LIVE TV
ରାଜଧାନୀରେ ସରକାରୀ ଜମି ବିକ୍ରି ଗୋଲକ ଧନ୍ଦା ଉପରୁ ପରଦା ହଟାଇଲେ ଅବସରପ୍ରାପ୍ତ IPS ଅଧିକାରୀ ଏମ୍. ନାଗେଶ୍ୱର ରାଓ । ୨୦୧୧ ମସିହାରେ ସେ କିଭଳି ଭୁବନେଶ୍ୱରରେ ଜମି କିଣି ଠକାମିରେ ପଡ଼ିଥିଲେ ତାହା ଗୋଟି ଗୋଟି କରି ବଖାଣିଛନ୍ତି । ନୃସିଂହ ପ୍ରସାଦ ସୁନ୍ଦରରାୟ ଓରଫ ବାବିନୋ ନାମକ ଜଣେ ବ୍ୟକ୍ତି କେମିତି ତାଙ୍କୁ ସରକାରୀ ଜମି ବିକ୍ରିର ଗୋଲକ ଧନ୍ଦାରେ ଫସାଇ ଦେଲା ସେନେଇ କହିଛନ୍ତି ଏମ୍. ନାଗେଶ୍ୱର ରାଓ ।
Also Read
ପାତ୍ରପଡ଼ା ନିକଟରେ ଥିବା ଜମି ବାବଦରେ କିଛି IAS ଓ IPS ଅଧିକାରୀ ତାଙ୍କୁ ସୂଚନା ଦେଇଥିଲେ । ସେହିମାନେ ହିଁ ଜମି କିଣିବା ପାଇଁ ପ୍ରବର୍ତ୍ତାଇବା ସହ ବାବିନୋ ସାଙ୍ଗରେ ଯୋଗାଯୋଗ କରାଇଥିଲେ । ତେବେ ୪ ହଜାର ବର୍ଗଫୁଟ ଜମି ୯ ଲକ୍ଷ ୫୦ ହଜାର ଟଙ୍କା ଦେଇ କିଣିବା ପରେ ଏହା ମ୍ୟୁଟେସନ ହୋଇପାରିନଥିଲା । ଏନେଇ ତହସିଲଦାରଙ୍କ ସହ କଥା ହେବାରୁ ଜଣାପଡ଼ିଲା ଯେ ଏହା ସରକାରୀ ଜମି । ଠକାମିରେ ପଡ଼ିଥିବା ଜାଣି ସେ ଭୁବନେଶ୍ୱର EOWରେ ୨୦୧୫ରେ ଏତଲା ଦେଇଥିଲେ ।
ପଢନ୍ତୁ ଏହି ଖବର: ଖଣି ଲୁଟେରା ଯିବେ ଝାରପଡ଼ା ଜେଲ୍; ଆକ୍ସନ ମୋଡ୍ରେ ମୁଖ୍ୟମନ୍ତ୍ରୀ
ତେବେ ତାଙ୍କ ଏତଲା ଗ୍ରହଣ କରାଯାଇଥିଲେ ବି ମାମଲା ପଞ୍ଜିକରଣ କରାଯାଇନଥିଲା । ସେତେବେଳେ ସଂଜୀବ ମାରିକ ପୋଲିସ ଡିଜି ଥିଲେ ବୋଲି କହିଛନ୍ତି ନାଗେଶ୍ୱର । ତେବେ EOWରୁ ନ୍ୟାୟ ନମିଳିବାରୁ କୋର୍ଟରେ ମାମଲା କରିଥିଲେ । ପରେ ୨୦୧୭ରେ ଖଣ୍ଡଗିରି ସବରେଜିଷ୍ଟ୍ରି ଅଫିସରେ ସେଲ ଡିଡ୍ ରଦ୍ଦ ପାଇଁ ଆବେଦନ କରିବା ପରେ ମୋତେ ଟଙ୍କା ଫେରସ୍ତ ମିଳିଥିଲା ବୋଲି କହିଛନ୍ତି ପୂର୍ବତନ IPS ଏମ.ନାଗେଶ୍ୱର ରାଓ ।
ସରକାରୀ ଜମି ବିକ୍ରି ରାକେଟ ପଛରେ ଏକ ବଡ଼ ରାକେଟ କାମ କରୁଛି । ଏଥିରେ IPS, IAS ଓ କିଛି ପୋଲିସ ଅଧିକାରୀ ସଂପୃକ୍ତ ଥିବା ସେ ଖୋଲା ଅଭିଯୋଗ ଆଣିଛନ୍ତି । ନିଜେ ଜଣେ IPS ଅଧିକାରୀ ହୋଇ ସେ ନ୍ୟାୟ ପାଇନଥିବା କହିବା ସହ ସଂପୃକ୍ତ ଅଧିକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛନ୍ତି । ଏମିତିକି ମାମଲା ରୁଜୁ କରିନଥିବା ତତ୍କାଳୀନ EOW ଏସପିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି ଏମ. ନାଗେଶ୍ୱର ରାଓ । କିଛି ଦିନ ତଳେ ସୂଚନା ଅଧିକାର ଅଭିଯାନ ପକ୍ଷରୁ ସରକାରୀ ଜମି ଗୋଲକ ଧନ୍ଦା ନେଇ ଖବର ଉଜାଗର କରାଯାଇଥିଲା ।
