ଏ କି ପ୍ରେମ ! ପ୍ରେମିକାଙ୍କ ମୃତଦେହ ଦେଖି ଡରି ଫେରି ଆସିଲେ ପ୍ରେମିକ

ଜଣେ ଆଉ ଜଣକୁ ଭଲ ପାଇଥିଲେ । ଏକାଠି ରହିବେ ବୋଲି ବି କଥା ଦେଇଥିଲେ । ହେଲେ ଘରେ ନମାନିବାରୁ ଆତ୍ମହତ୍ୟାକୁ ଶେଷ ରାସ୍ତା ଭାବେ ବାଛି ନେଲେ । ହେଲେ ପ୍ରେମିକା ଆତ୍ମହତ୍ୟା ପରେ ଆଉ ସାହସ ଜୁଟାଇ ପାରିଲାନି ପ୍ରେମିକ । ପ୍ରେମିକାଙ୍କ ଅବସ୍ଥା ଦେଖି ପଛଘୁଞ୍ଚା ଦେଇଦେଲେ ପ୍ରେମିକ ।

ଏଭଳି କିଛି ଘଟଣା ଘଟିଛି, ଯାଜପୁର ବାଲିଚନ୍ଦ୍ରପୁର ଥାନା ବାଡ଼ବାଲିକୁଦା ଗାଁରେ । ଅଭିଯୋଗ ଅନୁସାରେ, ଗାଁର ଜଣେ ନାବାଳିକାଙ୍କୁ ସେହି ଅଞ୍ଚଳର ସାଗର ବିଶ୍ୱାଳ ନାମକ ଯୁବକ ଭଲ ପାଉଥିଲେ । ନାବାଳିକାଙ୍କୁ ଏନେଇ ଆକଟ କରିଥିଲେ ପରିବାର ଲୋକେ । ତେବେ ଗତକାଲି ରାତିରେ ଘରୁ କିଛି ଅଳଙ୍କାର ନେଇ ଚାଲି ଆସିଥିଲେ ନାବାଳିକା ଜଣକ । ସାଗର ଓ ସେ ବାଚ୍ଛାବଟ ସରକାରୀ ସ୍କୁଲରେ ଆତ୍ମହତ୍ୟା କରିବାକୁ ନିଷ୍ପତ୍ତି ନେଇଥିଲେ । ହେଲେ ନାବାଳିକାଙ୍କ ମୃତଦେହ ଦେଖି ସେ ପୋଲିସ୍‌କୁ ଫୋନ୍ କରି ସବୁ କଥା ଜଣାଇଥିଲେ । ଶେଷରେ ପୋଲିସ୍ ଆସି ଯୁବକଙ୍କୁ ଅଟକ ରଖି ତଦନ୍ତ କରୁଛି ।

ସେପଟେ ଏହା ଆତ୍ମହତ୍ୟା ନୁହେଁ ହତ୍ୟା ବୋଲି ଅଭିଯୋଗ କରିଛନ୍ତି ମୃତକଙ୍କ ବାପା । ଆମେ ଏଠି କହି ରଖୁଛି, ଆତ୍ମହତ୍ୟା ଏକ ଅପରାଧ । ଜୀବନରେ କୌଣସି ବି ପରିସ୍ଥିତିରେ ଏପରି ଭାବିବା କିମ୍ବା କରିବା ଆଦୌ ଉଚିତ୍ ନୁହେଁ । ଜୀବନ ମୂଲ୍ୟବାନ, ଏହାକୁ ବଞ୍ଚନ୍ତୁ ଏବଂ ଉପଭୋଗ କରନ୍ତୁ ।