LIVE TV
ଜାଲି ନୋଟର ଜାଲ । ୧ ମାର୍ଚ୍ଚ ୨୦୨୧ ଛତିଶଗଡ଼ରୁୁ ଆନ୍ଧ୍ର ଚାଲାଣ ବେଳେ କୋରାପୁଟ ଜିଲ୍ଲା ସୁଙ୍କି ଆଉଟ୍ପୋଷ୍ଟ ନିକଟରୁ କାରରୁ ଜବତ ହୋଇଥିଲା ଜାଲି ନୋଟ୍ । ତାହା ୭ କୋଟି ୯୦ ଲକ୍ଷ ଟଙ୍କାର ୧୫୮୦ଟି ଜାଲ୍ ୫ ଶହ ଟଙ୍କିଆ ବିଡ଼ା ଥିଲା । ଆଉ ଏବେ ପୁଣି ଏସ୍ଟିଏଫ୍ ଓ ବରପାଲି ପୋଲିସ୍ର ରେଡ୍ ବେଳେ ବରପାଲିରୁ ଧରାପଡ଼ିଛି ୧୪ ଲକ୍ଷ ୨୯ ହଜାର ଟଙ୍କାର ନକଲି ନୋଟ୍ । ତା ସାଙ୍ଗକୁ ନୋଟ୍ ତିଆରି ମେସିନ୍ । ଏହି ଘଟଣାରେ ଗିରଫ ଦୁଇ ଅଭିଯୁକ୍ତ ଉତ୍ତରପ୍ରଦେଶର ପପୁ ଯାଦବ ଓ ସ୍ଥାନୀୟ ବରପାଲିର ବଳରାମ ମେହେରଙ୍କୁ ଆଜି କୋର୍ଟ ଚାଲାଣ କରାଯାଇଛି ।
ପ୍ରାଥମିକ ତଦନ୍ତରୁ ଅଭିଯୁକ୍ତ ବଳରାମ ନିଜ ଘରେ ନକଲି ନୋଟ୍ ଛାପି ରାଜ୍ୟ ବାହାରକୁ ପଠାଉଥିବା ଜଣାପଡ଼ିଥିବା ବେଳେ, ଏହି କାରବାରର ଚେର କେଉଁ ଯାଏଁ ଲମ୍ବିଛି, କେଉଁ ରାକେଟ୍ କାମ କରୁଛି ତାର ତଦନ୍ତ ଜାରି ରଖିଛି ବରଗଡ଼ ପୋଲିସ୍ ।
Also Read
ଇଏ ତ ଗଲା ମାତ୍ର ଦୁଇଟି ଉଦାହରଣ । କ୍ରାଇମ୍ବ୍ରାଞ୍ଚ ତଥ୍ୟ କହୁଛି ଗଲା ଦଶବର୍ଷରେ ରାଜ୍ୟରୁ ଜବତ ହୋଇଛି ୧୦ କୋଟି ୪୦ ଲକ୍ଷ ଟଙ୍କାର ନୋଟ୍ । ୧୮୦ରୁ ଅଧିକ ମାମଲା ରୁଜୁ ସହ ଗିରଫ ହୋଇଛନ୍ତି ୩୨୩ ଅଭିଯୁକ୍ତ । ହେଲେ ଆଶ୍ଚର୍ଯ୍ୟର କଥା ପ୍ରତିବର୍ଷ ପୁଳା ପୁଳା ଜାଲି ନୋଟ୍ ଜବତ୍, ଗିରଫଦାରୀ, ଖୋଳତାଡ଼ ସତ୍ତ୍ୱେ ରାଜ୍ୟ ଯେମିତି ଫେକ୍ ନୋଟ୍ କାରବାରର ହବ୍ ପାଲଟିଛି ।
ତଥ୍ୟ ଏହା ବି କହୁଛି ଯେ ବରଗଡ଼, ସମ୍ବଲପୁର, ବାଲେଶ୍ୱର ଜିଲ୍ଲାରୁ ସବୁଠୁ ଅଧିକ ଜାଲି ନୋଟ୍ ଜବତ୍ ହେଉଛି ଏବଂ ଘଟଣାରେ ଓଡ଼ିଶା ସମେତ ଛତିଶଗଡ଼, ଝାରଖଣ୍ଡ, ଉତ୍ତରପ୍ରଦେଶ ଓ ବିହାରର ଅନ୍ତଃରାଜ୍ୟ ଅପରାଧୀଙ୍କ ଲିଙ୍କ ବି ସାମ୍ନାକୁ ଆସିଛି । ତା ସତ୍ତ୍ୱେ ନା କାରବାର ରୋକି ହେଉଛି ନା ନେଟ୍ଓ୍ୱର୍କ ମୂଳକୁ ଛୁଇଁ ପାରୁଛି ତଦନ୍ତକାରୀ ସଂସ୍ଥା ।
ଆଗରୁ ନକଲି ନୋଟ୍ ବାଂଲାଦେଶରୁ ଛପା ହୋଇ ଭାରତ ଆସୁଥିଲା, ଆଉ ଏବେ ଓଡ଼ିଶାରୁ ଛପା ହୋଇ ବାହାରକୁ ଚାଲାଣର ପୁଳା ପୁଳା ପ୍ରମାଣ ବି ମିଳୁଛି । କ୍ରାଇମ୍ବ୍ରାଞ୍ଚ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଅତି ସୁନିୟୋଜିତ ଢଙ୍ଗରେ ଏଜେଣ୍ଟମାନଙ୍କୁ ଲଗାଇ ବଡ଼ ବଡ଼ ମେଳା, ମହୋତ୍ସବ ଓ ବଜାରରେ ଏହି କାରବାର କରାଯାଉଛି । ସହଜେ ଧରା ନପଡ଼ିଲା ଭଳି ଶହେଟି ଅସଲି ୫ ଶହ ଟଙ୍କିଆ ନୋଟ୍ ବିଡ଼ା ଭିତରେ ୪-୫ଟି ନକଲି ୫ ଶହ ଟଙ୍କିଆ ନୋଟ୍ ଛାଡ଼ି ଦିଆଯାଉଛି ।
ତେଣୁ ଏଭଳି ସ୍ଥିିତିରେ ଲକ୍ଷାଧିକ ଟଙ୍କା କାରବାର ଉପରେ ଗ୍ରାହକଙ୍କୁ ଅଧିକ ସତର୍କ ରହିବାକୁ ପରାମର୍ଶ ଦେଇଛନ୍ତି ବିଶେଷଜ୍ଞ । ବିଶେଷକରି ମହାତ୍ମା ଗାନ୍ଧିଙ୍କ ଓ୍ୱାଟରମାର୍କ, ହଲୋଗ୍ରାମ, ସିକ୍ୟୁରିଟି ଥ୍ରେଡ୍ ଓ ନୋଟ୍ ଉପରେ ସ୍ପଷ୍ଟ ଭାବେ ମୂଲ୍ୟକୁ ଦେଖି ଏବଂ ହାତରେ ଅନୁଭବ କରି ନୋଟ୍ ଗ୍ରହଣ କରିବାକୁ କୁହାଯାଇଛି ।
ବରପାଲିରୁ ଜବତ୍ ନକଲି ନୋଟ୍ ଘଟଣାରେ ଅନ୍ତର୍ଜାତୀୟ ରାକେଟ୍ର ସଂପୃକ୍ତି ଅଛି ନା ନାହିଁ ? ଅସଲରେ ଫେକ୍ ନୋଟ୍ର ନେଟ୍ଓ୍ୱର୍କ କେଉଁଠୁ ଅପରେଟ୍ ହେଉଛି, ୟା ପଛରେ ଦେଶବିରୋଧୀ ଶକ୍ତିର ହାତ ଅଛି କି ନାହିଁ ? ଏସବୁକୁ ନଜରରେ ରଖି ଘଟଣା ସଂପର୍କରେ ଏସ୍ଯିଏଫ୍ ପକ୍ଷରୁ ଏନ୍ଆଇଏ ଓ ଆଇବିକୁ ଜଣାଇ ଦିଆଯାଇଥିବା ସୂଚନା ମିଳିଛି ।
