LIVE TV
ଆପଣ ରାଜଧାନୀ ଉପକଣ୍ଠରେ ଜମି କିଣିଛନ୍ତି କି ? ନିଜ ଜମିକୁ ଖୋଲା ଛାଡି ଦେଇଛନ୍ତି କି ? ଦୀର୍ଘଦିନ ଧରି ଖଜଣା ପାଉତି କାଟି ନାହାନ୍ତି କି ? ତାହାଲେ ଆପଣଙ୍କ ଜମି ଉପରେ ଆଖି ପକାଇ ଥାଇପାରନ୍ତି ଦଲାଲ । ଜାଲି କାଗଜପତ୍ରରେ ଜମି ଆଉ କାହାକୁ ବିକ୍ରି ହୋଇ ଥାଇପାରେ । ଏକ ଠକେଇ ଗ୍ୟାଙ୍ଗ ସଦସ୍ୟଙ୍କୁ ପୋଲିସ ଗିରଫ କରିବା ପରେ ପଦାକୁ ଆସିଛି ରହସ୍ୟ । ସେଲ ଡିଡ଼ରୁ ଆରମ୍ଭ କରି ପଟ୍ଟା ଓ ଖଜଣା ପର୍ଯ୍ୟନ୍ତ ସବୁ ଡୁପ୍ଲିକେଟ୍ । ଏମିତିକି ଚର୍ଚ୍ଚାରେ ସବରେଜିଷ୍ଟାର ଅଫିସର ହେଡ କ୍ଲର୍କ ।
ତେଣୁ ସାବଧାନ । ଜୀବନ ତମାମ ରୋଜଗାର କରିଥିବା ଟଙ୍କା ମାତ୍ର କିଛି ଦିନରେ ହୋଇଯିବ ଉଭାନ୍ । ଭୁବନେଶ୍ୱରରେ ସ୍ୱପ୍ନର ଘରଟିଏ କରିବାକୁ ଯାଇ ଜଣେ ମହିଳା ଠକେଇର ଶୀକାର ହୋଇଛନ୍ତି । ସ୍ୱାମୀଙ୍କ ଅବସର ଓ ଦୁଇ ଝିଅଙ୍କୁ ବାହା ଦେବା ପରେ କଷ୍ଟ ଅର୍ଜିତ ଧନ ସଞ୍ଚି ଚନ୍ଦକା ଅଞ୍ଚଳରେ ଜମି କିଣିଥିଲେ କମଳା। ହେଲେ ଜମିକୁ ଯିବା ବେଳେ ତାଙ୍କୁ ଅଟକାଇଲେ ଆଉ କେହି ।
Also Read
ପଦାକୁ ଆସିଲା ଜମି ଠକେଇର ଗୁମର । ଖୋଲିଲା ନକଲି କାରନାମାର ଫର୍ଦ୍ଦ । ସଂଯୁକ୍ତା ପାଣିଗ୍ରାହୀଙ୍କ ନାଁରେ ସୁଶିଲା ପଟ୍ଟନାୟକ ନାମକ ଜଣେ ମହିଳା ଠକେଇ କରିଥିବା ନେଇ ତଥ୍ୟ ପାଇଲା ପୋଲିସ । ସଂଯୁକ୍ତାଙ୍କ ନାଁରେ ମିଛ କାଗଜପତ୍ର କରି ୬୦ ଲକ୍ଷ ହଡ଼ପ କରିଥିଲେ କଟକ ଚୌଦ୍ୱାର କପାଳେଶ୍ୱରର ସୁଶୀଲା ପଟ୍ଟନାୟକ।
ଜମି ଠକେଇ ଗ୍ୟାଙ୍ଗରେ ପଶି ଲକ୍ଷ ଲକ୍ଷ ଟଙ୍କା ରୋଜଗାର ପାଇଁ ବାରମ୍ବାର ବଦଳାଇଛନ୍ତି ତାଙ୍କ ପରିଚୟ । କେତେବେଳେ ନିଜକୁ ସଂଯୁକ୍ତା ପାଣିଗ୍ରାହୀ କହି ତ ଅନ୍ୟ କେତେବେଳେ ଆଉ କେଉଁ ଜମି ମାଲିକଙ୍କ ପରିଚୟ ଦେଇ ଠକେଇ କରିଛନ୍ତି । କମିଶନରେଟ ପୋଲିସର ସ୍ପେଶାଲ କ୍ରାଇମ ୟୁନିଟ ପକ୍ଷରୁ ଏହି ଛଦ୍ମବେଶି ମହିଳା ଓ ମହାକାଳେସ୍ୱରର ଅରୁପ ହାଲଦାରଙ୍କୁ ଗିରଫ ପରେ ପୁରା ଘଟଣାରୁ ପରଦା ହଟିଛି । ଏବେ ସୁଦ୍ଧା ଏହି ଗ୍ୟାଙ୍ଗର ମୋଟ ୭ ଜଣଙ୍କୁ ଗିରଫ କରି ସାରିଲାଣି ପୋଲିସ ।
ଗିରଫ ଅଭିଯୁକ୍ତଙ୍କ ନାମରେ ଏକାଧିକ ଥାନାରେ ମାମଲା ରହିଛି । ଏପରି କି ଇଓଡବ୍ଲୁରେ ମଧ୍ୟ ଜମି ଠକେଇ ସଂପର୍କିତ ମାମଲା ମଧ୍ୟ ରହିଛି । ଏହି ଜମି ଠକେଇ ମାମଲାରେ ଗତ ସେପ୍ଟେମ୍ବର ୪ରେ ଖଣ୍ଡଗିରି ସବରେଜିଷ୍ଟ୍ରାର ଅଫିସର ହେଡ କ୍ଲର୍କ ସଞ୍ଜୟ ଷଡ଼ଙ୍ଗୀ ସମେତ ୫ ଜଣଙ୍କୁ ଗିରଫ କରିଥିଲା ସ୍ପେଶାଲ କ୍ରାଇମ ୟୁନିଟ । ଚଢ଼ାଉ ବେଳେ ଗୁରୁତ୍ୱପୂର୍ଣ୍ଣ କାଗଜପତ୍ର, ସରକାରୀ ଷ୍ଟାମ୍ପ, ସିଲ ଆଦି ଜବତ କରାଯାଇଥିଲା।
ରାଜଧାନୀରେ ନିଜର ସ୍ୱପ୍ନର ଘର କରିବାକୁ ଚାହୁଁଥିଲେ ଦେଖିଚାହିଁ ଜମି କିଣନ୍ତୁ । ନଚେତ ଆପଣ ମଧ୍ୟ ଠକେଇ ଗ୍ୟାଙ୍ଗର ଶୀକାର ହୋଇପାରନ୍ତି ।
- Reported by:
- CHANDAN PAIKRAY
