Crime Capital Bhubaneswar ! ପୁଣି ଗଡ଼ିଲା ମୁଣ୍ଡ, ମାଆକୁ ଜାଳିଦେଲା ପୁଅ

ରାଜଧାନୀ ଭୁବନେଶ୍ୱରରେ ପୁଣି ଗଡ଼ିଲା ମୁଣ୍ଡ । ବଡ଼ଗଡ଼ ଥାନା କଳିଙ୍ଗ ବସ୍ତିରେ ନିଜ ମାଆକୁ ବୀଭତ୍ସ ଭାବେ ହତ୍ୟା କରିଛି ସନ୍ତାନ । ହତ୍ୟା କରିବା ପରେ ସେ ଘରେ ହିଁ ଜାଳି ଦେଇଛି ନିଜ ମାଆକୁ । ମଙ୍ଗଳବାର ସଂଧ୍ୟାରେ ଘଟିଛି ଏହି ଅଭାବନୀୟ ଘଟଣା ।

ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଦରପୋଡ଼ା ଅବସ୍ଥାରେ ମୃତଦେହକୁ ଉଦ୍ଧାର କରିବା ସହ ଘଟଣାର ଖୋଳତାଡ଼ କରୁଛି ପୋଲିସ । ତାସହ ଅଭିଯୁକ୍ତ ପୁଅକୁ ପୋଲିସ ଅଟକ ରଖିଛି । ତେବେ କେଉଁ କାରଣରୁ ପୁଅ ଏଭଳି ନାରକୀୟ କାଣ୍ଡ ଭିଆଇଛି, ସେନେଇ ସ୍ପଷ୍ଟ ହୋଇନାହିଁ । ଅଭିଯୁକ୍ତ ପୁଅର ନାଁ ପ୍ରଶାନ୍ତ ଜେନା ଓରଫ କାଳିଆ । ମୃତ ମହିଳା ହେଲେ ରଶ୍ମିତା ଜେନା ।

ଏହି ଘଟଣାର ଠିକ୍‌ ଦୁଇ ଦିନ ପୂର୍ବରୁ ରାଜଧାନୀରେ ଆଉ ଏକ ହତ୍ୟା କାଣ୍ଡ ଘଟିଥିଲା । ସେଥିରେ ଜଣେ ଯୁବକଙ୍କୁ କିଛି ଦୁର୍ବୃତ୍ତ ଛୁରି ମାରି ହତ୍ୟା କରିଥିଲେ । ଏହି ହତ୍ୟାକାଣ୍ଡ ସାମାନ୍ୟ ବଚସାରୁ ଆରମ୍ଭ ହୋଇଥିଲା । ତେବେ ମୃତକଙ୍କ ନା ଚିଣ୍ଟୁ ଓରଫ ନିରଞ୍ଜନ ପରିଡ଼ା । ଏହି ଘଟଣାରେ ଅନ୍ୟ ଜଣେ ଯୁବକ ଗୁରୁତର ମଧ୍ୟ ହୋଇଛନ୍ତି । ତେବେ ଏଥିରେ ଦୁଇ ଅଭିଯୁକ୍ତଙ୍କୁ ପୋଲିସ ଗିରଫ ମଧ୍ୟ କରିଛି ।