LIVE TV
ଭୁବନେଶ୍ୱର: ଖେଳଣା ବନ୍ଧୁକରେ ବ୍ୟାଙ୍କ ଲୁଟ୍ ଖେଳ ଖତମ୍। ୪୫ ମିନିଟ୍ ଧରି ଲୁଟ୍ ଅପରେସନର ଟେର ପାଇଲାନି ପୋଲିସ୍। ହେଲେ ସ୍ଥାନୀୟ ଅଞ୍ଚଳର ୭ ଯୁବକ ଲୁଟେରାକୁ କାବୁ କଲେ, ବହେ ଛେଚିଲେ। ଏହି ଘଟଣା ଘଟିଛି ରାଜଧାନୀ ଉପକଣ୍ଠ ବାଲିଅନ୍ତା ଥାନା ଅଟଳା ଏସବିଆଇ ଶାଖାରେ। ସମୟ ସନ୍ଧ୍ୟା ପ୍ରାୟ ୬ଟା। କର୍ମଚାରୀମାନେ ବ୍ୟାଙ୍କ ବନ୍ଦ କରିବାକୁ ପ୍ରସ୍ତୁତ ହେଉଥିବାବେଳେ ଗ୍ରାହକ ସାଜି ଭିତରେ ବସିଥିବା ଲୁଟେରାକୁ ବାହାରକୁ ଯିବାକୁ କହିଥିଲେ। ହେଲେ ଲୁଟେରା ହଠାତ୍ ଏକ ବନ୍ଧୁକ ଓ ଛୁରି ଦେଖାଇ ପ୍ରଥମେ ଜଣେ କର୍ମଚାରୀଙ୍କୁ ଭୟଭୀୟ କରିଥିଲା। ତାପରେ ଜଣ ଜଣ କରି ଦୁଇ ମହିଳାଙ୍କ ସମେତ ଅନ୍ୟ ୩ଜଣ କର୍ମଚାରୀଙ୍କୁ ପଛରୁ ହାତ ବାନ୍ଧି ଆଣ୍ଠୁଆ ବସାଇଥଲା।
ଆଉ ଆରମ୍ଭ କରି ଦେଇଥିଲା ଲୁଟପାଟ୍। ପ୍ରଥମେ କ୍ୟାସ ବାକ୍ସରେ ଥିବା ୮ଲକ୍ଷ ୬୦ହଜାରରୁ ଅଧିକ ଟଙ୍କା ସାଥିରେ ଆଣିଥିବା ଏକ ବ୍ୟାଗ୍ରେ ଭର୍ତ୍ତି କରିଥିଲା। ତାପରେ କର୍ମଚାରୀଙ୍କୁ ଲକର ଚାବି ମାଗି ସେଥିରୁ ପ୍ରାୟ ୮ଲକ୍ଷରୁ ଅଧିକ ଟଙ୍କାର ସୁନା ଗହଣା ବି ଲୁଟ୍ କରିଥିଲା। ପାଖାପାଖି ୪୫ ମିନିଟ୍ର ଲୁଟ୍ ଅପରେସନ ପରେ ଲୁଟେରା ଖସି ଯାଉଥିବାବେଳେ ବ୍ୟାଙ୍କ କର୍ମଚାରୀ ପାଟି କରିବାରୁ ସେଠି ଖେଳୁଥିବା ଜଣେ ଯୁବକ ଲୁଟେରାକୁ ବ୍ୟାଟ୍ରେ ପିଟିଥିଲେ। ଏହାପରେ ଲୁଟେରା ପାଖ ବିଲ ଭିତରକୁ ପଶିଯିବା ପରେ ତାକୁ ଗୋଡ଼େଇ ଧରିଥିଲେ ୭ଜଣ ଯୁବକ। ବହେ ଛେଛିଥିଲେ, ପୋଲିସକୁ ହସ୍ତାନ୍ତର କରିଥିଲେ। ପୋଲିସ ଲୁଟେରାକୁ ଗିରଫ କରିବା ସହ ତାଠାରୁ ଲୁଟ୍ ଟଙ୍କା ଓ ଗହଣା ଉଦ୍ଧାର କରିଥିଲା।
ବଡ଼ କଥା ହେଲା ଲୁଟେରା ବାହାର ଅଞ୍ଚଳର ନୁହେଁ, ବରଂ ସେହି ବାଲିଅନ୍ତାର। ତା ନାଁ ଶଙ୍କର ପରିଡ଼ା, ଘର ବ୍ୟାଙ୍କଠାରୁ ମାତ୍ର ଅଢ଼େଇ କିଲୋମିଟର ଦୂର। ଗତକାଲି ସେ ବ୍ୟାଙ୍କକୁ ଦୁଇଥର ଆସିଛି। ପ୍ରଥମେ ଦିନ ସାଢ଼େ ୧୧ ଓ ପରେ ଅପରାହ୍ନ ୩ଟା ୪୫ରେ। ପ୍ରଥମେ ୨୦ଲକ୍ଷ ଟଙ୍କା ଉଠାଇବାକୁ ଚାହୁଁଥିବା ଓ ପରେ ଲୋନ୍ ଦରକାର ବୋଲି ବ୍ୟାଙ୍କ କର୍ମଚାରୀଙ୍କୁ କହି ଦୀର୍ଘ ସମୟ ଧରି ବ୍ୟାଙ୍କ ଭିତରେ ବସି ରହିଥିଲା ଲୁଟେରା। ତେବେ ଖେଳଣା ବନ୍ଧୁକରେ ଲୁଟ୍ ଖେଳକୁ ଖତମ୍ କରିଦେଇଥିଲେ ସ୍ଥାନୀୟ ଯୁବକ। ଯେଉଁମାନଙ୍କୁ ଆଜି ସମ୍ବର୍ଦ୍ଧିତ କରିଛନ୍ତି ଭୁବନେଶ୍ୱର ଡିସିପି।
ତେବେ ଏଠି ପ୍ରଶ୍ନ-ବ୍ୟାଙ୍କରେ ଲୁଟେରା ଦୀର୍ଘ ସମୟ ଧରି ବସିରହିଥିଲେ ବି କେମିତି ତା ଉପରେ ସନ୍ଦେହ ହୋଇନଥିଲା ? କାହିଁକି ବ୍ୟାଙ୍କରେ ସୁରକ୍ଷା ଗାର୍ଡ ନଥିଲେ ? ଆଲାରାମ୍ ବ୍ୟବସ୍ଥା ଥାଇ ବି କାହିଁକି କର୍ମଚାରୀମାନେ ତାକୁ ବ୍ୟବହାର କରିନଥିଲେ ? ଗତକାଲିର ଘଟଣା ପରେ ଉଙ୍କି ମାରିଛି ଏମିତି ଅନେକ ପ୍ରଶ୍ନ। ରାଜଧାନୀରେ ଖେଳଣା ବନ୍ଧୁକରେ ବ୍ୟାଙ୍କ ଲୁଟ୍ ନୂଆ ନୁହେଁ। ଗତବର୍ଷ ଅକ୍ଟୋବର ୫ରେ ଇନଫୋସିଟି ଥାନା ଅଞ୍ଚଳର ଦୁଇଟି ବ୍ୟାଙ୍କରେ ଲୁଟେରା ଖେଳଣା ବନ୍ଧୁକ ଦେଖାଇ ୧୨ଲକ୍ଷରୁ ଅଧିକ ଟଙ୍କା ଲୁଟ୍ କରିଥିଲେ। ପରେ ପୋଲିସ୍ ଲୁଟେରାଙ୍କୁ ଧରି ଘଟଣାର ପର୍ଦ୍ଦାଫାସ୍ କରିଥିଲା।
ରିପୋର୍ଟ: ଆଲୋକ ମହାନ୍ତି
