କାରରେ ନେଉଥିଲେ ୯ କେଜି ସୁନା, ମଙ୍ଗୁଳିରେ ପଡ଼ିଲା ଧରା

ଲକ୍ଷେ କି କୋଟିଏ ନୁହଁ । ୬ କୋଟିରୁ ଅଧିକ ମୂଲ୍ୟର ସୁନା ଚୋରା ଚାଲାଣ ବେଳେ ମାଡ଼ି ବସିଛି ଡିରେକ୍ଟୋରେଟ୍ ଅଫ୍ ରେଭିନ୍ୟୁ ଇଣ୍ଟେଲିଜେନ୍ସ-DRI । କୋଲକାତାରୁ କାର୍ ଯୋଗେ ସୁନା ଚୋରାଚାଲାଣ ବେଳେ କଟକ ମଙ୍ଗୁଳି ଟୋଲ୍ ପ୍ଲାଜା ନିକଟରେ DRI ଅଧିକାରୀ ଧରିଛନ୍ତି । ଏକ ବିଶେଷ ସୂତ୍ରରୁ ଖବରପାଇ ଛକି ରହିଥିଲା DRI ଟିମ୍ ।

ଆଉ ଏସବୁ ସୁନାକୁ ଏକ ଦାମୀ କାରରେ ଚାଲାଣ କରାଯାଉଥିବା ବେଳେ DRI ଟିମ୍ ଚଢ଼ାଉ କରି ୨ ଜଣଙ୍କୁ ଗିରଫ କରିଛି । ସେମାନଙ୍କ ନିକଟରୁ ମୋଟ ୬୫ ଖଣ୍ଡ ଚୋରା ସୁନାକୁ ଜବତ କରିଛି । ଯାହାର ଓଜନ ୯ କିଲୋ ୧୮୦ ଗ୍ରାମ ଏବଂ ଯାହାର ମୂଲ୍ୟ ୬ କୋଟି ୪୪ ଲକ୍ଷ ୪୬ ହଜାର ୧୬୪ ଟଙ୍କା ।

ଏପରି ବିପୁଳ ପରିମାଣର ସୁନା କୋଲକାତାରୁ ଦକ୍ଷିଣ ଭାରତକୁ ଚାଲାଣ କରାଯାଉଥିବା ପ୍ରାଥମିକ ତଦନ୍ତରୁ ଜଣା ପଡ଼ିଛି । କିନ୍ତୁ ଏଥିରେ ଓଡ଼ିଶାର ଲିଙ୍କ ଅଛି କି ନାହିଁ ତାହା ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇନାହିଁ । ଏସବୁ ସୁନାକୁ କାର ଭିତରେ ଅତି ଚତୁରତାର ସହ ଲୁଚାଇ ରଖିଥିଲେ ୨ ଅଭିଯୁକ୍ତ । କାର ଯୋଗେ ସୁନା ସ୍ମଗଲିଂ ହେଉଥିବା ବେଳେ ମଙ୍ଗୁଳି ନିକଟରେ ଧରା ପଡ଼ିଥିଲା ।