LIVE TV
ଶୁଣିଲେ ବିଶ୍ବାସ ଲାଗିନପାରେ । ବିଶ୍ବାସ ଲାଗିଲେ ବି ଆଶ୍ଚର୍ଯ୍ୟ ଜନକ ! ସୁରକ୍ଷାରେ ଦାୟିତ୍ବରେ ଥିବା ଜବାନ ଚାଲାଣ ଅଭିଯୋଗରେ ଗିରଫ । ତାହା ପୁଣି ଗଂଜେଇ ଚାଲାଣ..। ହଁ ଦର୍ଶକ ବନ୍ଧୁ, ବୌଦ୍ଧ ଜିଲ୍ଳାରୁ ଆସିଥିବା ଏଭଳି ଖବର ଆପଣଙ୍କୁ ଚକିତ କରିଦେଇପାରେ ! ପୋଲିସ ବ୍ୟାରେକରେ ଏସ୍.ପିଙ୍କ ଅଚାନକ ଚଢଉରେ ଧରାପଡିଗଲା ବ୍ୟାରେକ ଭିତରର ଗଂଜେଇ ବେପାର । ତିନିଜଣ ଜବାନଙ୍କ ପାଖରୁ ଜବତ ହେଲା ପୁଳା ପୁଳା ଗଂଜେଇ । ଆଇନକୁ ଗୁରୁତ୍ବ ଦେଇ, ଜବାନଙ୍କୁ ବାନ୍ଧିଲେ ଏସ୍.ପି । ଗିରଫ ହୋଇ କୋର୍ଟ ଚାଲାଣ ହେଲେ ତିନିଜଣ ଆଇ.ଆର.ବି ଜବାନ । ଏବେ ଏହି ଘଟଣାକୁ ନେଇ ଚାରିଆଡ଼େ ଚର୍ଚ୍ଚା ।
ବୌଦ୍ଧ ଏସ୍.ପି ରାହୁଲ ଗୋୟଲ । କୌଣସି ସୂତ୍ରରୁ ଖବର ପାଇ, ଗତକାଲି ସଂନ୍ଧ୍ୟାରେ ମନମୁଣ୍ଡା ପୋଲିସ ବ୍ୟାରେକରେ ଅଚାନକ ଚଢଉ କଲେ । ଆରମ୍ଭ ହେଲା ଛାନଭିନ । ଯାହା ଦେଖିଲେ ଜବତ କଲେ । ଆଉ ଜବତ କରି ଅବାକ ହୋଇଗଲେ । କାରଣ ବ୍ୟାରେକ ଭିତରେ ଥିଲା କେ.ଜି କେ.ଜି ଗଂଜେଇ । ଜଣେ ଜଣେ ଯବାନ ପାଖରୁ ତିନିରୁ ଚାରି କେ.ଜି ଗଂଜେଇ ଜବତ ହେଲା ।
Also Read
ତିନିଜଣ ଆଇ.ଆର.ବି ଜବାନଙ୍କ ପାଖରୁ ମିଲିଲା ୧୫ କେ.ଜି ଗଂଜେଇ । ବାସ୍, ବ୍ୟାରେକ ଭିତରେ ଗଂଜେଇ ବେପାର ଦେଖି, ତିନିଜଣ ଜବାନଙ୍କୁ ତୁରନ୍ତ ବୌଦ୍ଧ ନେଇ ପଚରା ଉଚୁରା କଲେ ଏସ୍.ପି ରାହୁଲ ଗୋୟଲ । ଗଂଜେଇ ବେପାରରେ ସଂପୃକ୍ତି ଜାଣି, ଗିରଫ କରି ତିନି ଜବାନଙ୍କୁ କୋର୍ଟ ଚାଲାଣ କଲା ବୌଦ୍ଧ ପୋଲିସ । ଏଭଳି ଘଟଣା ଦେଖି ଏବେ ସନ୍ଦେହରେ ସାଧାରଣ ଲୋକେ । କେବଳ ତିନି...ନା ଅଧିକଙ୍କ ରହିଛି ସଂପୃକ୍ତି...?
ସୁରକ୍ଷା ପାଇଁ ବର୍ଦ୍ଦି ପିନ୍ଧିଥିବା ତିନିଜଣ ଜବାନ ମୁହଁ ଢାଙ୍କି ଛିଡା ହୋଇଥିଲେ । କାରଣ ଏମାନେ ଅପରାଧ ରୋକିବା ପରିବର୍ତ୍ତେ ଅପରାଧି ହୋଇଯାଇଛନ୍ତି । ତାହା ପୁଣି ଗଂଜେଇ ଚାଲାଣରେ ଗିରଫ । ଏବେ ଆସନ୍ତୁ ଜାଣିବା ଏମାନଙ୍କ ପରିଚୟ । ଜଣେ ହେଉଛନ୍ତି କୁନାର ସିଂ, ଆଉ ଜଣେ ତ୍ରୀଲୋଚନ ରଣା । ତୃତୀୟ ଜବାନ ଜଣକ ନୀଲମ ବାର୍ଲା । ଏହି ତିନିଜଣଙ୍କ ପାଖରୁ ଜବତ ଗଂଜେଇର ପରିମାଣ ୧୫ କେ.ଜି ୯୦୦ । ଗିରଫ ତିନିଜଣ ଜବାନଙ୍କୁ କଣ୍ଟାମାଳ ଏ.ଡି.ଜେ କୋର୍ଟକୁ ଚାଲାଣ କରିଛି ମନମୁଣ୍ଡା ପୋଲିସ । ଜାମିନ ନାମଂଜୁର ହେବା ପରେ ଜେଲ ଗଲେ ଜବାନ ..!
ବାସ୍, ଘଟଣା ପରେ ଏବେ ବୌଦ୍ଧ ପୋଲିସକୁ ନେଇ ଚର୍ଚ୍ଚା । କାରଣ ଗତ ପାଂଚ ଦିନ ତଳେ ବୌଦ୍ଧର ଜଣେ ପୋଲିସ କର୍ମଚାରୀ ଗଂଜେଇ ବେପାରୀଙ୍କ ସହିତ ଡିଲ କରୁଥିବାର ଅଡିଓ ଓଟିଭିରେ ଖବର ହୋଇଥିଲା । ଏହାର ଅଭିଯୁକ୍ତ ହେଉଛନ୍ତି ବୌଦ୍ଧ ପୋଲିସର ଗଂଜେଇ ବିରୋଧରେ ଗଠନ ହୋଇଥିବା ସ୍ପେସିଆଲ ସ୍କ୍ବାର୍ଡର ଡି.ଭି.ଏଫ ଜବାନ ହରିଶ୍ଚନ୍ଦ୍ର ସାହୁ । ହରିଶ୍ଚନ୍ଦ୍ର ଗଂଜେଇ ବେପାରୀଙ୍କ ସହିତ ଡିଲ କରୁଥିବାର ଅଡିଓ ଭାଇରାଲ ହୋଇଛି ।
ଆଗରୁ ଗଂଜେଇ ବେପାରୀଙ୍କ ଠାରୁ ଟଙ୍କା ଆଣୁଥିବା ବେଳେ ଭିଜିଲାନସ ଦ୍ବାରା ଗିରଫ ହୋଇଥିଲେ ହରିଶ୍ଚନ୍ଦ୍ର । ଖାଲି ହରିଶ୍ଚନ୍ଦ୍ର ନୁହନ୍ତି, ଆହୁରି ଅନେକ ପୋଲିସ କର୍ମଚାରୀ ଗଂଜେଇ ବେପାରରେ ସଂପୃକ୍ତ ଥିବାର ଅଡିଓ ଏବେ ଭାଇରାଲ ହେବାରେ ଲାଗିଛି । ତେବେ ଏହି ତିନିଜଣ ଯବାନଙ୍କୁ ଧରି ଏସ୍.ପି ଜେଲ ପଠାଇଲା ପରେ, ଏବେ ଅନ୍ୟ ମାନଙ୍କ ଭିତରେ ଛନକା ପଶିଛି।
- Reported by:
- MANARANJAN JOSHI , Rabindra Hota , DEEPAK KUMAR ADAR
