଅସଲ ଉଦ୍ଦେଶ୍ୟ ପ୍ରେମ କିମ୍ବା ବିବାହ ନଥିଲା, ବରଂ ଟଙ୍କା ହଡ଼ପ କରିବା ଥିଲା। ସେ ଏଯାଏ ୮ ଜଣ ଭିନ୍ନ ଭିନ୍ନ ପୁରୁଷଙ୍କ ସହ ବିବାହ କରିଛନ୍ତି ଏବଂ ସେମାନଙ୍କ ସହ ଠକେଇ କରିଛନ୍ତି। ସମସ୍ତେ ଭଲ ଘରରୁ ଆସିଥିଲେ, କେହି ବ୍ୟବସାୟୀ ଥିଲେ ତ କେହି ବ୍ୟାଙ୍କ ମ୍ୟାନେଜର ଥିଲେ।

ସମୀରା ପ୍ରଥମେ ସୋସିଆଲ ମିଡିଆ କିମ୍ବା ବିବାହ ସମ୍ବନ୍ଧୀୟ ଓ୍ଵେବସାଇଟରେ ଲୋକଙ୍କ ସହ ଯୋଗାଯୋଗ କରୁଥିଲେ। ସେ ନିଜର ଦୁଃଖ କହୁଥିଲେ। ଯେମିତି ତାଙ୍କର ଛାଡପତ୍ର ହୋଇଯାଇଛି। ସେ ଏକା ଅଛନ୍ତି ଏବଂ ଜଣେ ଭଲ ଜୀବନସାଥୀ ଚାହୁଁଛନ୍ତି। ଯେତେବେଳେ ସାମ୍ନାରେ ଥିବା ବ୍ୟକ୍ତି ଭାବୁକ ହୋଇଯାଉଥିଲେ, ସେ ତାଙ୍କ ସହ ବିବାହର କଥା ଆଲୋଚନା କରୁଥିଲେ।

ତା’ପରେ ବିବାହର କିଛି ଦିନ ପର୍ଯ୍ୟନ୍ତ ସବୁକିଛି ଠିକ୍‌ ଚାଲୁଥିଲା। ସେ ଘର ସଜାଇବାର ନାଟକ କରୁଥିଲେ, ପରିବାର ସହ ମିଶୁଥିଲେ ଏବଂ ବିଶ୍ୱାସ ଜିତୁଥିଲେ। କିନ୍ତୁ କିଛି ସପ୍ତାହ ପରେ ସେ ନିଜର ପ୍ରକୃତ ରୂପ ଦେଖାଉଥିଲେ। ସେ ସ୍ୱାମୀଙ୍କଠାରୁ ଟଙ୍କା ମାଗୁଥିଲେ, ଛୋଟ ଛୋଟ ବିଷୟରେ ଝଗଡ଼ା କରୁଥିଲେ ଏବଂ ଧମକ ଦେଉଥିଲେ ଯେ “ଯଦି ଟଙ୍କା ନ ଦିଅ, ତେବେ ମୁଁ ପୁଲିସ କେସ କରିବି।”

ଯେତେବେଳେ ସ୍ୱାମୀ ବିରକ୍ତ ହୋଇ ତାଙ୍କୁ ଟଙ୍କା ଦେଉଥିଲେ, ସେ ହଠାତ୍‌ ଗାୟବ ହୋଇଯାଉଥିଲେ। କେତେବେଳେ ସେ ମିଛ କେସ ମଧ୍ୟ କରୁଥିଲେ, ଯାହା ଦ୍ୱାରା ସାମ୍ନାରେ ଥିବା ବ୍ୟକ୍ତି ଭୟଭୀତ ହେଉଥିଲେ ଏବଂ ତାଙ୍କୁ ଟଙ୍କା ଦେଉଥିଲେ। ଏହିପରି ସେ ପ୍ରତ୍ୟେକ ବିବାହକୁ ଏକ ଯୋଜନା ଭାବେ ବ୍ୟବହାର କରି ଲକ୍ଷ ଲକ୍ଷ କିମ୍ବା କୋଟି କୋଟି ଟଙ୍କା ରୋଜଗାର କରିଥିଲେ।

୨୦୨୩ ମାର୍ଚ୍ଚରେ ଗୁଲାମ ପଠାନଙ୍କ ଦ୍ୱାରା ଗିଟିଖାଦାନ ପୋଲିସ ଷ୍ଟେସନରେ ଦାଖଲ କରାଯାଇଥିବା ଅଭିଯୋଗ ଅନୁଯାୟୀ, ସମୀରା ୨୦୧୦ ମସିହାରୁ ଅନେକ ପୁରୁଷଙ୍କୁ ବିବାହ କରିଥିଲେ ଏବଂ ସେମାନଙ୍କଠାରୁ ଟଙ୍କା ନେଇଥିଲେ। ସେ କହିଥିଲେ ଯେ ସେ ତାଙ୍କୁ ଏବଂ ଅନ୍ୟମାନଙ୍କଠାରୁ ପ୍ରାୟ ୫୦ ଲକ୍ଷ ଟଙ୍କା ଠକିଥିଲେ ଏବଂ ସେ ୧୦ ଲକ୍ଷ ଟଙ୍କାର ପ୍ରମାଣ ଦେଇଛନ୍ତି।

ପୋଲିସ ଆହୁରି ମଧ୍ୟ କହିଛି ଯେ ସମୀରା ଜଣେ ସ୍କୁଲ ଶିକ୍ଷୟିତ୍ରୀ ଭାବରେ କାମ କରୁଥିଲେ। ନାଗପୁରରେ ଏକ ଚା ଦୋକାନରେ ଲୁଚି ଥିବା ବେଳେ ତାଙ୍କୁ ଗିରଫ କରାଯାଇଥିଲା। କୋର୍ଟରେ ହାଜର କରାଯିବା ପରେ ତାଙ୍କୁ ତିନି ଦିନର ପୁଲିସ ହେପାଜତକୁ ପଠାଯାଇଛି।

ଅଧିକ ପଢ଼ନ୍ତୁ: ABCD ଶିଖିବା ପାଇଁ ୨.୫ ଲକ୍ଷ! ସ୍କୁଲରେ ନର୍ସରୀ ଫି ଦେଖି ଚିନ୍ତାରେ ବାପା ମାଆ