ରାଜଧାନୀରେ ରହିବାକୁ ଲାଗିଲାଣି ଡର, ଘର ଛାଡ଼ି ଗଲାମାନେ ହେଉଛି ଚୋରି..!

ଚୋରଙ୍କ ଅମରାବତୀ ସାଜିଛି ରାଜଧାନୀ ଭୁବନେଶ୍ୱର ଘର, ଆପାର୍ଟମେଣ୍ଟରେ ବୁଲାଉଛନ୍ତି କଳାକନା ଦିନ ଦ୍ୱିପ୍ରହରରେ ଲୁଟ କରି ପୋଲିସକୁ ଦେଉଛନ୍ତି ଚାଲେଞ୍ଜ ରାଜଧାନୀ ଭୁବନେଶ୍ୱରରେ ଚୋରି ବଢୁଥିବା ବେଳେ, ରାଜଧାନୀ ବାସିନ୍ଦାଙ୍କ ଭିତରେ ପଶିଛି ଛନକା । ସ୍ଥିତି ଏପରି ହୋଇଛି କି ଦିନ ବେଳା ବି ଘରେ ତାଲା ପକାଇବାକୁ ବାଧ୍ୟ ହେଉଛନ୍ତି ଲୋକେ ।

ବାହାଘର କିମ୍ବା ବାହାରକୁ ସପରିବାର ଯିବାକୁ ବି ଡରିଲେଣି ଲୋକ। କାହିଁକି ନା ଘରେ ତାଲା ପଡିଲେ, କାଳେ ତାଲା ଡାଡି କଳାକନା ବୁଲାଇବେ ଦୁର୍ବୃତ୍ତ, ସେ ଚିନ୍ତା ସଦାବେଳ ଘାରୁଛି । ଏପଟେ ଗତ ଅକ୍ଟୋବରରେ ଘଟିଥିବା ଏକାଧିକ ଲୁଟର ସିସିଟିଭି ଭିଜୁଆଲ ଥିବା ସତ୍ତ୍ବେ ପୋଲିସର ହାତଖାଲି । ଏଣୁ ପୋଲିସ ଉପରେ ଭରସା ନକରି ନିଜ ସୁରକ୍ଷା ନିଜେ ଚିନ୍ତା କରୁଛନ୍ତି ରାଜଧାନୀ ବାସିନ୍ଦା ।

ବାରମ୍ବାର ଚୋରି କରି ପୋଲିସକୁ ଖୋଲା ଚାଲେଞ୍ଜ ଦେଉଛନ୍ତି ଚୋର ଗ୍ୟାଙ୍ଗ । ଏପଟେ କିନ୍ତୁ ପୋଲିସ କହୁଛି, ଚୋରଙ୍କୁ ଧରିବାକୁ ଉଦ୍ୟମ ଜାରି ରହିଛି । କିଛି ଦିନ ତଳେ ଚୋର ଗ୍ୟାଙ୍ଗକୁ ଧରିବାକୁ ପୋଷ୍ଟର ମାରିଥିଲା ପୋଲିସ, ହେଲେ ସେମିତି କିଛି ସଫଳତା ପାଇନଥିବା ଅଭିଯୋଗ ହୋଇଛି ।