Man Raped Daughter-In-Law: ବୋହୂଙ୍କୁ ଦୁଷ୍କର୍ମ କରି ହତ୍ୟା କଲା ଶ୍ବଶୁର, ୧୦ ଫୁଟ ଗାତରୁ ମିଳିଲା ମୃତଦେହ

ହରିୟାଣାର ଫରିଦାବାଦରେ ଘଟିଛି ଚାଞ୍ଚଲ୍ୟକର ଘଟଣା । ବୋହୂକୁ ଦୁଷ୍କର୍ମ କରିବା ପରେ ହତ୍ୟା କରି ୧୦ ଫୁଟର ଗଭୀର ଗାତ ଖୋଳି ପୋତି ଦେଇଛି ଶ୍ୱଶୁର । ଉତ୍ତରପ୍ରଦେଶର ଜଣେ ୨୪ ବର୍ଷୀୟା ମହିଳାଙ୍କ ହତ୍ୟା ହେବା ଘଟଣାରେ ନୂଆ ତଥ୍ୟ ସାମନାକୁ ଆସିଛି । ଏପ୍ରିଲ ମାସରେ ଉକ୍ତ ମହିଳାଙ୍କ ସହ ଏସବୁ ଘଟଣା ଘଟିଥିଲେ ମଧ୍ୟ ପ୍ରାୟ ଦୁଇ ମାସ ପର୍ଯ୍ୟନ୍ତ ତାଙ୍କ ଶ୍ୱଶୁର ଘର ଲୋକେ ସେ ନିଖୋଜ ଥିବା କହିଥିଲେ । 

ଫିରୋଜାବାଦ ଜିଲ୍ଲାର ସିକୋହାବାଦର ଉକ୍ତ ମହିଳା ୨୦୨୩ ଜୁଲାଇ ମାସରେ ଫରିଦାବାଦରେ ବିବାହ କରିଥିଲେ । ବିବାହର ଦୁଇ ବର୍ଷ ପର୍ଯ୍ୟନ୍ତ ତାଙ୍କୁ ଯୌତୁକ ଜନିତ ନିର୍ଯାତନା ଦିଆଯାଉଥିଲା ବୋଲି ତଦନ୍ତରୁ ଜଣା ପଡିଛି । ତଦନ୍ତ ବେଳେ ଗତ ଜୁନ ୨୧ ତାରିଖରେ ତାଙ୍କ ଶ୍ୱଶୁର ଘର ବାହାରେ ୧୦ ଫୁଟ ଗଭୀର ଗର୍ତ୍ତ ଭିତରେ ତାଙ୍କ ମୃତଦେହ ମିଳିବା ପରେ ସବୁ ଘଟଣା ସାମନାକୁ ଆସିଛି । 

ଅଧିକ ପଢନ୍ତୁ: ଲୁଚି ବୁଲୁଥିଲା ପତ୍ନୀହନ୍ତା ସ୍ୱାମୀ, ୨୩ ବର୍ଷ ପରେ ଧରା ପଡିଲା 

ପୋଲିସ୍ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ପଚରାଉଚରା ବେଳେ ଅଭିଯୁକ୍ତ ଶ୍ୱଶୁର ତାଙ୍କ ଦୋଷ ସ୍ୱୀକାର କରିଛନ୍ତି । ଏବେ ତାଙ୍କୁ ପୋଲିସ୍ ତିନି ଦିନିଆ ରିମାଣ୍ଡରେ ନେଇଛି । ପୋଲିସ୍ କହିଛି ଯେ, ଏପ୍ରିଲ ୧୪ ତାରିଖରେ ମହିଳାଙ୍କୁ ହତ୍ୟା କରିବା ପାଇଁ ଯୋଜନା କରାଯାଇଥିଲା । ଯୋଜନା ସ୍ୱରୂପ, ମହିଳାଙ୍କ ଶାଶୁଙ୍କୁ ଉତ୍ତରପ୍ରଦେଶର ଏକ ବିବାହ ଉତ୍ସବରେ ଯୋଗ ଦେବା ପାଇଁ ପଠା ଯାଇଥିଲା । ଏପ୍ରିଲ ୨୧ ତାରିଖ ରାତିରେ ମହିଳାଙ୍କ ସ୍ୱାମୀ ଓ ତାଙ୍କ ଭଉଣୀଙ୍କୁ ଖାଦ୍ୟରେ ନିଦ ବଟିକା ଦିଆ ଯାଇ ଅଚେତ କରାଯାଇଥିଲା । ଉକ୍ତ ମହିଳାଙ୍କୁ ମଧ୍ୟ ନିଦ ବଟିକା ଦିଆ ଯାଇଥିଲା । ସେମାନେ ଭିନ୍ନ ଭିନ୍ନ କୋଠରୀରେ ଶୋଇଥିଲେ । 

ମହିଳାଙ୍କ ଶ୍ୱଶୁର ସ୍ୱୀକାରୋକ୍ତିରେ କହିଛନ୍ତି ଯେ, ସେ ତାଙ୍କ ବୋହୂଙ୍କୁ ହତ୍ୟା କରିବା ପାଇଁ ସେ ଶୋଇଥିବା ରୁମକୁ ଯାଇଥିଲେ । ହେଲେ ତା ପୂର୍ବରୁ ସେ ତାଙ୍କ ଅଚେତ ଅବସ୍ଥାରେ ଥିବା ବୋହୂଙ୍କୁ ଦୁଷ୍କର୍ମ କରିଥିଲେ । କିନ୍ତୁ ଏପର୍ଯ୍ୟନ୍ତ ବି ସେ ଏହି ଘଟଣା ତାଙ୍କ ସ୍ତ୍ରୀ କିମ୍ବା ପୁଅଙ୍କୁ ଜଣାଇ ନଥିଲେ । ହତ୍ୟାକାଣ୍ଡ ଘଟାଇବା ପରେ ସେ ତାଙ୍କ ପୁଅକୁ ଛାତ ଉପରକୁ ଡାକି ମହିଳାଙ୍କ ମୃତଦେହକୁ ଏକ ଜରିରେ ଗୁଡାଇ ରାସ୍ତାରେ ପୂର୍ବରୁ ଖୋଳା ଯାଇଥିବା ଗର୍ତ୍ତରେ ଫିଙ୍ଗିଥିଲେ । ମୃତଦେହ ଫିଙ୍ଗି ତା ଉପରେ ସ୍ଲାବ ପକାଇ ଦେଇଥିଲେ । 

ପୋଲିସ୍ କହିଛି ଯେ, ଏହି ଗର୍ତ୍ତକୁ ଡ୍ରେନ କାମ କରିବା ପାଇଁ ଖୋଳା ଯାଇଥିଲା । ଏହି ଘଟଣା ଘଟାଇବା ପରେ ଏପ୍ରିଲ ୨୫ ତାରିଖରେ ସେ ନିଖୋଜ ଖବର ରୁଜୁ କରିଥିଲେ । ତଦନ୍ତ ବେଳେ ଶ୍ୱଶୁରଙ୍କ ସମେତ ଶାଶୁ, ସ୍ୱାମୀ ଓ ନଣନ୍ଦଙ୍କ ନାମରେ ମଧ୍ୟ ମାମଲା ରୁଜୁ କରାଯାଇଛି। ପରେ ଶବ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି ପୋଲିସ୍ । 

ଅଧିକ ପଢନ୍ତୁ: ବୁର୍ଖା ପିନ୍ଧି ଆସିଲା; ୫ ମହଲାରୁ ଠେଲି ଦେଲା