ପୁରୀରେ ପୁଣି ଫୁଟିଲା ଗୁଳି, ଜଣେ ମୃତ

ପୁରୀରେ ପୁଣି ଗର୍ଜିଲା ବନ୍ଧୁକ । ଶ୍ରୀମନ୍ଦିର ନିକଟରେ ଫୁଟିଲା ଗୁଳି । ଏମାର ମଠ ନିକଟ କାକୁଡ଼ିଖାଇ ଛକରେ ଗୁଳିମାଡ଼ରେ ଜଣଙ୍କର ମୃତ୍ୟୁ । ମୃତ ବ୍ୟକ୍ତି ତଳୁଚ୍ଛସାହିର ଶିବରାମ ପାତ୍ର । ପୂର୍ବ ଶତ୍ରୁତାରୁ ତାଙ୍କୁ ଗୁଳିମାଡ଼ କରାଯାଇଥିବା ପୁରୀ ଏସପି ସୂଚନା ଦେଇଛନ୍ତି । ଶିବରାମ ବାଇକ ଯୋଗେ ଘରୁ ଆସୁଥିବା ବେଳେ ତାଙ୍କୁ ଫାୟାରିଂ ହୋଇଥିଲା ।

ତାଙ୍କ ମୁଣ୍ଡକୁ ହିଁ ୨ ଜଣ ଦୁର୍ବୃତ୍ତ ଦୁଇ ରାଉଣ୍ଡ ଗୁଳି କରି ଫେରାର ମାରିଥିଲେ । ଫଳରେ ଘଟଣାସ୍ଥଳରେ ହିଁ ଶିବରାମଙ୍କ ମୃତ୍ୟୁ ହୋଇଥିଲା । ଘଟଣାସ୍ଥଳକୁ ନିଜେ ଏସପି ଯାଇ ତଦନ୍ତ କରିଛନ୍ତି ।

ସେପଟେ ଘଟଣା ପରେ ପୋଲିସ, ମୁଖ୍ୟ ଅଭିଯୁକ୍ତ ଚନ୍ଦନ ବାରିକକୁ ଅଟକ ରଖିଛି । ପୋଲିସ ତା’ନିକଟରୁ ବନ୍ଧୁକ ଜବତ କରିଛି । ଘଟଣା ସମ୍ପର୍କରେ ତାକୁ ଅଧିକ ପଚରାଉଚରା କରାଯାଉଥିବା ପୁରୀ ଏସପି କହିଛନ୍ତି । ଅନ୍ୟପକ୍ଷେ ପ୍ରେମ ବ୍ୟାପାରକୁ ନେଇ ଏହି ଗୁଳିକାଣ୍ଡ ହୋଇଥିବା ମଧ୍ୟ ଚର୍ଚ୍ଚା ହେଉଛି । ତେବେ ପୋଲିସ ସବୁ ଦିଗକୁ ନେଇ ତଦନ୍ତ ଜାରି ରଖିଛି ବୋଲି କହିଛି ।