ମାତୃହନ୍ତା କୁଳାଙ୍ଗାର ! ଗୋଇଠା ମାରି ମାରି ମା’କୁ ମାରିଦେଲା ପୁଅ

ପୁଅବୋହୂ ମାଡ଼ରେ ମା’ର ମୃତ୍ୟୁ । ଗୋଇଠା ମାରି ମାରି ମା’କୁ ମାରି ପକାଇଲା କୁଳାଙ୍ଗାର ପୁଅ । ଏଭଳି ଅଭାବନୀୟ ଘଟଣା ଘଟିଛି କନ୍ଧମାଳ ଜିଲ୍ଲା ଦାରିଙ୍ଗବାଡି ଥାନା ପାଙ୍ଗାଲି ନିକଟ କାଜୁରିପାଙ୍ଗା  ଗାଁରେ । ଖବର ପାଇବା ପରେ ଘଟଣାସ୍ଥଳରେ ପହଞ୍ଚିଥିଲା ପୋଲିସ୍‌ । ଏବେ ଅଭିଯୁକ୍ତ ପୁଅ ସୁନାମ ପରିଛା ସମେତ ଅନ୍ୟ ଜଣେ ଯୁବକକୁ ପୋଲିସ ଥାନାରେ ଅଟକ ରଖି ଅଧିକ ତଦନ୍ତ ଚଲାଇଛି । ମୃତ ମହିଳା ଜଣକ ହେଲେ ପୁଷ୍ପାଞ୍ଜଳି ପରିଛା ବୋଲି ଜଣାପଡିଛି ।

ସୂଚନା ଅନୁସାରେ ଗତକାଲି ସନ୍ଧ୍ୟା ସମୟରେ ମୃତକ ପୁଷ୍ପାଞ୍ଜଳି ନିଜ ମା’ର ଶୁଦ୍ଧିକ୍ରିୟା ପାଇଁ ସ୍ୱାମୀ ଓ ନାତୁଣୀ ସହ କାଜୁରୀପାଙ୍ଗା ଗ୍ରାମକୁ ଯାଇଥିଲେ । ସନ୍ଧ୍ୟା ସମୟରେ ନିଜ ମା’ର ଶୁଦ୍ଧିକ୍ରିୟା କିଭଳି କରାଯିବ, ସେ ନେଇ ପରିବାର ଲୋକେ ବସି ଆଲୋଚନା କରୁଥିବା ସମୟରେ ପୁଅ ସୁନାମ ପରିଛା ଓ ବୋହୂ ଲିନା ତାଙ୍କ ସହ ଝଗଡା କରିଥିଲେ ।

ଏତିକିରେ ପୁଅ ସୁନାମ ମା’ ପୁଷ୍ପାଞ୍ଜଳିଙ୍କର ତଣ୍ଟି ଚିପିବା ସହ ପଡୋଶୀ ଅନୀଳ ମନ୍ତ୍ରୀ ପେଟରେ ଗୋଇଠା ମାରିଥିଲା । ପରେ ପୁଅବୋହୂ ତାଙ୍କୁ ଗୋଇଠା ପରେ ଗୋଇଠା ମାରି ଚାଲିଥିଲେ । ଏହି ଘଟଣା ପରେ ଗୁରୁତର ଅବସ୍ଥାରେ ପୁଷ୍ପାଞ୍ଜଳିଙ୍କୁ ଦାରିଙ୍ଗବାଡି ହସ୍ପିଟାଲରେ ଭର୍ତ୍ତି କରିଥିଲେ ପରିବାର ଲୋକେ । ହେଲେ ସେଠାରେ ମୃତ ଘୋଷଣା କରିଥିଲେ ଡାକ୍ତର ।

ଅନ୍ୟପଟେ ସ୍ୱାମୀ ଲପତି ପରିଛା ନିଜ ସ୍ତ୍ରୀକୁ ହତ୍ୟା କରାଯାଇଥିବା ନେଇ ଥାନାରେ ଅଭିଯୋଗ କରିଛନ୍ତି । ପୁଅବୋହୂ ଆଉ ଅନ୍ୟ ସହଯୋଗୀଙ୍କୁ ଗିରଫ କରିବା ପାଇଁ ଦାବି କରିଛନ୍ତି । ପୋଲିସ ଏହି ଘଟଣାରେ ଆଉ କିଏ କିଏ ସମ୍ପୃକ୍ତ ରହିଛନ୍ତି, ସେମାନଙ୍କୁ ଧରିବା ଲାଗି ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିବା ସହ ଅଧିକ ତଦନ୍ତ ଚଲାଇଛି ।