LIVE TV
ବହୁଚର୍ଚ୍ଚିତ ଭରତପୁର ଥାନା କଳଙ୍କ ପଛର ସତ କ’ଣ ? ପ୍ରକୃତରେ କ’ଣ ସବୁ ଘଟିଥିଲା ୧୪ ତାରିଖ ବିଳମ୍ବିତ ରାତି ଓ ୧୫ ତାରିଖ ଭୋରରେ ? ଏସବୁର ମୂଳରେ ପହଞ୍ଚିବାକୁ ଆଜି ହୋଇଛି ସିନ୍ ରିକ୍ରିଏସନ୍ । ସକାଳ ପାଖାପାଖି ୯ଟା ଭରତପୁର ଥାନାରେ ପହଞ୍ଚିଥିଲେ ଆର୍ମି ମେଜର୍ ଓ ତାଙ୍କ ବାନ୍ଧବୀ । ପୂର୍ବରୁ ସେଠି ଉପସ୍ଥିତ ଥିଲେ କ୍ରାଇମବ୍ରାଞ୍ଚ ଇନକ୍ବାରି ଟିମ୍ । ମେଜରଙ୍କୁ କିଏ ଓ କେମିତି ସେଲ୍ ଭିତରେ ପୁରାଇଲା ? ତାଙ୍କ ବାନ୍ଧବୀଙ୍କୁ କେଉଁଠୁ କିଏ ଘୋଷଡ଼ି ଘୋଷାଡ଼ି ନେଲା ? ବାନ୍ଧବୀଙ୍କୁ କିଏ ମାଡ଼ ମାରିଲା ? ଥାନା ଆଇଆଇସି କେଉଁଠି ଛିଡ଼ା ହୋଇଥିଲେ? ଏସବୁ ଗୋଟି ଗୋଟି କରି ବଖାଣିଥିଲେ ପୀଡ଼ିତା । ସେଠି ଏସବୁର ଭିଡିଓ ରେକର୍ଡିଂ କରିବା ପରେ ସିଧା ବାହାରିଥିଲେ ସୁନ୍ଦରପୁର ସ୍ପଟ୍ ।
ପୋଲିସ୍ ଓ ସେନା ଅଧିକାରୀଙ୍କ ସୁରକ୍ଷା ବଳୟରେ ମେଜର୍ , ତାଙ୍କ ବାନ୍ଧବୀ ଘଟଣାସ୍ଥଳରେ ଦେଖାଇଥିଲେ କେଉଁପଟେ ଥିଲା ଉଭୟ ପକ୍ଷଙ୍କ କାର୍ ? ରୋଡ୍ ରୋମିଓମାନେ କେଉଁଠି ଛିଡ଼ା ହୋଇ ସେମାନଙ୍କୁ ଦୁର୍ବ୍ୟବହାର କରିଥିଲେ? ହଠାତ୍ କେଉଁଭଳି ତାଙ୍କୁ ହେଲା ଆଟାକ୍। ଏସବୁ ତଥ୍ୟ କେତେବେଳେ ମେଜର ତ କେତେବେଳେ ପୀଡ଼ିତାଙ୍କଠୁ ପଚାରି ବୁଝିଥିଲେ ତଦନ୍ତକାରୀ ଟିମ୍ । ୩୬୦ ଡିଗ୍ରୀ ଆଙ୍ଗେଲରୁ କରାଯାଇଥିଲା ଭିଡିଓ ରେକର୍ଡିଂ। ଏସବୁ ଭିତରେ ଘଟଣାସ୍ଥଳ ପାଖରେ ଥିବା ଏକ ଗ୍ରୋସରୀ ଦୋକାନର ସିସିଟିଭିରୁ ସେଦିନ ରାତି ଫୁଟେଜକୁ ଚନ୍ଦକା ପୋଲିସ୍ ନେଇଥିବା କହିଥିଲେ ଉକ୍ତ ଦୋକାନୀ ।
Also Read
ଅପରାହ୍ନ ସାଢ଼େ ଗୋଟାଏ, ଭରତପୁର ଥାନା। ଏଥର ଥିଲା ନିଲମ୍ବିତ ପୋଲିସ କର୍ମଚାରୀଙ୍କ ପାଳି। ସେମାନଙ୍କୁ ଧରି ବି ସିନ୍ ରିକ୍ରିଏସନ କରିଥିଲା କ୍ରାଇମବ୍ରାଞ୍ଚ ଟିମ୍ । ନିଲମ୍ବିତ ଆଇଆଇସି ଦୀନକୃଷ୍ଣ ମିଶ୍ରଙ୍କୁ ଛାଡ଼ି ବାକି ୪ ନିଲମ୍ବିତ ପୋଲିସ କର୍ମଚାରୀ ସବ-ଇନସପେକ୍ଟର ସାଗରିକା ରଥ, ଏଏସଆଇ ବୈଶାଳିନୀ ପଣ୍ଡା, ASI ସଲିଳାମୟୀ ସାହୁ ଓ କନଷ୍ଟେବଳ ବଳରାମ ହାଁସଦାଙ୍କୁ ପଚାରିଥିଲେ ଘଟଣାଦିନ ରାତିର ସତ । ପୀଡ଼ିତା କେଉଁବାଟେ ଆସିଲେ ? କେମିତି ଅବସ୍ଥାରେ ଆସିଥିଲେ ? କେଉଁଠି ଛିଡ଼ା ହୋଇଥିଲେ? କାହା ହାତକୁ କାମୁଡ଼ି ଦେଇଥିଲେ? ଇତ୍ୟାଦି ଇତ୍ୟାଦି ।
ସେପଟେ ଆଜି ଭୁବନେଶ୍ବର SDJM କୋର୍ଟରେ ହାଜର ହୋଇଥିଲେ ଭରତପୁର ଥାନାର ନିଲମ୍ବିତ ଆଇଆଇସି ଦୀନକୃଷ୍ଣ ମିଶ୍ର। ତାଙ୍କର ପଲିଗ୍ରାଫ୍ ଟେଷ୍ଟ ଅନୁମତି ପାଇଁ କ୍ରାଇମବ୍ରାଞ୍ଚ ଆବେଦନ କରିଥିବାରୁ ସେଥିପାଇଁ ଦେଇଥିଲେ ସହମତି। ଦୀନକୃଷ୍ଣଙ୍କର ନାର୍କୋ ଆନାଲିସିସ୍ ଓ ପଲିଗ୍ରାଫ୍ ସହ ବ୍ରେନ୍ ଫିଙ୍ଗର ପ୍ରିଣ୍ଟିଂ ଟେଷ୍ଟ କରାଯିବ। ଏଥିପାଇଁ ଖୁବଶୀଘ୍ର ଦୀନକୃଷ୍ଣଙ୍କୁ ଧରି ଗୁଜରାଟର ଗାନ୍ଧୀନଗର ଯିବ କ୍ରାଇମବ୍ରାଞ୍ଚ ଟିମ୍ । ଭରତପୁର କାଣ୍ଡର ପ୍ରମାଣ ଯୋଗାଡ଼ରେ ଲାଗିଛି କ୍ରାଇମବ୍ରାଞ୍ଚ। ଆଜି ଶେଷ ହୋଇଛି ସିନ୍ ରିକ୍ରିଏସନ। ଏବେ ଅପେକ୍ଷା ଦୀନକୃଷ୍ଣଙ୍କ ପଲିଗ୍ରାଫ୍ ଟେଷ୍ଟ ରିପୋର୍ଟକୁ ।
- Reported by:
- NIRANJAN REDDY , CHANDAN PAIKRAY
