Cuttack Christ College Student Death: ଖ୍ରୀଷ୍ଟ କଲେଜ ଛାତ୍ରଙ୍କ ଅର୍ଦ୍ଧଦଗ୍ଧ ମୃତଦେହ ଉଦ୍ଧାର, ବଡ ଅଭିଯୋଗ ଆଣିଲେ ବାପା

କଟକରେ ଜଣେ ୧୭ ବର୍ଷୀୟ ଛାତ୍ରଙ୍କ ଅର୍ଦ୍ଧଦଗ୍ଧ ମୃତଦେହ ଉଦ୍ଧାର ହୋଇଛି। ମୃତକ ଖ୍ରୀଷ୍ଟ କଲେଜର ଯୁକ୍ତ ଦୁଇ ପ୍ରଥମ ବର୍ଷର ଛାତ୍ର । ନାମ ଅଙ୍କନ ଦତ୍ତ । ତାଙ୍କ ଘର ପଶ୍ଚିମବଙ୍ଗରେ ହୋଇଥିବାବେଳେ ସେ ନିଜ ବାପାମାଆ ସହ ପୁରୀଘାଟ ଥାନା ମଠସାହି ଗୋପାଳଜିଉ ଲେନରେ ଭଡା ଘରେ ରହୁଥିଲେ । ଗତକାଲି ବିଳମ୍ବିତ ରାତିରେ ସନ୍ଦେହଜନକ ଅବସ୍ଥାରେ ପୋଡି ହୋଇ ତାଙ୍କର ମୃତ୍ୟୁ ହୋଇଛି ।

ଅଧିକ ପଢ଼ନ୍ତୁ: ନେପାଳୀ ଛାତ୍ରୀ ମୃତ୍ୟୁକୁ ନେଇ ଅଶାନ୍ତ କିଟ୍ କ୍ୟାମ୍ପସ୍, ୫ ଗିରଫ

ଛାତ୍ର ଜଣକ ନିଜ ଦେହରେ ଡିଜେଲ୍ ଢାଳି ନିଆଁ ଲଗାଇ ଆତ୍ମହତ୍ୟା କରିଥିବା ପ୍ରଥମେ ଅନୁମାନ କରାଯାଉଥିଲା । ସ୍ଥାନୀୟ ଲୋକେ ତାଙ୍କୁ ଜଳୁଥିବାର ଦେଖି ଅଗ୍ନିଶମ ବାହିନୀକୁ ସୂଚନା ଦେଇଥିଲେ । ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁ ଲିଭାଇଥିଲା । ହେଲେ ସେତେବେଳକୁ ଛାତ୍ର ଜଣକ ଆଉ ଜୀବିତ ନଥିଲେ । ତେବେ ଅଙ୍କନ ଆତ୍ମହତ୍ୟା କରିଥିବା ଘଟଣାକୁ ତାଙ୍କ ବାପା ସମ୍ପୂର୍ଣ୍ଣ ଖଣ୍ଡନ କରିଛନ୍ତି । ଏହା ଏକ ସୁଚିନ୍ତିତ ହତ୍ୟାକାଣ୍ଡ । ବ୍ୟାବସାୟିକ ଶତ୍ରୁତାକୁ କେନ୍ଦ୍ରକରି ତାକୁ ହତ୍ୟା କରାଯାଇଥିବା ସେ ଅଭିଯୋଗ ଆଣିଛନ୍ତି ।

ମୃତ ଛାତ୍ରଙ୍କ ବାପା କହିଛନ୍ତି, ରାତିରେ କେହି ଜଣେ ଜଳୁଥିବାର ଦେଖି ନିଆଁ ଲିଭାଇବାକୁ ମୁଁ ପାଣି ଢାଳିଲି । ପରେ ଜାଣିଲେ ଯେ ଜଳୁଥିବା ପିଲାଟି ମୋ ପୁଅ । ରାତି ପ୍ରାୟ ୧ଟାରେ ଏହି ଘଟଣା ଘଟିଥିଲା । ସେତେବେଳେ ଆମର କିଛି ପଡୋଶୀ ଚେଇଁଥିବା ମୋତେ କହିଛନ୍ତି । କିନ୍ତୁ ଯଦି ମୋ ପୁଅ ନିଜେ ନିଆଁ ଲଗାଇ ଆତ୍ମହତ୍ୟା କରିଛି ତାହେଲେ ନିଆଁରେ ଜଳିବା ବେଳେ ସେ ଯନ୍ତ୍ରଣାରେ ଚିଲେଇବା କଥା । ହେଲେ ତା' ଚିତ୍କାର କାହାରିକୁ ଶୁଣାଗଲାନି କେମିତି । 

ତେଣୁ କେହି ତାକୁ ପ୍ରଥମେ ହତ୍ୟା କରିଛି । ପ୍ରମାଣ ଲୁଚାଇବାକୁ ତା' ଦେହରେ ଡିଜେଲ ଢାଳି ପୋଡି ଦେଇଛି । ଯେପରି ଏହା ଆତ୍ମହତ୍ୟା ଲାଗିବ । ଏପରି ଅଭିଯୋଗ ଆଣିଛନ୍ତି ମୃତକଙ୍କ ବାପା । 

ଛାତ୍ରଙ୍କ ମାଆ ମଧ୍ୟ ପୁଅର ଆତ୍ମହତ୍ୟା କଥାକୁ ସହଜରେ ବିଶ୍ବାସ କରିନାହାନ୍ତି । ତାଙ୍କ କହିବା କଥା, ଅଙ୍କନ ଆଦୌ କୌଣସି ମାନସିକ ଚାପ କିମ୍ବା ଅବସାଦରେ ଥିବାର ଜଣାପଡୁନଥିଲା । ସେ ସ୍ବାଭାବିକ ଆଚରଣ କରୁଥିଲା । ସବୁଦିନ ଭଳି କଥାବାର୍ତ୍ତା ଓ ଖାଇବା ପିଇବା କରୁଥିଲା । ହେଲେ ତା' ସହ କ'ଣ ଘଟିଲା ଆମେ ଜାଣିପାରୁନୁ । ଏନେଇ ପୋଲିସ ଛାନଭିନ୍ ଆରମ୍ଭ କରିଥିବା ବେଳେ କୌଣସି ପ୍ରତିକ୍ରିୟା ମିଳିପାରି ନାହିଁ । 

ଅଧିକ ପଢ଼ନ୍ତୁ: ‘ତା ଶରୀରରେ ଜୀବନ ଥିଲା ତାକୁ ବଞ୍ଚେଇ ପାରିଥାନ୍ତେ'