LIVE TV
ଉମରକୋଟ: ଯେଉଁ ପୁଅ, ବୋହୂଙ୍କ ମୁହଁକୁ ଚାହିଁ ସ୍ୱାମୀଙ୍କ ପେନସନ ଟଙ୍କାକୁ ସମର୍ପି ଦେଇଥିଲା ମା। ଚାକିରୀଆ ପୁଅମାନଙ୍କୁ ଛାଡ଼ି ଯେଉଁ ବେରୋଜଗାର ପୁଅ ବୋହୂଙ୍କ ପାଖରେ ମାଟି ରହୁଥିଲା, ଶେଷରେ ସେହି ମାର ମିଳିଛି ଗଳିତ ମୃତଦେହ। ଘଟଣା ଘଟିଛି ନବରଙ୍ଗପୁର ଜିଲ୍ଲା ଉମରକୋଟ ଶିବାଜୀ ନଗରରେ। ମୃତ ମହିଳା ହେଲେ ୨୦୦୨ରେ ପ୍ରାଣ ହରାଇଥିବା ଭାଗିରଥି ନାୟକଙ୍କ ପତ୍ନୀ କୁସୁମ।
ଭାଗରଥୀ ଥିଲେ ପୋଷ୍ଟାଲ ବିଭାଗର ଜଣେ ଉଚ୍ଚପଦସ୍ଥ ଅଧିକାରୀ। ଅବସର ପରେ ୩ ପୁଅଙ୍କ ମଧ୍ୟରୁ ବେରୋଜଗାର ଥିବା ବଡପୁଅ ପାଖରେ ରହୁଥିଲେ ଭାଗିରଥୀ ଓ ପତ୍ନୀ କୁସୁମ। ୨୦୦୨ରେ ଭାଗୀରଥୀ ପ୍ରାଣ ହରାଇବା ପରେ ବି କୁସୁମ ଫ୍ୟାମିଲି ପେନସନ୍ ପାଉଥିଲେ, ସେହି ଟଙ୍କାରେ ବଡ଼ପୁଅର ପରିବାର ସହ ନିଜେ ଚଳିଯାଉଥିଲେ। ଦୁର୍ଯୋଗକୁ ୬ମାସ ତଳେ ବଡପୁଅ ବି ଆରପାରିକୁ ଚାଲିଗଲେ। ତାପରେ ୮୨ ବର୍ଷ ବୟସରେ କୁସୁମଙ୍କୁ ଅଲଗା କୋଠରୀରେ ରଖିବା ସହ ବଡ଼ବୋହୂ ଭଲମନ୍ଦ ବୁଝୁନଥିଲେ ବୋଲି ଅଭିଯୋଗ ହୋଇଛି।
ଶେଷରେ ଗତକାଲି ସେହି କୋଠରୀରୁ ଅତି ରହସ୍ୟଜନକ ଭାବେ କୁସୁମଙ୍କ ମିଳିଛି ମୃତଦେହ। ବନ୍ଦ କୋଠରୀରୁ ଦୁର୍ଗନ୍ଧ ଅବସ୍ଥାରେ ମୃତଦେହକୁ ଉଦ୍ଧାର କରାଯାଇଥିବାବେଳେ ସାନବୋହୂଙ୍କ ଏତଲାକ୍ରମେ ପୋଲିସ ଏକ ମାମଲା ରୁଜୁ କରିଛି। ତାସହ ମୃତଦେହକୁ ବ୍ୟବଛେଦ କରାଇ ରିପୋର୍ଟ ଆସିଲେ ମୃତ୍ୟୁ ପଛର କାରଣ ଜଣାପଡ଼ିବ ବୋଲି କହିଛି ପୋଲିସ। ତେବେ ଏନେଇ ବଡ଼ବୋହୂ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନି।
ଏନେଇ କୁସୁମଙ୍କ ସାନବୋହୂ ମନ୍ଦିରା ନାୟକ କହିଛନ୍ତି, କିଏ ମାରିଛନ୍ତି କିମ୍ବା ନିଜେ ମରିଛନ୍ତି, ତାହା ଆମେ ଜାଣିନାହୁଁ। ଯଦି ମରିଥିଲେ ତେବେ ସେମାନେ କାହିଁକି ଜଣାଇନଥିଲେ, ତାହା ତଦନ୍ତ ହେବା ଉଚିତ୍।
