Illegal Gun Factory: ପୋଲିସକୁ ଚକମା; ଜଙ୍ଗଲ ଭିତରେ ବନ୍ଧୁକ ଫ୍ୟାକ୍ଟରି

ଜଙ୍ଗଲ ଭିତରେ ବେଆଇନ ଭାବେ ଚାଲୁଥିଲା ଦେଶୀ ବନ୍ଧୁକ କାରଖାନା। କାରଖାନା ଠାବ କରିବା ପରେ ଅଚାନକ ରେଡ୍ କରିଛି ପୋଲିସ। ଚଢାଉ ବେଳେ ଦେଶୀ ବନ୍ଧୁକ କାରଖାନା ଠାବ କରିବା ସହ ୩ ଜଣଙ୍କୁ ଗିରଫ କରିଛି ନୟାଗଡ଼ ପୋଲିସ।

ସୂଚନାନୁଯାୟୀ, ଦଶପଲ୍ଲା ଥାନା ‌ଅନ୍ତର୍ଗତ ମଧ୍ୟଖଣ୍ଡ ଜଙ୍ଗଲ ଭିତରେ ବହୁ ଦିନରୁ ଏହି ଦେଶୀ ବନ୍ଧୁକ ଫ୍ୟାକ୍ଟ୍ରି ଚାଲୁଥିଲା। ଖବର ପାଇ ନୟାଗଡ ଓ ଦଶପଲ୍ଲା ଥାନା ପୋଲିସ ମିଳିତ ଚଢ଼ାଉ କରିଥିଲେ। ଗିରଫ ଅଭିଯୁକ୍ତମାନେ ହେଲେ ଦଶପଲ୍ଲା ଥାନା ଦ୍ବାରଗାଁର ରାଜେଶ ପ୍ରଧାନ, ବିଭୁତି ପରିଡା ଓ ତପନ ପରିଡା। ଅନ୍ୟ ଜଣେ ଅଭିଯୁକ୍ତ ଫେରାର ଅଛି।

ଅଭିଯୁକ୍ତଙ୍କ ପାଖରୁ ୨ଟି ଦେଶୀ ବନ୍ଧୁକ ସମେତ ଅନେକ ବନ୍ଧୁକ ତିଆରି ସରଞ୍ଜାମ ଓ ବିଭିନ୍ନ ମାରଣାସ୍ତ୍ର ଜବତ କରାଯାଇଛି। ଏହି ଘଟଣାରେ ଆଉ ଯେଉଁମାନଙ୍କର ସଂପୃକ୍ତି ରହିଛି ଖୁବଶୀଘ୍ର ସେମାନଙ୍କୁ ଧରାଯିବ ବୋଲି ନୟାଗଡ଼ ଏସପି କହିଛନ୍ତି। ଏ ନେଇ ତଦନ୍ତ ଚାଲିଛି।